Pigbukasan 15

Ya kamoliyan na manga pagamak na un asag na pitu ya anghil

1Pagkatigkas yan, awun pa uman sambuk na pangilala na kyinitaꞌ ku adti langit na to-o makapa-enneng-enneng. Awun pitu ya anghil na un dumala sa pitu ya pagamak. Aw yeiy da ya kalingeban sa kadaman na Tyumanem.

2Pagkatigkas yan, kyinitaꞌ ku ya linaw na kasiling na dagat na to-o matinaw na awun laga na atulun. Aw nyindeg dun ni ligad na linaw ya manga mangintu-uway na dyumeg sa tagnaꞌ na ayep. Walaꞌ silan pagsimba sa kanan inutaw, aw walaꞌ silan pagpamarka sa ngalan nan. Aw kyinitaꞌ ku silan na nyan-awid sa manga arpa pada deyen ya Tyumanem. 3Aw pigdalangan nilan ya dalangan ni Moysis na sugu-anen na Tyumanem. Aw yan uman ya dalangan sa pagpamasa sa Nati na Karniro. Aw ini ya dalangan nilan:

“Kay Tyumanem na migdumala sa kadég,

to-o saba madyaw ya manga pigpan-imoꞌ mu!

Ikaw ya hariꞌ sa manga nasud, aw ya kanmu pagbayaꞌ alag matinaw.

4Singalan kaꞌ ya diliꞌ mallek kanmu kay Matas na Pangulu?

Aw singalan uman ya diliꞌ magdeyen sa kanmu ngalan?

Kay walaꞌ ya salaꞌ dun ni kanmu.

Yanagaw, dumulud kanmu ya madég na manga utaw lekat adti kadég na manga nasud, aw magsimba silan kanmu,

kay pigpakitaꞌ da mu adti kanilan ya kanmu pagbayaꞌ na alag matinaw.”

5Pagkatigkas yan, kyinitaꞌ ku na kya-uwangan ya Témplo na Tyumanem na awun ni tas na langit. Aw yeiy uman ya pigbetangan sa kaban na pigdayawan sa pigsulatan sa pakang na Tyumanem. 6Aw lyumuwaꞌ lekat dun ya pitu ya manga anghil aw dyumala sa pitu ya pagamak. Migkadégkadég silan sa to-o maputiꞌ. Aw awun pigsalay nilan na pig-imoꞌ lekat adti bulawan. 7Pagkatigkas yan, ya sambuk na lekat adti upat ya sangkamuluꞌ na pig-imoꞌ na Tyumanem, pig-atagan nan ya pitu ya anghil sa pitu ya kayapung na bulawan. Aw ya manga kayapung alag nyangkatmuꞌ na kadaman na Tyumanem, na yan ya Tyumanem na walaꞌ ya tyamanan. 8Aw ya Témplo na awun ni tas na langit nyatmuꞌ na ebel na yan ya pangilala na to-o matulus ya Tyumanem. Yanagaw walaꞌ ya makaseled kun diliꞌ matigkas ya pitu ya pagamak na manga anghil adti manga utaw.

Currently Selected:

Pigbukasan 15: klgv

Highlight

Copy

Compare