Roma 9
9
Ya Tyumanem aw ya manga Judiyu
1Na, awun paglongun ku kamayu aw tengteng yeiy matinaw kay nyakasambuk da aku kan Kristu aw bekeꞌ yeiy na galuꞌ. Aw ya Ispiritu Santo, yan ya migmatinaw sa kanak anenganeng. 2Migkalat to-o ya kanak ginawa kay gayed ku pig-anenganeng ya manga kadégan ku na manga Judiyu na walaꞌ pangintu-u. 3Kun mabatug pa galu na aku ya pa-emel-emelen na Tyumanem kalyu kanilan aw ka-eletan adti kan Kristu, yan saba ya imo-un ku pada makaluwaꞌ silan. 4Silan saba ya manga buwadbuwad ni Isra-él na pigpamalliꞌ na Tyumanem na ma-imoꞌ kanan mangayseꞌ. Aw adti kanilan pigpakitaꞌ nan ya kanan kadyawan. Aw pig-imoꞌ nan kanilan ya manga pakang na dayaw mig-iganget. Aw silan ya pig-atagan nan sa Uldin. Aw silan ya pigpalna-uwan nan kun unun nilan ya pagsimba kanan. Aw silan ya pigpakangan na Tyumanem sa madég na grasya. 5Silan ya manga buwadbuwad ni Abraham, aw ni Isa-ak, aw ni Jakub na pigpamalliꞌ na Tyumanem asini muna. Aw dun ni kanilan buwadbuwad ka͡utaw si Kristu na yan ya Tyumanem na migdumala sa kadég. Aw yan saba ya umbaꞌ deyen na walaꞌ ya tyamanan. Amén.
6Na, pangkay walaꞌ pangintu-uwi na eped na manga Judiyu si Kristu, manang pigtuman saba na Tyumanem ya manga pigpakang nan adti manga buwadbuwad ni Isra-él. Kay diliꞌ ya kadég na manga buwadbuwad ni Isra-él tengteng utaw na Tyumanem. 7Aw maynan uman, pangkay awun manga utaw na buwadbuwad ni Abraham, manang bekeꞌ na kadég nilan tengteng buwadbuwad nan. Kay pigpasulat na Tyumanem asini muna, law nan, “Magi kan Isa-ak ma-imoꞌ kaw tyugbulan sa manga buwadbuwad na pigpakang da ku kanmu.”#9:7 Mabasa adti Génésis 21:12. 8Aw ini ya kakawasan: Diliꞌ ya kadég na iseꞌ ni Abraham tengteng iseꞌ na Tyumanem, manang idtu oloꞌ na pigpakang na Tyumanem kanan. 9Kay yan ya pigpakang na Tyumanem kanan, “Lumikuꞌ aku adi tampid mayu salut na umay kasiling na maynini na bulan. Aw sa diliꞌ pa aku lumikuꞌ adi, ka͡utawan da si Sara sa iseꞌ nan na eseg.”#9:9 Mabasa adti Génésis 18:10,14. 10Aw bekeꞌ na yan da oloꞌ, manang nya-imoꞌ yeiy uman adti duwa ya iseꞌ ni Ribéka aw ni Isa-ak na kanaten tyugbulan. 11-12Sa walaꞌ pa ka͡utawi si Ribéka sa iseꞌ nan na pingin, miglong ya Tyumanem kanan, “Ya iseꞌ mu na magulang, dumala͡an na mangud nan.”#9:11-12 Mabasa adti Génésis 25:23. Aw dun da na Tyumanem pa-ede-an ya palpa nan pangkay walaꞌ pa silan ka͡utaw. Yanagaw, pigpamalliꞌ nan ya sambuk, bekeꞌ na asuntu sa pag-imoꞌ nilan sa madyaw aw malatay, manang asuntu na yan ya pagbayaꞌ na Tyumanem. 13Aw pigpasulat na Tyumanem asini muna, law nan, “Si Jakub, yan ya pigginawa͡an ku, manang si Isaw, pigkele͡an ku.”#9:13 Mabasa adti Malakiyas 1:2-3.
14Na, kun maynan, makapaglong kaꞌ kita na diliꞌ matinaw ya pagbayaꞌ na Tyumanem? Diliꞌ saba! 15Kay miglong ya Tyumanem kan Moysis,
“Kallatan ku ya pangkay singalan ya kaliman ku kallatan.
Aw pakadyawun ku ya pangkay singalan ya kaliman ku pakadyawun.”#9:15 Mabasa adti Éxudo 33:19.
16Yanagaw ya pagkallat na Tyumanem, bekeꞌ na asuntu sa pag-imoꞌ nilan sa madyaw aw bekeꞌ uman na asuntu sa kanilan pagkaliman. Manang yan oloꞌ ya du-an, kay kyallatan nan silan. 17Kay awun pigpasulat na Tyumanem asini muna na piglong nan sa para-un na hariꞌ sa nasud na Ihiptu, “Ini ya du-an na pig-atag ku kanmu ya katundanan asini banwa na Ihiptu, pada magi dun ni kanmu kita-en ya kanak katulus aw ma-imoꞌ dengganen ya ngalan ku adti kadég na banwa asini tas na lupaꞌ.”#9:17 Mabasa adti Éxudo 9:16. 18Yanagaw, ya kallat na Tyumanem pigpakitaꞌ nan adti pangkay singalan ya kaliman nan kallatan, aw pigpakategel nan ya pangkay singalan ya kaliman nan pakategelen.
19Na, pagaw musip kamu kanak, “Anangaꞌ pa nan pasala-en ya manga utaw? Singalan kaꞌ ya makatagen sa pagbayaꞌ na Tyumanem?” 20Manang singalan kaw na magpa-ayil sa maynan adti Tyumanem? Utaw kaw saba oloꞌ na pig-imoꞌ nan! Kasiling kitadun na kulun. Aw diliꞌ makapaglong ya kulun adti mag-imo-ay kanan, “Anangaꞌ aku mu imo-un na maynini?” 21Ya mag-imo-ay sa kulun, yan ya magbayaꞌ kun unu ya imo-un nan adti libukuk na lupaꞌ. Kun kaliman nan imo-un duwa, ya sambuk imo-un nan madyaw na seledanan aw ya sambuk diliꞌ to-o madyaw na seledanan, mabatug nan saba kay yan ya magbayaꞌ. 22Aw yeiy saba ya pig-imoꞌ na Tyumanem. Kun kaliman nan pa-emel-emelen ya kadég na nyakasalaꞌ aw pa-edeꞌ ya kanan katulus, yeiy ya kanan pagbayaꞌ. Manang pigtagenan pa nan ya kanan kadaman adti manga utaw na umbaꞌ pa-emel-emelen 23pada kita-en ya kadakulaꞌ na kadyawan na pig-atag nan adti manga utaw na pigkallatan nan, aw silan ya pigtagilanan sa matas na dengeg dun ni allaw na dumadateng pa. 24Aw maynan ya kadég tadun na pigtawag nan na ma-imoꞌ kanan manga utaw, bekeꞌ oloꞌ na lekat adti manga Judiyu, manang lekat uman adti manga Héntil. 25Kay pigpasulat na Tyumanem magi sa kanan propita na si Osiyas asini muna, law nan:
“Ya bekeꞌ na kanak manga utaw, tawagen da ku silan adun na ‘Kanak manga utaw.’
Aw ya walaꞌ ku ginawayi asini muna, ginawa͡an da ku silan adun.”#9:25 Mabasa adti Osiyas 2:23.
26 “Aw adti manga banwa na piglongan ku ya manga utaw na ‘Kamu bekeꞌ na kanak manga utaw,’
tawagen da silan adun na ‘Mangayseꞌ na Tyumanem na Gayed Awun.’ ”#9:26 Mabasa adti Osiyas 1:10.
27Aw pigpasulat nan uman magi sa propita na si Isayas asini muna, law nan,
“Pangkay ya kadég na buwadbuwad ni Isra-él kasiling na pantad dun ni baklayan na dagat,
manang tabay oloꞌ kanilan ya paluwa-en na Tyumanem.
28 Kay awun allaw na pigtagilan nan na pa-emel-emelen ya manga utaw, aw maksay nan saba yeiy imo-un.”#9:27-28 Mabasa adti Isayas 10:22-23.
29Aw awun pa uman pigsulat ni Isayas, law nan:
“Ya Tyumanem na migdumala sa kadég,
kun walaꞌ pa kitadun nan atagi na buwadbuwad, walaꞌ da galu ya nyasamaꞌ kanaten.
Masiling kitadun galu na manga utaw dun ni manga syudad na Sodoma aw Gomora na pig-apnas nan.”#9:29 Mabasa adti Isayas 1:9.
Ya pagpalipaslipas na manga utaw na Isra-él kan Kristu
30Yanagaw, naten anenganengen ya manga utaw na Héntil. Walaꞌ silan pagtibagseg na lanasen ya kanilan manga salaꞌ. Manang silan baling ya pigdawat na Tyumanem kasiling na walaꞌ ya salaꞌ asuntu sa kanilan pagpangintu-u kan Kristu. 31Manang ya manga utaw na Isra-él na migtibagseg dyumalug sa Uldin pada dawaten galu silan na Tyumanem, walaꞌ nilan kabatug tumana ya kadég na suguꞌ na awun ni Uldin. 32Aw anangaꞌ walaꞌ nilan kabatug tumana? Kay ya kanilan pigsaligan, yan ya imo-unun nilan na madyaw aw bekeꞌ na pagpangintu-u kan Jisus. Pigsungkul silan dun ni batu na pagkasungkulan.#9:32 Si Jisus, yan ya palangad batu na magpakasungkul sa manga utaw. 33Aw kasiling na pigpasulat na Tyumanem, law nan:
“Pakanyegi mayu! Awun batu na pigbetang ku dun ni Ziyon.#9:33a Ya Ziyon, yan ya dadan na ngalan na syudad na Jérusalim.
Aw ya batu yeiy, magpakasungkul sa manga utaw aw magpakatuwad kanilan.
Manang ya kadég na nyangintu-u kanan, diliꞌ silan kabullugan.”#9:33b Mabasa adti Isayas 8:14 aw 28:16.
Currently Selected:
Roma 9: klgv
Highlight
Share
Compare
Copy
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
