Pigbukasan 11

Ya pagdateng na duwa ya propita

1Pagkatigkas yan, pig-atagan aku na sasukud na kasiling na bangkaꞌ. Aw miglong ya nyatag kanak, “Kadtuwi ya Balay na Tyumanem aw ya dugsu-anan na awun ni Témplo aw sukuda. Aw iyapa uman ya kadég na nyampanimba dun. 2Manang ya-i pagsukuda ya pamanag na adti luwaꞌ na Témplo kay pigtumbay da adti madég na nasud na manga Héntil. Sulungun nilan ya syudad na Jérusalim na pigtani na Tyumanem, aw seled na kapatan tag duwa (42) ya bulan un nilan lipa-an ya kadakulaꞌ na syudad. 3Aw ya duwa ya propita ku, un ku silan atagan sa katundanan maglong sa un ku pa-edeꞌ kanilan. Seled na sammalalan aw duwanggatus aw ka͡eneman (1,260) ka allaw ya pag-ubat-ubat nilan, aw gayed silan sumut sa kayab na saku.”#11:3 Ya du-an na syumut ya duwa ya propita sa kayab na saku, kay yan ya pangilala na un pa-emel-emelen ya manga utaw kun diliꞌ silan magselsel.

4Na, ya duwa yeiy, kasiling silan na duwa ya kawuy na olibo aw kasiling uman na duwa ya saleng na pigpa-indeg adti asdangan na Matas na Pangulu sa kadakulaꞌ na banwa.#11:4 Asini muna, ya lana na olibo, yan ya paggamiten adti salengan. Aw kun sumiga la ya saleng, ka-ilawan da ya mangitngit. Aw maynan uman, ya Ispiritu Santo na awun ni duwa ya propita yeiy maka-ilaw sa anenganeng na manga utaw. 5Aw kun awun magpakalat kanilan, awun laga na lumuwaꞌ adti bakaꞌ nilan aw mangkasangab ya manga po-on nilan. Aw dun da kamatay ya pangkay singalan na malim magpakalat kanilan. 6Awun katulus nilan magtagen sa ulan pada diliꞌ maka-ulan dun ni manga allaw na mag-ubat-ubat silan sa un pa-edeꞌ na Tyumanem, aw mabatug nilan uman ya tubig imo-un duguꞌ. Aw mabatug nilan pakelegan ya kadakulaꞌ na banwa sa madég na punganan na pagamak, pangkay kinunu ya kaliman nilan.

7Sa pagkatigkas nilan mag-ubat-ubat adti manga utaw, awun lumuwaꞌ na ayep na to-o kallekanan lekat adti gawang na walaꞌ ya katantanan. Aw tanamen nan ya duwa ya propita aw degen nan aw patayen nan silan. 8Aw ya kanilan lawas mangkalugatang dun ni dalan na syudad na madengeg na dun kalabuwi ya kanaten Matas na Pangulu na si Jisus adti krus. Ya syudad yeiy pigpa-unawa sa Sodoma aw Ihiptu asuntu na malatay ya bet na manga utaw na mig-eyaꞌ dun. 9Seled na tulungallaw aw tengaꞌ, ya lawas nilan inunuwun na manga utaw na lekat adti madég na nasud, aw madég na tribu na maglong sa madég na punganan na tingeg. Aw diliꞌ silan malim tumbay na lebeng ya lawas na duwa ya propita yeiy. 10To-o magleya ya manga utaw na asini tas na lupaꞌ. Aw mag-imoꞌ silan sa dakulaꞌ na katipun aw magsi-atag-atagay silan asuntu sa pagkamatay na duwa ya propita na Tyumanem. Kay adti kanilan anenganeng, ya duwa yeiy, silan ya dyumala sa pagti-is asini tas na lupaꞌ.

11Manang sa paglabay da na tulungallaw aw tengaꞌ, mataw silan lekat adti pagkamatay, kay atagan silan na Tyumanem sa ginawa, aw magbangun silan. Aw to-o mallek ya manga utaw na kumitaꞌ sa pagkataw nilan. 12Pagkatigkas yan, dumengeg ya duwa yeiy sa dakulaꞌ na tingeg lekat adti tas na langit na maglong, “Panik kamu adi!” Aw ma-engat silan adti labun pasinan adti tas na langit, aw tandawan silan na kanilan manga po-on. 13Aw yan na udas maglinug to-o na mabagseg. Aw mangkagettan ya sampuluꞌ ka porsinto ya manga balay dun ni syudad. Aw pitummalalan (7,000) ya utaw na mangkamatay. Manang ya manga eped na diliꞌ mangkamatay, to-o silan mangkallek. Aw ya un sampetan, deyen nilan ya Tyumanem na awun ni tas na langit.

14Pagkatigkas da na kadwa na pyagamak na to-o kallekanan, awun pa uman katlu na dumadateng.

Ya pag-eyep sa kapitu na trumpita

15Pagkatigkas yan, pig-eyep na kapitu na anghil ya trumpita nan. Aw awun madég na dakulaꞌ na tingeg na lyumekat adti tas na langit. Aw miglong silan, “Pigsayuwan da ya pagdumala asini tas na lupaꞌ, aw yan da ya Matas na Pangulu ya kanaten Tyumanem aw ya Misiyas na pigpadala nan. Aw ya paghariꞌ nan, walaꞌ ya tyamanan!” 16Aw ya kaluwa͡an tag upat (24) ya magdadumala͡ay na nyingkud adti asdangan na trunu na Tyumanem, lyumuhud silan aw pigsimba nilan sakanan, 17aw miglong silan,

“Kay Tyumanem na migdumala sa kadég,

walaꞌ ya pagka-uman mu pangkay adun aw pangkay asini muna.

Dakulaꞌ to-o ya kanami pagpasalamat kanmu.

Ikaw ya tyumakmag sa kadég,

aw migpalekat da ya kanmu paghariꞌ.

18Nyadaman to-o ya manga nasud, asuntu na un da dumateng ya pagpa-emel-emel mu kanilan.

Aw adun ya allaw na magpalekat da ya pag-ukum sa manga nyangkamatay na walaꞌ pangintu-u kanmu.

Aw yeiy da uman ya allaw na awun madawat na kanmu manga sugu-anen umbaꞌ sa manga pigpan-imoꞌ nilan: Yeiy ya manga propita, aw ya kadég na kanmu manga utaw, aw ya manga nyamasa kanmu, pangkay mangkalangkaw silan aw pangkay tagituꞌ.

Manang yeiy da saba uman ya allaw na apnasen mu ya manga utaw na migkalat sa kadakulaꞌ na banwa.”

19Pagkatigkas yan, adti tas na langit, kya-uwangan ya Témplo na Tyumanem, aw pagkita-en da ya kaban na pigdayawan sa pigsulatan sa pakang na Tyumanem. Aw nyangkalablab ya kilat aw kya-agadan na dadaneg aw dalakalak. Awun mabagseg na linug, aw biglaꞌ nyulan na ayis na kasiling na mangkabaklaꞌ na batu.

Currently Selected:

Pigbukasan 11: klgv

Highlight

Copy

Compare