Pigbukasan 12

Ya ka͡ubayan aw ya ulud

1Aw awun pangilala adti langit na to-o makapa-enneng-enneng. Awun kyinitaꞌ ku na ka͡ubayan na nyaputus na kalalamdag na sega, aw apit adti siki nan ya bulan. Aw dun ni ulu nan awun korona na sampuluꞌ tag duwa (12) ya bitun. 2Pigpetesan sakanan, aw mig-ulangag asuntu na to-o migti-is.

3Awun pa uman sambuk na pangilala dun ni langit na yan ya to-o dakulaꞌ na ulud.#12:3 Adti eped na pag-ubad: dragon. Aw ya ulud na pigkasampetan asini, yan ya pundinganan sa bet ni Satanas. Mapula ya imbis nan aw awun pitu ya ulu aw sampuluꞌ ya suwag nan. Adti tagsambuksambuk na ulu nan awun korona. 4Aw piglabet na ikug nan ya katluwan tag tulu (33) ka porsinto ya manga bitun dun ni langit aw nyangkolug silan adti lupaꞌ. Aw nyindeg ya ulud adti asdangan na ka͡ubayan na pigpetesan pada pagka͡utaw na iseꞌ kanen nan. 5Aw kya͡utawan ya ka͡ubayan sa iseꞌ nan na eseg. Pagka͡utaw na iseꞌ yeiy, walaꞌ sakanan kana na ulud asuntu na maksay sakanan pigsakmit aw pigdala adti trunu na Tyumanem. Kay ya iseꞌ yeiy, yan ya un magdumala sa manga nasud aw walaꞌ ya makadeg kanan. 6Aw ya ka͡ubayan na mig-iseꞌ, nyalaguy adti kaligbinan kay awun banwa na pigtagilan dadan na Tyumanem na un nan eya-an, pada sanggila-en aw tamengan sakanan seled na sammalalan aw duwanggatus aw ka͡eneman (1,260) ka allaw.

Ya dakulaꞌ na tanam adti tas na langit

7Na, awun dakulaꞌ na tanam adti tas na langit. Si Migél aw ya sakup nan na manga anghil, pigtanam nilan ya ulud. Aw tyumanam uman kanilan ya ulud eped nan ya kanan manga anghil. 8Manang pigdeg ya ulud aw manga anghil nan. Yanagaw walaꞌ da kanilan tumbayan na meyaꞌ adti tas na langit. 9Aw pig-agbel silan adti lupaꞌ. Na, ya ulud yeiy, yan saba ya Busaw na si Satanas na miggaway sa utaw asini muna. Aw lekat dun ni manga allaw yan, gayed da nan paggawayan ya kadég na manga utaw.

10Aw dyumengeg aku sa dakulaꞌ na tingeg na lekat adti tas na langit na miglong, “Dyumateng da ya allaw na nyalingeb da ya pagpaluwaꞌ na kanaten Tyumanem sa manga utaw magi sa katulus nan, aw pigdumala͡an nan ya kanan kasakupan. Aw ya Misiyas na pigpadala nan, pig-atagan da nan uman na katundanan sa pagdumala. Kay pig-agbel da ya magbintangay sa manga inulug tadun na nyangintu-u. Allaw aw gabi gayed nan silan pigbintangan adti asdangan na Tyumanem tadun. 11Manang dyeg nilan ya po-on tadun magi sa duguꞌ na pigpa-ilig na Nati na Karniro adti krus, aw magi uman sa pagpa-edeꞌ nilan sa Madyaw na Ubat-ubat kan Jisus. Walaꞌ nilan ginawayi ya kanilan pagka-utawun, manang pigpadeleg nilan ya pagdalug sa pagkaliman na Tyumanem pangkay pa adti pagkamatay. 12Yanagaw pagleya kamu na manga asini tas na langit! Manang kamu na nyeyaꞌ dun ni lupaꞌ aw adti dagat, malatay saba ya un mayu datengan! Kay adtu la si Satanas aw to-o sakanan nyadaman, kay kya-ede-an da nan na dakman tagbiꞌ ya nyasamaꞌ na manga allaw nan.”

13Aw sa pagka-edeꞌ na ulud na pig-agbel da sakanan adti tas na lupaꞌ, pigdalug nan ya ka͡ubayan na kya͡utawan da sa iseꞌ nan na eseg. 14Manang walaꞌ nan kasabi, kay pig-atagan ya ka͡ubayan na duwa ya mabaklaꞌ na panid kasiling na malambegek pada makalupad sakanan pasinan adti kaligbinan na dadan da pigtagilan kanan na Tyumanem pada tamengan aw sanggila-en sakanan seled na sammalalan aw duwanggatus aw ka͡eneman (1,260) ka allaw. 15Sa pagka-edeꞌ da na ulud na diliꞌ nan kasaban ya ka͡ubayan, yanagaw dyumuppu sakanan sa dakulaꞌ na tubig aw nyuntul ya baꞌ pasinan adti ka͡ubayan pada manud sakanan. 16Manang pigtabangan na lupaꞌ ya ka͡ubayan. Mignganga ya lupaꞌ aw pigseyep nan ya tubig na pigduppu na ulud. 17Yanagaw to-o pa nyadaman ya ulud adti ka͡ubayan, aw mig-imoꞌ ya ulud sa dakulaꞌ na tanam adti manga nyasamaꞌ na manga buwadbuwad na ka͡ubayan. Kay silan ya dyumalug sa manga suguꞌ na Tyumanem aw migpa-edeꞌ sa Madyaw na Ubat-ubat kan Jisus adti manga utaw. 18Aw nyindeg ya ulud adti pantad dun ni dulug na dagat.

Currently Selected:

Pigbukasan 12: klgv

Highlight

Copy

Compare