Pilémon 1
1
1Kay inulug ku na si Pilémon na pigginawa͡an aw eped nami dun ni imo-unun ni Kristu Jisus.
Aku si Pablo ya migsulat kanmu eped ku ya kanaten inulug na si Timotiyo. Nyakalabusu pa aku asuntu na pigpa-edeꞌ ku si Kristu Jisus. 2Nyangumusta uman kami sa kadég na manga mangintu-uway kan Kristu na migkatipun nyanimba dun ni balay mu, labi la si Apiya na bubay tadun dun ni pagpangintu-u aw si Arkipo na kanaten eped na nyatibulluk adti pagdalug kan Kristu na walaꞌ ya kakallekan.
3Padatengen galu kamayu ya grasya aw kalinaw na lyumekat adti Tyumanem na yan ya Ama tadun aw adti kanaten Matas na Pangulu na si Jisu-Kristu.
4Dun ni pagpanawagtawag ku adti Tyumanem, gayed ta kaw pigpasalamatan adti kanan, 5kay gayed ku dyengeg ya pagpangintu-u mu kan Jisus na kanaten Matas na Pangulu, aw ya pagginawa mu sa kadég na manga mangintu-uway. 6Aw nyanawagtawag aku na ka-ede-an mu ya kadég na manga kadyawan na pig-atag kanaten na Tyumanem magi dun ni pagkasambuk tadun kan Kristu. 7Kay inulug, to-o aku migleya aw pigpakabagseg mu ya kanak ginawa, asuntu sa kanmu pagginawa sa manga mangintu-uway kay pyakaga͡an mu ya ginawa nilan.
8Pangkay pig-atagan aku na katundanan lekat adti kan Kristu aw sugu-un ta kaw galu na imo-un yeiy, 9manang asuntu sa kanak pagginawa, aku si Pablo nyanginayuꞌ oloꞌ kanmu. Kay unud da ya ginawa ku aw pigdakep aku asuntu na pigpa-edeꞌ ku si Kristu Jisus. 10Nyanginayuꞌ aku kanmu, na kallatan mu si Onésimo kay kasiling sakanan na iseꞌ ku asuntu na nyangintu-u la sakanan magi kanak talana ku idi kalabusuwanan. 11Idtu muna, adti kanmu walaꞌ ya katukanan mu kanan. Manang adun, to-o la dakulaꞌ ya katukanan nateꞌ kanan. 12Aw adun paliku-un da ku sakanan adti kanmu pangkay to-o ku sakanan pigginawa͡an. 13Kaliman ku galu na tagenan pa sakanan adi tampid ku pada tumabang pa kanak kalyu kanmu, talana pa ku nyakalabusu asuntu na pigpalna-u ku ya Madyaw na Ubat-ubat. 14Manang diliꞌ ku yeiy imo-un ya pagdemet kanan, kun walaꞌ ya pagtumbay lekat adti kanmu, pagaw kalegesan kaw tumabang kanak. Kaliman ku na kun tengteng kaw tumabang kanak, lekat galu adti kanmu ginawa. 15Pagaw yan ya pagbayaꞌ na Tyumanem na migsuway kamu si Onésimo na dagawdagaw oloꞌ pada pa-uli-en sakanan adti kanmu na walaꞌ ya tyamanan. 16Kay bekeꞌ da saba oloꞌ na allang mu sakanan manang inulug da mu sakanan uman dun ni pagpangintu-u. Pigginawa͡an ku si Onésimo kasiling na inulug ku, manang to-o pa mu sakanan ginawa͡an asuntu na bekeꞌ da oloꞌ na allang mu manang inulug da dun ni pagpangintu-u sa kanaten Matas na Pangulu na si Kristu.
17Yanagaw kun dun ni anenganeng mu migkasambuk ya ginawa ta, dawaten mu si Onésimo na inulug ta kasiling na pagdawat mu kanak. 18Aw kun pigpakalat kaw nan aw awun salaꞌ nan kanmu, aku la ya magbayad adti kanmu.
19Aku si Pablo ya tengteng na migsulat kanmu. Aku ya magbayad kun awun salaꞌ ni Onésimo adti kanmu. Manang diliꞌ mu pagkalingawan na aku ya migpa-edeꞌ kanmu sa Madyaw na Ubat-ubat kan Kristu na pigdawat mu na yan uman ya du-an na nyakaluwaꞌ kaw. 20Yanagaw, kay inulug, awun galu ma-untung ku dun ni pagkasambuk ta sa pagpangintu-u sa Matas na Pangulu tadun. Pakagana ya ginawa ku magi dun ni pagdawat mu kan Onésimo, kay inulug da saba kita dun ni kan Kristu. 21Yeiy ya du-an na pigsulatan ta kaw kay nya-edeꞌ aku na tumanen mu ya pigsekat ku kanmu aw to-o pa dun dakulaꞌ ya imo-un mu.
22Awun pa sambuk na sekaten ku adti kanmu. Kun mabatug, tagilani aku dadan na tambiꞌ na un ku kabantukan. Pig-iman ku na magi sa kamayu pagpanawagtawag, makaluwaꞌ aku lekat asini aw makalabaꞌ aku adti sayid mayu.
23Na, ya eped ku idi na si Épapras nyakalabusu uman asuntu sa pagdalug nan kan Kristu Jisus, aw nyangumusta uman sakanan kanmu. 24Awun uman manga tyumabang kanak dun ni imo-unun na Tyumanem na yan si Markos, aw si Aristarko, aw si Démas, aw si Lukas. Nyangumusta silan alag kamayu.
25Ayin pa aku galu na awun gayed ni kamayu ginawa ya grasya ni Jisu-Kristu na Matas na Pangulu tadun.
Currently Selected:
Pilémon 1: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
