Popular Bible Verses from Roma 12

Share

Diliꞌ mayu pagsilingan ya bet na manga utaw na walaꞌ pangintu-u sa Tyumanem. Manang pabaguwan baling sa Tyumanem ya kamayu anenganeng pada ka-ede-an mayu ya tengteng pagkaliman nan, aw kalabetan mayu kun unu ya madyaw aw ya makatutuk kanan, aw kun unu ya umbaꞌ imo-un.

Yanagaw, kay manga inulug, asuntu sa kadakulaꞌ na kallat na Tyumanem, manginayuꞌ aku na imo-un mayu ya kamayu pagka-utawun kasiling na dugsuꞌ na yan ya tengteng pagsimba sa Tyumanem. Walaꞌ aku paglong na patayen mayu ya kamayu pagka-utawun, manang tumbayan mayu baling adti kanan ya kadakulaꞌ na kamayu pagka-utawun pada taniyen na un makatutuk kanan.

Pagleya kamu talana mayu tyumagad sa kadég na pigpalpa na Tyumanem kamayu. Ti-isa mayu ya manga kalugan na dumateng kamayu. Aw panawagtawag kamu gayed adti Tyumanem.

Diliꞌ mayu paggagaden ya ginawa mayu adti pagmalit na yan ya dumeg kamayu, manang pakadyawa mayu baling ya utaw na migpakalat kamayu pada degen mayu ya malatay.

Maggaginawa͡ay ya kadég mayu kay mangkaylug kamu saba dun ni kan Kristu. Diliꞌ mayu pag-olo-un ya kamayu pagka-utawun, manang pagbabasa͡ay kamu baling.

Diliꞌ kamu magtallalingu dun ni kamayu paggaginawa͡ay. Kele͡an mayu ya malatay. Aw gayed tibulluka ya pag-imoꞌ sa madyaw.

Taman na mabatug mayu, tibagsegi na awun kalinaw mayu adti kadég na manga utaw.

Kay manga inulug ku na kanak pigginawa͡an, diliꞌ kamu magmalit sa utaw na migpakalat kamayu. Manang tumbayan mayu baling silan adti kadaman na Tyumanem. Kay awun pigpasulat na Tyumanem asini muna, law nan: “Aku ya magmalit. Aku ya magpa-emel-emel sa manga utaw na migpakalat kamayu.”

Diliꞌ kamu magkataka. Pagkaseb kamu aw tibulluka ya kamayu anenganeng dun ni imo-unun na Tyumanem.

Na, asuntu sa katundanan na pig-atag kanak na Tyumanem, paglongun ku ya kadég mayu: Diliꞌ kamu mag-anenganeng na to-o pa kaw madyaw kay sa eped mayu. Manang anenganengen mayu baling na ya tagsambuksambuk kamayu awun katadeng na pig-atag na Tyumanem na umbaꞌ sa kanan pagpangintu-u.

Kun awun utaw na mag-imoꞌ sa malatay adti kamayu, diliꞌ kamu magbalus kanilan. Aw pangkay unu ya madyaw na imo-unun na diliꞌ pagsala-en, yan ya imo-a mayu.

Pagsambuka ya anenganeng mayu. Diliꞌ kamu magpatastas sa kamayu pagka-utawun manang pagpa-iyeped kamu baling sa manga utaw na madalem ya pagpakabetang. Diliꞌ kamu mag-anenganeng na matas pa ya kamayu katadeng kay sa kamayu eped.

Manang ini baling ya madyaw mayu imo-un: “Kun magetem ya po-on mu, pakana sakanan. Kun talaynemen, pa-inema sakanan. Aw magi sa pig-imoꞌ mu, kamulamula͡an nan ya pig-imoꞌ nan na malatay kanmu.”

Panawagtawag kamu sa Tyumanem na pakadyawun nan ya manga utaw na nyamulayam kamayu, aw diliꞌ mayu pagpanawagtawagan na tullunun nan silan. Kun awun eped mayu na migleya, agad kamu sa pagleya nilan. Kun awun eped mayu na migkalat ya ginawa, agad kamu uman dun ni pagkalat na ginawa nilan.

Kun awun kapelek na manga mangintu-uway, kamu ya magtabang kanilan. Aw kun awun maka-ibwang adti kamayu, sanggila-a mayu silan.

Kay kasiling na lawas na utaw, awun madég na punganan aw walaꞌ pag-unawa ya manga imo-unun nilan. Maynan uman kitadun na manga mangintu-uway, pangkay madég kitadun, manang sambuk da kitadun na lawas dun ni pagpakasambuk tadun kan Kristu.