Pilipos 2

Ya pagpadalem ni Kristu Jisus yan ya madyaw na pundinganan

1Na, kya-ede-an ku na pigpakabagseg da ya kamayu ginawa asuntu sa pagpakasambuk da mayu kan Kristu, aw piglala kamu na dakulaꞌ na pagginawa nan, aw pigsambuk da na Ispiritu Santo ya anenganeng na kadég mayu, aw migkakallatay ya kadég mayu. 2Yanagaw, lingeba mayu ya kanak pagleya magi sa kamayu paggaginawa͡ay aw ya pag-isambuk na kamayu ginawa. Aw pa-unawa͡a ya tud na kadég mayu. 3Diliꞌ mayu pag-imo-un ya pangkay unu na makapagkalat sa kamayu paggaginawa͡ay asuntu oloꞌ sa pagpatastas mayu sa kamayu pagka-utawun. Manang pagpadalem kamu baling aw yan ya una͡en mayu ya eped na utaw. 4Aw ya tagsambuksambuk kamayu, diliꞌ mayu pag-olo-un ya kamayu pagkaliman, manang pagbetangan uman adti anenganeng mayu ya pagpakabetang na kamayu manga eped.

5Tibagsegi mayu na kasilingan ya anenganeng ni Kristu Jisus. 6Pangkay tengteng Tyumanem sakanan, manang walaꞌ nan anenganenga ya kanan pagka Tyumanem. 7Pigpadalem nan baling ya kanan pagka-utawun aw pigsilingan nan ya bet na sugu-anen. Migka-utaw sakanan kasiling naten. 8Aw sa pagka-imoꞌ nan utaw, migpadalem sakanan na un matuman ya kadég na tud na Tyumanem kanan dala ya pagkalabu kanan adti krus na yan ya pagkamatay na to-o makamulamula͡ay. 9Yanagaw pigpatas sakanan na Tyumanem aw pig-atag kanan ya ngalan na to-o matas kay sa kadég na manga ngalan, 10pada deyen sakanan na kadég na utaw. Kay ya kadég na awun ni tas na langit aw ya kadég na asini tas na lupaꞌ, aw pangkay ya manga nyangkamatay, alag silan lumuhud dun ni asdangan nan na un magsimba kanan. 11Aw ya kadég nilan alag maglong na si Jisu-Kristu ya Matas na Pangulu, aw dun da nilan deyenan ya Tyumanem na yan ya Ama.

Ya mangintu-uway kasiling na saleng na syumiga asini tas na lupaꞌ

12Na, kay manga inulug na kanak pigginawa͡an, kya-anenganengan ku ya idtu muna na dun pa aku ni tampid mayu, na gayed mayu pigdalug ya pigpalna-u ku kamayu. Yanagaw, to-o mayu tibagsegi ya pagdalug seiy, labi la na walaꞌ da aku dun ni sayid mayu. Padelega mayu ya manga imo-unun na madyaw na awun pagkallek sa Tyumanem, kay yan ya umbaꞌ sa utaw na pigpaluwaꞌ da nan. 13Kay ya Tyumanem, yan ya nyeyaꞌ adti ginawa mayu, aw gayed nan pig-uman ya kamayu anenganeng pada madalug mayu ya kanan pagkaliman.

14Aw dun ni kadég na imo-un mayu, diliꞌ kamu maggumudgumud, aw diliꞌ kamu mag-ayil, 15pada walaꞌ ya pagsalaꞌ kamayu na manga utaw aw ya bet mayu alag madyaw. Kay kamu ya mangayseꞌ na Tyumanem aw malinis da ya anenganeng mayu pangkay nyeyaꞌ kamu dun ni manga utaw na baluk ya anenganeng aw malatay ya kanilan pigpan-imoꞌ. Masiling kamu na kalalamdag na saleng na mag-ilaw sa kadég na asini tas na lupaꞌ, 16kay dayaw da mayu pigdalug ya tingeg na Tyumanem na yan ya nyatag sa ginawa na walaꞌ ya katigkasan. Aw kun maynan ya pig-imoꞌ mayu, awun kapalibantug ku kagaya dun ni allaw na paglikuꞌ ni Kristu kay walaꞌ kasapad ya kanak pagud dun ni kamayu. 17Ya kamayu pagpangintu-u kasiling na palangad dugsuꞌ adti Tyumanem. Aw kun pa-iligen ya kanak duguꞌ pada magkasalig ya kamayu pagpangintu-u, magleya aku aw magad sa kamayu pagleya. 18Maynan uman, pagleya kamu na magad sa kanak pagleya.

Ya pagsayaꞌ ni Pablo kan Timotiyo aw kan Épaprodito

19Na, kun tumbay na kanaten Matas na Pangulu na si Jisus, diliꞌ madugay padala ku galu adti kamayu si Timotiyo, pada paglikuꞌ nan asini, magleya aku magpakanyeg sa pag-ubat nan sa kamayu pag-eyaꞌ. 20Kay dun ni kadég na manga eped ku, walaꞌ ya maka-unawa kanan, kay si Timotiyo oloꞌ ya nyaypeng kamayu kasiling ku. 21Ya manga eped, yan oloꞌ ya pig-anenganeng nilan ya kanilan pagka-utawun aw ya kanilan pagpakabetang, aw walaꞌ nilan betangan adti ginawa nilan ya pagkaliman ni Jisu-Kristu. 22Manang si Timotiyo, kya-ede-an da mayu na madyaw ya bet nan. Kasiling sakanan na kanak tengteng iseꞌ kay dakulaꞌ ya nyatabang nan kanak adi sayid ku sa pagpa-edeꞌ sa Madyaw na Ubat-ubat kan Kristu. 23Yanagaw kun ka-ede-an da ku ya kanilan pagbayaꞌ kanak, na, maksay ku sakanan galu padala adti kamayu. 24Aw pig-iman ku na diliꞌ madugay tumbay aku uman na Tyumanem na makakawun adti sayid mayu.

25Na, yan ya pagbayaꞌ ku na ka-ilangan na pa-uli-en ku adti kamayu si Épaprodito na inulug tadun. Madyaw ya pagsuguꞌ mayu kanan adi kanak idtu muna, aw madyaw ya pagsanggilaꞌ nan kanaken. Migka-ubaybay kami aw nyaka-eped sakanan dun ni imo-unun ni Kristu. Kasiling kami si Épaprodito na duwa ya sundalu dun ni dakulaꞌ na tanam, kay migsambuk kami adti pagti-is. 26Manang adun, to-o la sakanan nyaypeng sa kadég mayu aw kaliman da nan kumitaꞌ kamayu. Kay walaꞌ katingen ya anenganeng nan idi asuntu na dyengeg mayu na pigkedelan sakanan. 27Aw matinaw saba ya dyengeg mayu na kyedelan sakanan idtu muna aw agpet da galu matay, manang pigkallatan sakanan na Tyumanem, aw aku uman, pagaw kadugangan pa ya kakalatan na ginawa ku. 28Yanagaw kaliman ku pa-uli-en sakanan dun ni kamayu pada magleya kamu uman sa pagkitaꞌ mayu kanan aw diliꞌ da aku maypeng. 29Yanagaw sa pagdateng nan dun, dawata mayu sakanan na awun dakulaꞌ na pagleya asuntu na inulug mayu sakanan dun ni kan Jisus. Aw basayi mayu ya utaw na kasiling nan. 30Kay agpet da galu sakanan matay asuntu sa imo-unun nan dun ni kan Kristu. Pigpan nan saba ya kanan pagka-utawun dun ni pagtabang nan kanak kay walaꞌ mayu kabatug asuntu na mawat kamu.

Currently Selected:

Pilipos 2: klgv

Highlight

Copy

Compare