Pigbukasan 17
17
Ya ka͡ubayan na magkasala-enen aw ya ayep na mapula
1Pagkatigkas na pitu ya anghil mig-asag sa awun ni seled na kayapung nilan, ya sambuk kanilan dyumulud kanak aw miglong, “Kadi kaw! Pakitaꞌ ku kanmu ya pagpa-emel-emel sa ka͡ubayan na to-o madengeg asuntu sa manga pagkasala-enen nan. Nyingkud sakanan adti palangad trunu nan aw pigdumala͡an nan ya madég na manga tubig.#17:1 Adti anenganeng na eped na manga utaw na to-o matadeng, ya palabet asini sa ka͡ubayan, yan ya syudad na Roma. Dun ni manga allaw na pagsulat ni Juan seiy, madég ya manga nasud na pigdumala͡an na Roma. Aw madég ya pigpamulayaman nilan na manga mangintu-uway sa Tyumanem aw madég uman kanilan ya pigpamatay. 2Migkasala-enen kanan ya madég na manga hariꞌ asini tas na lupaꞌ. Aw nyabuyu nan ya manga utaw adti imo-unun na malatay, aw kasiling silan na nyalangulangu na inemenen.”
3Pagkatigkas yan, awun pigpakitaꞌ kanak na Ispiritu Santo kasiling na tagaynep: Pigpa-agad aku na anghil adti kaligbinan. Aw awun kyinitaꞌ ku na ka͡ubayan na nyingkud adti tas na ayep na to-o kallekanan. Mapula ya lawas na ayep, aw pitu ya ulu nan aw sampuluꞌ ya suwag. Aw dun ni kadakulaꞌ na lawas nan awun nyakasulat na tingeg na malatay adti Tyumanem. 4Aw migkadégkadég ya ka͡ubayan sa batek na tapel kasiling na pagsutun na hariꞌ, aw mapula, aw syumut uman sakanan sa pagkanaꞌ na bulawan, aw pérlas, aw manga eped na batu na to-o dakulaꞌ ya alagaꞌ. Aw awun pig-awidan nan na tabuꞌ na bulawan na nyatmuꞌ na pagkasala-enen nan na to-o malatay. 5Aw awun ngalan na nyakasulat dun ni bayuꞌ nan na pigtaguꞌ ya kakawasan. Aw ini ya nyakasulat dun: “Ya Babiloniya,#17:5 Ya palabet na Babiloniya asini, yan ya syudad na Roma. yeiy ya syudad na to-o dengganen. Yeiy ya ina na madég na ka͡ubayan na magkasala-enen, aw yeiy uman ya lyekatan sa kadég na malatay asini tas na lupaꞌ.” 6Aw ya ka͡ubayan yeiy kyinitaꞌ ku na nyalangulangu asuntu sa duguꞌ na manga mangintu-uway kan Jisus na pigpamatay.
Aw sa pagkitaꞌ ku kanan, to-o aku nyabelengbeleng. 7Manang miglong ya anghil kanak, “Anangaꞌ kaw mabelengbeleng sa kyinitaꞌ mu? Pa-edeꞌ ku kanmu ya kakawasan na pigtaguꞌ sa ka͡ubayan yeiy, aw ya ayep na pig-ingkudan nan na awun pitu ya ulu aw sampuluꞌ ya suwag. 8Ya ayep na kyinitaꞌ mu, awun ginawa nan idtu muna, manang adun walaꞌ da sakanan kita-a. Aw dumateng ya allaw na lumuwaꞌ sakanan lekat adti gawang na walaꞌ ya katantanan. Manang pagkatigkas yan, pa-emel-emelen sakanan na walaꞌ ya tyamanan. Kita-en sakanan na manga utaw na walaꞌ ya ngalan nilan dun ni libru na pigsulatan sa manga nyakatagtun sa ginawa na walaꞌ ya katigkasan. Na, ya libru yeiy pig-imoꞌ da dadan sa walaꞌ pa ka-imoꞌ ya kadakulaꞌ na banwa. Sa pagkitaꞌ nilan sa ayep yeiy, ma-enneng-enneng silan kay asini muna utaw pa sakanan aw nyatay, manang magpakitaꞌ pa uman sakanan salut.
9“Yanagaw ka-ilangan ya katadeng pada kalabetan ya ini: Ya pitu ya ulu, yeiy ya pitu ya buntud na pig-ingkudan na ka͡ubayan yan. Aw ya sambuk uman na kakawasan nan, yan ya pitu ya hariꞌ. 10Ya lima ya hariꞌ walaꞌ da silan, manang ya sambuk tolobo pa sakanan migdumala. Aw ya kapitu na hariꞌ un pa dumateng, manang diliꞌ madugay ya pagdumala nan. 11Ya ayep na kyinitaꞌ mu idtu manang walaꞌ da kita-a adun, yeiy saba ya kawalu na hariꞌ, manang masiling sakanan sa pitu ya hariꞌ. Aw ya datengan nan, pa-emel-emelen uman sakanan na walaꞌ ya tyamanan.
12“Aw ya sampuluꞌ ya suwag na kyinitaꞌ mu, yan ya sampuluꞌ ya hariꞌ na walaꞌ pa atagi sa pagdumala sa kanilan manga kasakupan. Manang sa pag-ingkud da nilan, sangka-udas oloꞌ ya pagdumala nilan eped na tagnaꞌ na ayep. 13Magkasambuk ya anenganeng nilan na tumbay adti tagnaꞌ na ayep ya kanilan katundanan sa pagdumala sa manga kasakupan nilan dala ya kabatug nilan. 14Aw mag-imoꞌ silan sa tanam adti Nati na Karniro. Manang degen nan silan, kay ya Nati na Karniro yan ya Matas na Pangulu sa kadég na manga pangulu aw ya Hariꞌ sa kadég na mighariꞌ. Ya manga mangintu-uway na pigtawag aw pigpamalliꞌ da nan kasaligan silan, aw silan ya eped nan tumanam.”
15Migpadeleg ya anghil miglong kanak, “Ini ya kakawasan na kyinitaꞌ mu sa manga tubig na pig-ingkudan na ka͡ubayan na migkasala-enen: Ya manga tubig, yan ya manga utaw na lekat adti kadég na nasud aw miglong sa kadég na punganan na tingeg. 16Aw ya sampuluꞌ ya suwag na pigkitaꞌ mu, yan ya sampuluꞌ ya hariꞌ. Ya kadég nilan aw ya tagnaꞌ na ayep, dumutan nilan ya ka͡ubayan na migkasala-enen. Yanagaw pangamangen nilan ya kadég na pametang nan aw dayaw nilan palluwasan taman na walaꞌ da ya masamaꞌ dun ni lawas nan. Aw tigkas yan, badasan nilan kanen ya unud na ka͡ubayan yan aw sangaben nilan ya masamaꞌ. 17Kay pigbetang na Tyumanem adti anenganeng na manga hariꞌ na magkasambuk silan na un magtumbay adti tagnaꞌ na ayep sa pagdumala sa manga sakup nilan mendaꞌ na matuman ya piglong na Tyumanem.
18“Aw ya ka͡ubayan na kyinitaꞌ mu, yan ya dengganen na syudad na migdumala sa manga hariꞌ asini kadakulaꞌ na banwa.”
Currently Selected:
Pigbukasan 17: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
