1 Pédro 1
1
1Aku si Pédro, ya sambuk na apostol ni Jisu-Kristu. Migsulat aku adti kadég mayu na pigpamalliꞌ na Tyumanem na migpanbeklag aw nya-imoꞌ dumadayu dun ni probinsiya na Ponto aw Bitiniya, aw manga probinsiya na Galasiya, aw Capadociya, aw Asia. 2Ya Tyumanem na yan ya Ama, nya-edeꞌ da dadan na dumalug kamu kanan. Aw pigtani la kamu na Ispiritu Santo pada madalug mayu si Jisu-Kristu aw linisan kamu magi sa duguꞌ nan.
Na, to-o pa galu kadugangan adti kamayu ya grasya aw kalinaw na lekat adti kanan.
Ya pag-iman na diliꞌ kabullugan
3Na, deyen ya Tyumanem na yan ya Ama na kanaten Matas na Pangulu na si Jisu-Kristu. Asuntu sa dakulaꞌ na kallat na Tyumanem, pig-atagan nan kitadun na bagu na pagka-utawun na awun pag-iman magi dun ni pagkataw ni Jisu-Kristu lekat adti pagkamatay, aw diliꞌ saba kitadun kabullugan. 4Aw awun pigtagilan da nan kamayu adti tas na langit. Aw diliꞌ yeiy magkalat, aw diliꞌ pagkatapingan, aw diliꞌ magkalagak ya kanenggeya nan. Pigdayaw yeiy kamayu na Tyumanem. 5Aw magi sa kamayu pagpangintu-u kanan, gayed kamu nan pigtamengan sa kabagseg na katulus nan, mendaꞌ na bukasan ya kamayu pagpakaluwaꞌ dun ni kamoliyan na allaw. 6Aw yeiy ya du-an na dakulaꞌ ya pagleya mayu pangkay pigti-isan mayu ya madég na pagtandaꞌ, manang oloꞌ yeiy magpaka-agi. 7Ya manga pagtandaꞌ kamayu, yan ya pagtalaman kun matinaw ya kamayu pagpangintu-u kan Kristu. Ya pagpangintu-u mayu kasiling na bulawan na pagtunawun pada ka-ede-an kun tengteng bulawan. Manang to-o pa dun dakulaꞌ ya alagaꞌ na kamayu pagpangintu-u kay sa bulawan na oloꞌ magkalagak. Yanagaw kun masalig da ya pagpangintu-u mayu, sayaꞌ kamu ni Jisu-Kristu aw patasen nan ya kamayu dengeg dun ni allaw na bukasan da sakanan. 8Pangkay walaꞌ mayu sakanan kita-a manang pigginawa͡an mayu sakanan. Aw pangkay diliꞌ pa mayu adun sakanan kita-en, manang nyangintu-u kamu kanan. Aw to-o dakulaꞌ ya kamayu pagleya aw walaꞌ ya maka-unawa, 9kay ya syampetan na kamayu pagpangintu-u yan ya pagpakaluwaꞌ mayu.
10Na, ya pagpakaluwaꞌ yeiy to-o pigsadsadan na manga propita asini muna. Aw pigpa-edeꞌ nilan dadan na dumateng ya kallat nan adti kamayu. 11Kaliman nilan na to-o kalabetan magi sa Ispiritu ni Kristu na awun da ni kanilan, na magti-is si Kristu, aw kun unu ya pagti-is nan, aw kun kinunu yeiy ka-imoꞌ. Aw tigkas yan lumikuꞌ da sakanan adti kadakulaꞌ na kadyawan na pagka Tyumanem nan. 12Aw pigbukasan uman kanilan na ya kanilan piglong bekeꞌ na silan ya ka-untungan manang ya kadég mayu. Kay pigpa-edeꞌ da adti kamayu ya Madyaw na Ubat-ubat magi sa manga utaw na piggagad na Ispiritu Santo.
Aw ya kadég yeiy, kaliman uman na manga anghil kalabetan.
Ya bet na walaꞌ ya pagsalaꞌ
13Yanagaw pakasaliga ya kamayu anenganeng aw tagilana dun ni pag-imoꞌ sa pagkaliman na Tyumanem. Aw pagtibulluk kamu adti pig-iman mayu na grasya na un nan atag kamayu dun ni allaw na bukasan si Jisu-Kristu. 14Asuntu na mangayseꞌ da kamu adun na Tyumanem, padelega mayu ya pagdalug sa palna-u nan, aw diliꞌ mayu pagliku-an ya bet na malatay idtu na walaꞌ pa kamu paka-edeꞌ sa Tyumanem. 15Dun ni kadég na imo-un mayu, imo-a na walaꞌ ya pagsalaꞌ kamayu, kay ya Tyumanem na migtawag kamayu walaꞌ saba ya salaꞌ dun ni kanan. 16Pigpasulat nan: “Pagpakawat kamu adti kadég na punganan na malatay, kay walaꞌ saba ya salaꞌ adi kanak.”#1:16 Mabasa adti Libitiko 11:44-45.
17Aw diliꞌ mayu pagkalingawan na ya Ama na pigpanawagtawagan mayu, yan uman ya Tyumanem na gayed mig-ukum sa tagsambuksambuk na manga utaw asuntu sa pigpan-imoꞌ nilan. Aw walaꞌ ya pigkibang nan. Yanagaw talana pa mayu dyumayu asini tas na lupaꞌ, basa͡an mayu sakanan na awun kakallekan. 18Kya-ede-an mayu na pigpaluwaꞌ da kamu adti pag-allang na manga katanem na walaꞌ ya guna na pig-ayawan na manga tyugbulan na mangkatikadeng mayu. Aw ya piglekat na Tyumanem kamayu, bekeꞌ na ka-unan na magkalagak kasiling na kuwalta aw bulawan, 19manang yan baling ya piglekat nan kamayu ya duguꞌ ni Kristu na dakulaꞌ ya alagaꞌ. Kasiling sakanan na nati na karniro na walaꞌ ya magkedel aw walaꞌ ya se-ey aw umbaꞌ pagdugsuꞌ adti Tyumanem. 20Sa walaꞌ pa ka-imoꞌ ya kadakulaꞌ na banwa, pigpalpa dadan na Tyumanem na si Kristu yan ya magpaluwaꞌ sa manga utaw. Manang adun na manga allaw yeiy, bagu pa pigbukasan kamayu ya Kristu pada ka-untungan kamu. 21Aw magi kan Kristu, pigsaligan da mayu ya Tyumanem na migmataw kanan lekat adti pagkamatay aw mig-atag kanan sa dengeg. Yanagaw ya kamayu pagpangintu-u aw pag-iman, awun da alag ni Tyumanem.
22Aw magi sa pagdalug mayu sa matinaw na palna-u, kyalinisan ya pagka-utawun mayu. Yanagaw ginawayi ya manga inulug mayu na nyangintu-u kan Kristu. Aw ya kamayu paggaginawa͡ay walaꞌ ya pagtallalingu. 23Kay nyabagu la saba kamu aw awun da ginawa mayu na walaꞌ ya katigkasan. Aw ya ginawa yeiy walaꞌ lekat adti kamayu mangkatikadeng na awun kamatayen, manang magi sa tingeg na Tyumanem na walaꞌ ya pagka-uman aw walaꞌ ya tyamanan. 24Pigpasulat nan asini muna:
“Ya kadég na manga utaw na nya͡utaw asini tas na lupaꞌ, kasiling silan na sagbet,
aw ya kadengeg nilan kasiling oloꞌ na bulak na sagbet.
Magkalanes ya sagbet aw mangkataktak ya bulak,
25 manang ya tingeg na Tyumanem diliꞌ ma-uman, aw magpadeleg na walaꞌ ya tyamanan.” #1:24-25 Mabasa adti Isayas 40:6-8.
Aw ya tingeg yeiy, yan ya Madyaw na Ubat-ubat na pigpa-edeꞌ adti kamayu.
Currently Selected:
1 Pédro 1: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
