Pilipos 1

1Aku si Pablo aw si Timotiyo na alag sugu-anen ni Kristu Jisus ya migsulat adti kadég mayu na awun ni Pilipos na mangintu-uway kan Kristu Jisus, dala ya manga maggagaday aw manga dyakunu.#1:1 Ya manga dyakunu, yan ya magtabang sa manga mangintu-uway aw sa manga imo-unun dun ni pagkatipunanan nilan.

2Padatengen galu kamayu ya grasya aw kalinaw na lyumekat adti kana Tyumanem na yan ya Ama tadun aw adti kanaten Matas na Pangulu na si Jisu-Kristu.

3Kada pag-anenganeng ku kamayu, pigpasalamatan ku ya Tyumanem. 4Aw to-o aku migleya dun ni kanak pagpanawagtawag sa kadég mayu. 5Pigpasalamatan ku ya Tyumanem kay lekat adti allaw na bagu kamu nyangintu-u taman adun, sambuk kamu na nyakatabang sa pagpa-edeꞌ sa Madyaw na Ubat-ubat kan Kristu. 6Aw walaꞌ aku pagduwaduwa na padelegen pa na Tyumanem ya madyaw na pigpalekat da nan dun ni kadég mayu aw un nan saba lingeben dun ni allaw na dumateng da si Kristu Jisus. 7Maynan ya kanak pag-anenganeng sa kadég mayu kay to-o ta kamu pigginawa͡an. Kay dun ni pagtabang mayu sa imo-unun na pigtaligu kanak na Tyumanem, alag kitadun kya-untungan sa grasya na pig-atag nan. Pangkay adun na pigkalabusu aku, maynan uman ya pagtabang mayu kanak pada apitan ku ya Madyaw na Ubat-ubat kan Kristu aw padelegen ku ya pagpa-edeꞌ adti manga utaw asini banwa ini. 8Aw ya Tyumanem yan ya magmatinaw na to-o aku malim kumitaꞌ kamayu, kay pigginawa͡an ta kamu kasiling na pagginawa ni Kristu Jisus kamayu.

9Aw yan ya pigsekat ku adti Tyumanem na to-o pa kadugangan ya pagginawa mayu kanan aw ya pagginawa mayu sa eped na manga utaw. Nyanawagtawag aku uman na kadugangan ya kya-ede-an mayu sa Tyumanem aw atagan kamu nan na katadeng 10pada mabatug mayu pamalli-en ya to-o madyaw imo-un aw diliꞌ pagsala-en ya kamayu bet taman na allaw na paglikuꞌ ni Kristu. 11Aw dun ni allaw yan, magi kan Jisu-Kristu, kita-en na madég ya bunga na pagdalug mayu sa pagkaliman na Tyumanem. Aw ya un sampetan na kadég yeiy, deyen na manga utaw ya Tyumanem.

Ya madyaw na nyangka-imoꞌ dun ni pagkalabusu kan Pablo

12Kay manga inulug ku dun ni kan Kristu, kaliman ku na ka-ede-an mayu na alag madyaw ya syampetan na kadég na nya-imoꞌ kanak, kay madég ya selat ku magpa-edeꞌ sa Madyaw na Ubat-ubat. 13Aw yanagaw kya-ede-an da na kadég na manga magtatunggu-ay na impirador aw eped pa na manga utaw asini syudad na Roma na nyakalabusu aku asuntu oloꞌ na pig-ubat-ubat ku si Kristu. 14Aw asuntu sa pagkalabusu nilan kanak, to-o pa baling migkasalig ya pagpangintu-u na manga inulug tadun sa kanaten Matas na Pangulu. Aw to-o pa silan mig-ubat-ubat sa tingeg na Tyumanem na walaꞌ ya kakallekan.

15Matinaw awun manga utaw na pig-ubat-ubat nilan si Kristu asuntu sa pag-ingaꞌ nilan, aw kaliman nilan oloꞌ ya magpa-ayil. Manang awun eped na madyaw ya kanilan tud sa kanilan pag-ubat-ubat 16kay pigginawa͡an aku nilan, aw kya-ede-an nilan na nyakalabusu aku pada makaselat aku mag-apit sa Madyaw na Ubat-ubat adti pag-usay kanak. 17Na, silan na gayed nyingaꞌ, pangkay pig-ubat-ubat nilan si Kristu, manang kaliman nilan oloꞌ magpatastas sa kanilan pagka-utawun. Aw kaliman nilan na kadugangan ya pagti-is ku adi kalabusuwanan magi sa pig-imoꞌ nilan, 18manang walaꞌ ku yeiy pagbetangan sa ginawa. Pangkay kun madyaw ya tud nilan aw pangkay diliꞌ madyaw, migleya aku na nyabekkal ya ubat-ubat kan Kristu. Aw magpadeleg ya kanak pagleya, 19kay nya-edeꞌ aku na ya kadég na nya-imoꞌ kanak un pa sumampet adti pagpakaluwaꞌ ku asini, magi sa kamayu pagpanawagtawag aw magi uman sa tabang na Ispiritu ni Jisu-Kristu. 20Yan ya to-o ku pig-iman na diliꞌ ku bullugan ya Tyumanem aw walaꞌ ya indeganan na mulamula͡en aku adti asdangan nan kagaya, manang kasiling na idtu muna, magpadeleg aku mag-ubat-ubat na walaꞌ ya kakallekan. Aw magi dun ni kadég na pigpan-imoꞌ ku, patasen ya ngalan ni Kristu, pangkay utaw pa aku aw pangkay pa kamatayan ku. 21Kay adi kanak, ya du-an na kaliman pa ku meyaꞌ asini tas na lupaꞌ pada makapadeleg pa aku mag-imoꞌ sa manga imo-unun na makatutuk kan Kristu, manang kun matay aku, yan saba ya madyaw kay un aku madtu ni sayid nan. 22Manang kun kenneꞌ pa aku mag-eyaꞌ asini tas na lupaꞌ, madég pa ya mabatug ku na imo-unun ni Kristu. Kun aku ya pabaya-en, magduwaduwa pa aku. 23Walaꞌ ku ka-ede-i kun ayin ya un ku galu pamalli-en. Kaliman ku galu na madtu la ni sayid ni Kristu, kay yan ya to-o pa madyaw. 24Manang kya-ede-an ku na madyaw pa kun kenneꞌ pa aku asini tas na lupaꞌ na un magtabang kamayu. 25Asuntu seiy nya-edeꞌ aku na diliꞌ pa aku matay, aw magpadeleg aku magtabang sa kadég mayu pada tumulin ya kamayu pagpangintu-u aw to-o pa kadugangan ya kamayu pagleya. 26Aw kun makalikuꞌ da aku adti kamayu, dakulaꞌ pa to-o ya indeganan na pagdeyen mayu kan Kristu Jisus.

27Pangkay unu ya datengan ku, to-o mayu pakadyawa ya bet mayu na dayaw mayu madalug ya Madyaw na Ubat-ubat kan Kristu. Yanagaw, kun makakadtu aku ni kamayu aw kun diliꞌ, asal nan ka-ede-an ku na ya kamayu pagkasambuk na ginawa to-o la migkabagseg aw maynan uman ya pagbekkal mayu sa Madyaw na Ubat-ubat kan Kristu. 28Diliꞌ kamu magkallek sa manga utaw na mig-ampang kamayu. Kay kun kita-en nilan na walaꞌ kamu kallek, yeiy ya puliba kanilan na un silan pa-emel-emelen na Tyumanem manang kamu paluwa-en nan saba. Aw ya kadég yeiy pigtumbay na Tyumanem, 29kay pig-atag da kamayu na un kamu mangintu-u kan Kristu aw pigtumbay uman kamayu ya magti-is asuntu kanan. 30Yanagaw migsambuk da kitadun dun ni pagti-is, kay kya-agiyan da mayu ya kasiling na kanak kya-agiyan na pagti-is idtu muna, aw dyengeg da mayu na kenneꞌ pa nan adun.

Currently Selected:

Pilipos 1: klgv

Highlight

Copy

Compare