Pigbukasan 16

Ya pitu ya kayapung na pigseledan sa kadaman na Tyumanem

1Aw awun dyengeg ku na to-o dakulaꞌ na tingeg na lekat adti Témplo na awun ni tas na langit na miglong adti pitu ya anghil, “Na! Asagan da mayu adti tas na lupaꞌ ya adti seled na pitu ya kayapung na nyatmuꞌ na kadaman na Tyumanem.”

2Yanagaw, ya tagnaꞌ na anghil, pig-asag nan adti tas na lupaꞌ ya awun ni seled na kanan kayapung. Aw ya manga utaw na migpamarka sa marka na tagnaꞌ na ayep aw migsimba sa inutaw nan, alag silan dyatengan na madég na paliꞌ na to-o masakit aw matumboꞌ.

3Aw ya kadwa na anghil, pig-asag nan adti dagat ya awun ni seled na kanan kayapung. Aw ya tubig migbaluy lipanug na kasiling na duguꞌ na utaw na nyatay. Aw ya kadég na tagbanwa na dagat, alag nyangkamatay.

4Aw ya katlu na anghil, pig-asag nan ya awun ni seled na kayapung nan dun ni manga tyugbulan na tubig aw manga gangaꞌ na tubig, aw migbaluy duguꞌ ya tubig. 5Aw dyengeg ku ya tingeg na anghil na migtungguꞌ sa tubig, law nan, “Kay Tyumanem na walaꞌ ya salaꞌ, walaꞌ ya kanmu pagka-uman lekat pa asini muna taman adun, aw ya kanmu pagbayaꞌ alag saba matinaw. 6Pigpa-ilig nilan ya duguꞌ na kanmu manga utaw aw ya manga propita mu. Yanagaw ikaw ya magmalit kanilan, kay yeiy ya umbaꞌ sa pig-imoꞌ nilan.”

7Aw awun pa uman dyengeg ku na tingeg na lyumekat adti dalem na sunuganan sa insénso, law nan, “Kay Tyumanem na migdumala sa kadég, umbaꞌ aw matinaw saba ya kanmu pagbayaꞌ.”

8Aw ya kapat na anghil, pig-asag nan dun ni sega ya awun ni seled na kanan kayapung. Aw pigtumbay adti sega ya to-o pagkapasuꞌ, aw to-o nyangkalusu ya manga utaw. 9Aw asuntu na nyangkalusu silan, yanagaw pigtullun nilan ya ngalan na Tyumanem, kay yan ya migpadala sa pagamak yeiy adti kanilan. Manang kenneꞌ na walaꞌ silan pagselsel aw walaꞌ silan pagdeyen kanan.

10Aw ya kalima na anghil, pig-asag nan dun ni trunu na tagnaꞌ na ayep ya awun ni seled na kanan kayapung. Aw ya kadakulaꞌ na kasakupan nan to-o migkangitngit. Aw gayed nyanpanakmel ya manga utaw kay to-o silan migti-is sa kasakit. 11Aw gayed nilan pigtullun ya Tyumanem na awun ni tas na langit asuntu sa kasakit na manga pegsa dun ni manga lawas nilan. Manang kenneꞌ na walaꞌ silan pagselsel sa malatay na manga imo-unun nilan.

12Aw ya ka͡enem na anghil, pig-asag nan dun ni dakulaꞌ na gangaꞌ na tubig na Yupratis ya awun ni seled na kayapung nan. Aw dayaw kyatiyan ya Yupratis pada maka-agi ya manga hariꞌ na lekat adti silatan. 13Aw awun kyinitaꞌ ku na tulu ya malatay na ispiritu na iman mu aw ambak. Lyumuwaꞌ ya sambuk lekat adti bakaꞌ na ulud, aw ya sambuk lekat adti bakaꞌ na tagnaꞌ na ayep, aw ya sambuk uman lekat adti bakaꞌ na kadwa na ayep na yan ya propita na galu-un.#16:13 Ya ulud yeiy, yan si Satanas. Aw ya tagnaꞌ na ayep, po-on uman ni Kristu. Aw ya kadwa na ayep, yan ya propita na galu-un na gayed dyumalug sa pagkaliman na tagnaꞌ na ayep. 14Ya tulu ya malatay na ispiritu yeiy, alag silan busaw, aw nyaka-imoꞌ silan sa manga pangilala magi sa kanilan katulus. Aw nyadtu silan ni manga hariꞌ na migdumala asini kadakulaꞌ na banwa. Kay ya tud nilan, yan ya pagtipun sa madég na manga sundalu na manga hariꞌ pada tanamen nilan ya Tyumanem. Manang dun ni allaw yan degen silan na Tyumanem na migdumala sa kadég.

15Pakanyegi mayu ya piglong ni Jisu-Kristu, law nan, “Ya paglikuꞌ ku kasiling na matakaw. Madyaw ya kana utaw na magpakatanaw sa unu ya un dumateng aw dadan da syumut sa kadégkadég nan. Kay ya utaw na walaꞌ pakatagilan, yan ya mamulamula adti asdangan na manga utaw.”

16Aw pigtipun na manga malatay na ispiritu ya manga hariꞌ adti sambuk na banwa na pigngalanan na Armagédon adti tingeg na Hibriyu.

17Aw ya kapitu na anghil, pig-asag nan adti dalem na langit ya awun ni seled na kayapung nan. Aw awun dyengeg ku na to-o dakulaꞌ na tingeg na lekat adti trunu dun ni Témplo na awun ni tas na langit, law nan, “Nyatigkas da ya kadég!” 18Aw tigkan nyangkalablab ya kilat, aw migdadaneg aw kya-agadan na dalakalak. Aw awun to-o mabagseg na linug na walaꞌ pa lemena na manga utaw ya maynan asini tas na lupaꞌ. 19Ya dengganen na syudad dayaw nyatengaꞌ na katulu. Aw nyangkagettan uman ya manga syudad na manga nasud. Aw walaꞌ kalingawi na Tyumanem na pa-emel-emelen ya manga utaw na nyeyaꞌ adti Babiloniya. Manang pigpa-inem nan silan baling sa palangad bino dun ni seled na tabuꞌ na yeiy ya kadaman na Tyumanem. 20Ya kadég na puluꞌ na dagat, walaꞌ da kita-a, aw maynan uman ya manga buntud. 21Aw pigpa-ulanan ya manga utaw na ayis na kasiling na kabaklaꞌ na batu na tag kalima͡an (50) ka kilo. Aw pigtullun baling nilan ya Tyumanem asuntu sa manga batu na ayis. Kay to-o dakulaꞌ ya pyagamak yan.

Currently Selected:

Pigbukasan 16: klgv

Highlight

Copy

Compare