Roma 13

Ya pagka͡agad sa manga migdumala

1Ya kadég mayu na nyangintu-u kan Kristu, pagka͡agadan mayu ya manga utaw na migdumala kamayu. Kay ya katundanan sa pagdumala, lekat saba oloꞌ adti Tyumanem. Aw pigtaligu nan yeiy adti manga utaw na migdumala kamayu. 2Yanagaw, pangkay singalan ya nyatu sa manga migdumala kanan, pig-atuwan nan uman ya Tyumanem. Aw ya manga utaw na nyatu, un saba dumawat sa pa-emel-emel. 3Walaꞌ ya indeganan na utaw mallek sa manga migdumala kun madyaw ya kanan pig-imoꞌ. Ya utaw na mig-imoꞌ sa malatay, yan ya umbaꞌ mallek. Kun kaliman mu na diliꞌ kaw mallek kanilan, pag-imoꞌ kaw sa madyaw aw sayaꞌ kaw saba nilan. 4Ya manga migdumala kamayu, pigtaliguwan silan na Tyumanem pada madyaw ya kamayu pag-eyaꞌ. Manang kun awun utaw adti kamayu na mig-imoꞌ sa malatay, awun indeganan nan mallek kanilan kay awun saba katundanan nilan magpa-emel-emel sa utaw yan. Kay pig-atagan silan na Tyumanem sa katundanan. 5Yanagaw, ka-ilangan mayu ka͡agadan ya manga migdumala kamayu, bekeꞌ oloꞌ na asuntu na nyallek kamu sa pa-emel-emel na Tyumanem manang asuntu na kya-ede-an mayu ya madyaw na umbaꞌ imo-un. 6Yeiy uman ya du-an na magbayad kamu sa manga buwis. Kay ya manga awun katundanan, silan ya pigtaliguwan na Tyumanem sa manga imo-unun yeiy. 7Pangkay unu na buwis na umbaꞌ bayadan, bayadi mayu silan. Pagbasa͡an mayu ya umbaꞌ basa͡an.

Ya pagginawa tadun sa kanaten eped

8Kun awun utang aw beles tadun, maksay naten bayadan. Manang ya sambuk na utang na diliꞌ kabayadan, yan ya paggaginawa͡ay tadun. Kay ya gyuminawa sa eped nan nyakatuman sa kadég na suguꞌ na awun ni Uldin. 9Kay ini ya manga suguꞌ na Tyumanem dun ni Uldin: “Diliꞌ kamu maglakadenen. Diliꞌ kamu magpatay sa eped na utaw. Diliꞌ kamu magtakaw. Diliꞌ kamu magkaybeg sa pametang na eped.” Ya kadég na suguꞌ yeiy aw ya eped pa, nyaluduk da dun ni sambuk na suguꞌ: “Ginawayi ya eped mu kasiling na pagginawa mu sa kanmu pagka-utawun.” 10Kay kun pigginawa͡an tadun ya kanaten eped, diliꞌ tadun imo-an sa malatay. Yanagaw, kun singalan ya gyuminawa sa eped nan, yan ya utaw na nyakatuman da sa kadég na suguꞌ dun ni Uldin.

11Imo-a mayu ya kadég na piglong ku kamayu, kay kya-ede-an mayu na yeiy ya allaw na umbaꞌ da kamu magmata lekat adti kamayu pagpakatulug. Kay malapit da ya pagkalingeb na kanaten pagpakaluwaꞌ kay sa dun na bagu pa kitadun nyangintu-u. 12Malapit da matigkas ya pag-eyaꞌ tadun asini tas na lupaꞌ kay malapit da ya pagdateng ni Kristu. Kasiling na gabi na un da dumateng ya paka͡allawunun. Yanagaw, botonan tadun ya manga imo-unun na malatay kasiling na pag-imo-un na manga utaw na awun ni kangitngitan. Aw naten sutun ya pagkanaꞌ na kalalamdag kasiling na pagkanaꞌ na sundalu pada mabatug tadun degen ya paggaway ni Satanas. 13Yanagaw talana pa tadun nyeyaꞌ asini tas na lupaꞌ, naten imo-un ya manga madyaw na imo-unun na umbaꞌ sa manga utaw na awun da ni kalalamdag. Diliꞌ tadun silingan ya pag-imo-un na utaw na pala-inem aw utaw na mig-imoꞌ sa pangkay unu na to-o malatay. Diliꞌ kitadun magkasala-enen aw mag-imoꞌ sa makamulamula͡ay. Diliꞌ kitadun magpanubbuk sa ayil, aw diliꞌ kitadun mag-ingaꞌ sa eped. 14Manang pagagadan mayu baling ya kamayu pagka-utawun kan Jisu-Kristu na kanaten Matas na Pangulu, aw diliꞌ da mayu pagbetang adti kamayu anenganeng ya pagdalug sa pagkaliman na pagka-utawun mayu adti pag-imoꞌ sa malatay.

Currently Selected:

Roma 13: klgv

Highlight

Compare

Copy