Santiago 5

Ya pagpa-edeꞌ adti manga mayaman

1Na, kamu na manga mayaman, pagsugaw aw pag-ulangag kamu, kay madég ya manga kagamakan na dumateng kamayu. 2Ya manga ka-unan mayu adun migpalekat da ya pagkalagak na alagaꞌ nilan, aw pyangkan da na mangkayantek na mannanap ya kadégkadég mayu. 3Aw diliꞌ madugay walaꞌ da ya ma-untung sa bulawan aw kuwalta na pigluduk mayu, kasiling na putaw na pagkalalingen, aw yan ya magmatinaw na pigdemet mayu ya kamayu ka-unan. Aw kasiling na putaw na pagkanen na kalaling, maynan uman ya pagkan kamayu na atulun. Pangkay malapit da ya pag-ukum na Tyumanem, manang walaꞌ ya katantanan mayu magluduk sa ka-unan. 4Anenganenga mayu ya kamayu pigpan-imoꞌ. Ya tandan na pigpakang mayu sa kamayu mag-aniyay, walaꞌ mayu atagan kanilan. Ya manga diklamu nilan, dyengeg saba na Tyumanem na To-o Matulus.

5To-o kamu migpa-eyang sa kamayu pag-eyaꞌ asini tas na lupaꞌ. Aw pangkay unu ya pagkaliman na pagka-utawun mayu, mabatug mayu kamangen. Manang kasiling kamu saba na ayep na oloꞌ pigpakatabaꞌ aw diliꞌ nan imanmanen na un sakanan tumba͡en. Maynan uman ya ma-imoꞌ kamayu, kay pa-emel-emelen kamu uman na Tyumanem. 6Tay sa kalatay na pigpan-imoꞌ mayu! Pigtanemtaneman mayu na salaꞌ ya manga utaw na dyumalug sa pagkaliman na Tyumanem, aw pigpapatay mayu silan, pangkay walaꞌ silan atu kamayu.

Ya pagpakatagad aw pagpadeleg

7Kay manga inulug na nyangintu-u, ti-isa mayu ya manga kalugan mendaꞌ na dumateng ya kanaten Matas na Pangulu. Anenganenga mayu ya magpapawa-ay, gayed sakanan tyumagad sa ulan. Pagdateng na ulan, tyumulin ya manga tanem nan taman na nya-inug ya bunga, aw tigkas yan, mig-ani sakanan. 8Aw kamu uman, pagtagad kamu aw pakabagsega ya anenganeng mayu, kay diliꞌ madugay lumikuꞌ saba ya kanaten Matas na Pangulu. 9Kay manga inulug, diliꞌ kamu gayed magsaselselay, pada diliꞌ kamu ukuman. Kay ya kanaten mag-ukumay agpet da dumateng.

10Kay manga inulug, imo-a mayu pundinganan ya manga propita na mig-ubat-ubat sa pigpa-edeꞌ na Tyumanem. Nyati-is nilan ya manga kalugan aw ya pagpamulayam na manga utaw kanilan. 11Kya-ede-an da tadun na madyaw ya kana manga utaw na nyakati-is sa manga kalugan. Dyengeg da mayu na si Job to-o pyamulayaman, manang gayed magpakatagad sakanan aw migpadeleg syumalig sa Tyumanem. Aw kya-ede-an tadun ya tud na Tyumanem kan Job, aw ya syampetan yan pigtabangan nan sakanan kay ya Tyumanem magkallat sa manga utaw.

12Kay manga inulug, betangan yeiy uman adti ginawa mayu: Diliꞌ da kamu magsapaꞌ. Aw diliꞌ mayu pagpamatinawun ya awun ni tas na langit aw ya kadakulaꞌ na banwa aw ya pangkay unu. Yanagaw adti paglong mayu, ya e-e imo-a na “E-e.” Manang ya diliꞌ, imo-a na “Diliꞌ.” Mag-unawa galu ya kamayu paglongun aw ya kamayu imo-un, pada diliꞌ kamu ukuman aw pa-emel-emelen na Tyumanem.

Ya pagpanawagtawag adti Tyumanem

13Kun awun dun ni kamayu na migti-is, papanawagtawaga sakanan adti Tyumanem. Kun awun migleya, madyaw na magdeyen sakanan sa Tyumanem magi sa pagdalangan.

14Kun awun dun ni kamayu na kyedelan, pa-angay nan ya manga maggagaday sa manga mangintu-uway pada panawagtawagan nilan sakanan adti Tyumanem. Aw talana nilan manawagtawag, asagan nilan na lana na olibo ya ulu nan dun ni ngalan ni Jisu-Kristu na kanaten Matas na Pangulu. 15Aw kun mangintu-u silan na tubagen na Tyumanem ya pagpanawagtawag nilan, kaguli-an ya utaw na awun magkedel. Aw kun nyakasalaꞌ sakanan adti Tyumanem, lanasen na Tyumanem ya manga salaꞌ nan.

16Yanagaw, kun nyakasalaꞌ kamu adti Tyumanem, pag-ubat-ubatay kamu sa manga salaꞌ na nya-imoꞌ mayu, aw pagpanawagtawagay kamu adti Tyumanem, pada kaguli-an kamu. Kay dakulaꞌ saba ya mabatug na pagpanawagtawag na utaw na dyumalug sa pagkaliman na Tyumanem. 17Anenganenga mayu ya propita na si Éliyas. Pangkay utaw oloꞌ sakanan kasiling tadun, nyanawagtawag sakanan adti Tyumanem na diliꞌ pa mulan, aw walaꞌ saba ulan seled na tulung ka͡umay aw tengaꞌ. 18Aw dun ni pagpanawagtawag da nan uman adti Tyumanem na mulan, yanagaw nyulan saba, aw bagu tyumulin ya manga tanem aw migkadég ya bunga na tanem nilan.

Ya pagpalikuꞌ sa utaw adti Tyumanem

19Kay manga inulug, kun awun utaw dun ni kamayu na nyakasuway lekat adti matinaw na palna-u na Tyumanem, aw kun paliku-un na sambuk kamayu aw magselsel sa manga salaꞌ nan, 20ka-ede-an mayu na asuntu sa pagpalikuꞌ kanan adti Tyumanem, makaluwaꞌ ya kalaluwa nan aw diliꞌ da sakanan ka-eletan adti Tyumanem na walaꞌ ya tyamanan, aw madég ya manga salaꞌ na lanasen.

Currently Selected:

Santiago 5: klgv

Highlight

Copy

Compare