Roma 14

Ya pag-ukum sa manga eped na utaw

1Dawata mayu ya manga utaw na walaꞌ pa to-o pakadalid ya kanilan pagpangintu-u, manang diliꞌ mayu silan pag-ayilen asuntu sa anenganeng nilan na walaꞌ pag-unawa sa kamayu. 2Awun eped na utaw na nyakadalid da ya pagpangintu-u na pigtumbay kunu kanilan ya pagkan sa pangkay unu. Aw awun uman eped na walaꞌ pa to-o pakadalid ya kanilan pagpangintu-u na awun kunu pigpigil kanilan na Tyumanem na diliꞌ pagkanen, yanagaw oloꞌ gulayenen ya kanilan pigkan. 3Ya utaw na kyuman sa pangkay unu, diliꞌ magsalaꞌ sa utaw na kyuman oloꞌ sa gulayenen. Aw maynan uman ya utaw na adti anenganeng nan na oloꞌ kuman sa gulayenen, diliꞌ nan pag-ukuman ya utaw na kyuman sa pangkay unu, kay alag da ya kadég tadun pigdawat na Tyumanem. 4Singalan kaw na un mag-ukum sa sugu-anen na eped? Kay ya Tyumanem na tyumagtun kanan, yan saba oloꞌ ya awun katundanan mag-ukum kun umbaꞌ ya pig-imoꞌ nan aw kun malatay. Aw dawaten saba sakanan kay tabangan na Tyumanem.

5Na, awun manga utaw dun ni kamayu na mig-anenganeng na awun manga allaw na to-o madyaw na umbaꞌ magpista pada anenganengen ya Tyumanem. Manang awun eped kamayu na walaꞌ pamalliꞌ sa allaw na magpista kay adti anenganeng nilan alag madyaw ya manga allaw. Yanagaw ya tagsambuksambuk kamayu ya magbayaꞌ sa unu ya umbaꞌ nan imo-un. 6Ya utaw na nyamalliꞌ sa allaw, pig-imoꞌ nan yan pada basa͡an ya kanaten Matas na Pangulu. Aw ya utaw na kyuman sa pangkay unu na punganan na makan, pigpakitaꞌ nan na pigbasa͡an nan uman ya Matas na Pangulu. Kay pigpasalamatan da nan ya Tyumanem sa kadég na kanan pigkan. Aw maynan uman ya utaw na diliꞌ malim kuman sa eped na pagkanen, pigbasa͡an nan uman ya Matas na Pangulu tadun aw pigpasalamatan da nan uman ya Tyumanem. 7Asuntu na mangintu-uway kitadun kan Kristu, ya tud na pag-eyaꞌ tadun asini tas na lupaꞌ aw ya kanaten pagkamatay, bekeꞌ na pagpakatutuk sa kanaten pagka-utawun. 8Kun utaw pa kitadun, yan ya kanaten tud na basa͡an tadun ya Matas na Pangulu, aw maynan uman kun matay kitadun kabasa͡an uman sakanan. Yanagaw, pangkay utaw pa kitadun aw pangkay matay, ya kanaten Matas na Pangulu yan oloꞌ ya tagtun kanaten. 9Kay yeiy ya du-an na nyatay si Kristu aw nyataw lekat adti pagkamatay pada ma-imoꞌ sakanan Matas na Pangulu sa kadég, pangkay utaw pa silan aw pangkay nyatay da silan.

10Yanagaw, diliꞌ da kamu mag-ukum aw magna-naꞌ sa manga inulug mayu na nyangintu-u. Kay ya kadég tadun un saba mindeg adti asdangan na Tyumanem dun ni allaw na pag-ukum. 11Kay awun pigpasulat asini muna:

“Miglong ya Tyumanem, ‘Asuntu na aku ya Tyumanem na gayed awun, matinaw saba ya piglong ku ini.

Lumuhud ya kadég na manga utaw adti asdangan ku, aw ya kadég nilan magdeyen kanak.’ ”#14:11 Mabasa adti Isayas 45:23.

12Yeiy ya du-an na ya tagsambuksambuk kanaten, un tadun tubagen adti asdangan na Tyumanem ya kadég na kanaten pigpan-imoꞌ.

13Yanagaw, diliꞌ da kitadun mag-ukum sa kanaten eped. Manang yan baling ya betang mayu adti kamayu anenganeng na diliꞌ kamu mag-imoꞌ sa makapasungkul sa pagpangintu-u na kamayu manga inulug.

14Na, asuntu na nyakasambuk da aku sa kanaten Matas na Pangulu na si Jisus, kya-ede-an ku saba na walaꞌ ya pagkanen na makapalipaꞌ sa utaw. Manang kun awun utaw dun ni kamayu na malipaꞌ adti kanan anenganeng ya eped na pagkanen, na, kalipa-an sakanan kun kanen nan yan. 15Aw kun ya pagkan mu yan ya du-an na melled ya ginawa na kanmu inulug, na, dun kita-a na walaꞌ mu sakanan ginawayi. Ya-i pagtumbayan na magkalat ya pagpangintu-u na inulug mu asuntu oloꞌ sa kanmu pagkan, kay sambuk sakanan uman na pigpakamatayan ni Kristu. 16Aw kun awun adti kanmu anenganeng na madyaw mu imo-un, manang adti anenganeng na inulug mu malatay yan, na, madyaw pa na diliꞌ da mu yan pag-imo-un pada walaꞌ ya paglongun nilan na malatay adti kanmu. 17Kay ya pag-eyaꞌ tadun dun ni pagdumala na Tyumanem, diliꞌ da tadun pagbetang sa ginawa kun unu ya pigkan aw ya pig-inem tadun. Manang yan baling ya tibagsegan tadun ya pagdalug sa pagkaliman nan, aw ya pagkasambuk na ginawa adti manga eped, aw ya pagleya na lekat adti Ispiritu Santo. 18Aw pangkay singalan ya dumalug sa pagkaliman ni Kristu, katutukan ya Tyumanem kanan, aw sayaꞌ sakanan na manga utaw.

19Yanagaw naten tibagsegan ya manga imo-unun na makapa-isambuk sa anenganeng tadun, aw ya manga imo-unun na makapasalig sa pagpangintu-u na tagsambuksambuk kanaten. 20Aw diliꞌ mayu pagkalaten ya imo-unun na Tyumanem asuntu oloꞌ sa pagkan. Pangkay ya kadég na kakan alag pigtumbay na Tyumanem, manang diliꞌ madyaw ya pagkan na makapasuway sa pagpangintu-u na kanmu eped. 21Madyaw pa baling na diliꞌ kamu magkan sa unud na ayep aw mag-inem sa bino aw mag-imoꞌ sa imo-unun na makapasungkul sa pagpangintu-u na kamayu inulug.

22Ya pyangintu-uwan mu na umbaꞌ adti kanmu anenganeng, kamu la oloꞌ ya Tyumanem ya maka-edeꞌ san. Madyaw ya kana utaw na walaꞌ pagduwaduwa sa pig-imoꞌ nan. 23Manang ya utaw na awun pagduwaduwa sa pigkan nan, kya-ede-an nan saba na diliꞌ madyaw ya pig-imoꞌ nan. Kay pangkay unu ya pig-imoꞌ na walaꞌ lekat adti pagpangintu-u, salaꞌ yan adti Tyumanem.

Currently Selected:

Roma 14: klgv

Highlight

Compare

Copy