Galasiya 3

Ya pagdalug sa Uldin aw ya pagpangintu-u kan Kristu

1Kay manga inulug ku dun ni probinsiya na Galasiya, ayin pakabetang ya anenganeng mayu? Singalan ya migpabelengbeleng kamayu? Kay mabangal saba ya pigpa-edeꞌ kamayu idtu muna sa kakawasan na pagkalabu kan Jisu-Kristu adti krus na yan ya kalyu kamayu. 2Na, awun oloꞌ usip ku kamayu. Ayin mayu kadawat ya Ispiritu Santo: dun ni pagdalug mayu sa Uldin, aw kun bekeꞌ nan, dun ni pagdengeg mayu sa Madyaw na Ubat-ubat kan Kristu na pigpangintu-uwan mayu? 3Ayin kaꞌ pakabetang ya anenganeng mayu? Idtu muna, sa bagu pa kamu nyangintu-u, gayed kamu syumalig sa tabang na Ispiritu Santo, manang adun, yan da baling ya pigsaligan mayu ya kamayu pagka-utawun. 4Kun maynan, unu, walaꞌ kadiꞌ ya guna na kadég na kamayu kya-agiyan sa pagpangintu-u mayu kan Kristu? 5Usipen pa ta kamu uman: Unu ya du-an na pig-atagan kamu na Tyumanem na kanan Ispiritu aw ya pag-imoꞌ nan sa manga milagru dun ni kamayu? Asuntu kaꞌ na dyumalug kamu sa manga suguꞌ dun ni Uldin, aw kun bekeꞌ yan asuntu sa pagpakanyeg mayu aw pagpangintu-u mayu kan Kristu?

6Kasiling saba ni Abraham. “Nyangintu-u sakanan sa Tyumanem. Aw magi sa pagpangintu-u nan, pigdawat sakanan na Tyumanem kasiling na walaꞌ ya salaꞌ.”#3:6 Mabasa adti Génésis 15:6 aw Roma 4:3. 7Yanagaw dun mayu ka-ede-i na ya manga utaw na awun pagpangintu-u sa Tyumanem, silan ya pagtawagen na manga buwadbuwad ni Abraham. 8Aw miglong ya Tyumanem dun ni pigpasulat nan asini muna pangkay ya manga Héntil un nan saba silan dawaten kun mangintu-u silan kanan. Kay dadan da nan piglong kan Abraham ya Madyaw na Ubat-ubat, law nan, “Magi dun ni kanmu, atagan ku ya kadég na manga utaw asini tas na lupaꞌ na manga kadyawan.”#3:8 Mabasa adti Génésis 12:3. 9Yanagaw, ya kadég na nyangintu-u kan Kristu, pakadyawun uman silan kasiling ni Abraham asini muna.

10Manang ya kadég na syumalig sa manga suguꞌ dun ni Uldin na manga Judiyu, pa-emel-emelen silan baling. Kay pigpasulat asini muna, “Pa-emel-emelen na Tyumanem ya utaw na diliꞌ magtuman sa kadég na suguꞌ nan dun ni Uldin.”#3:10 Mabasa adti Déutéronomiyo 27:26. 11Na, pigbangal da uman na Tyumanem na walaꞌ ya utaw na un nan dawaten asuntu sa pagdalug nilan sa Uldin, kay pigpasulat da nan, “Ya utaw na mangintu-u kanak, yan ya dawaten ku kasiling na walaꞌ da ya salaꞌ, aw matagtun nan ya tengteng ginawa na walaꞌ ya katigkasan.”#3:11 Mabasa adti Habakuk 2:4 aw Roma 1:17. 12Manang kun awun utaw na makatuman sa kadég na suguꞌ dun ni Uldin, diliꞌ da nan ka-ilangan ya mangintu-u. Kay pigpasulat da na Tyumanem asini muna: “Ya utaw na makatuman sa kadég na suguꞌ dun ni Uldin, yan ya utaw na atagan sa ginawa na walaꞌ ya katigkasan.”#3:12 Mabasa adti Libitiko 18:5 aw Roma 10:5. 13Manang asuntu na walaꞌ tadun katuman ya kadég na awun ni Uldin, umbaꞌ galu kitadun pa-emel-emelen na Tyumanem. Yanagaw nyatay si Jisus adti krus kalyu kanaten. Kay pigpasulat na Tyumanem asini muna, “Kun awun utaw na pigpatay magi sa paglagket adti kawuy, yan ya pangilala na pigpa-emel-emel da sakanan na Tyumanem.” #3:13 Mabasa adti Déutéronomiyo 21:23. 14Aw dun ni pig-imoꞌ ni Kristu Jisus adti krus, dyumateng adti manga Héntil ya manga kadyawan na pigpakang na Tyumanem kan Abraham asini muna. Aw magi sa pagpangintu-u tadun kan Kristu madawat tadun uman ya Ispiritu na pigpakang nan.

Ya pakang na Tyumanem diliꞌ ma-uman

15Kay manga inulug ku na nyangintu-u, anenganenga mayu ya katanem na utaw. Alimbawaꞌ, kun awun duwa ya utaw na mig-imoꞌ sa pakang aw dayaw da nilan pigpirma͡an, walaꞌ da ya un maka-uman aw makadugang san. 16Aw maynan uman ya pakang na Tyumanem asini muna kan Abraham aw sa buwadbuwad nan. Kya-ede-an tadun dun ni pigpasulat na Tyumanem na bekeꞌ na madég na buwadbuwad nan ya pigpakangan, manang sambuk da oloꞌ, aw yan si Kristu. 17Yeiy ya kaliman ku na kalabetan mayu: Mig-imoꞌ ya Tyumanem sa pakang kan Abraham na dayaw mig-iganget. Pagkatigkas yan, lyumabay ya upatenggatus aw katluwan (430) ka umay taman adti allaw na pig-atag na Tyumanem ya Uldin. Yanagaw walaꞌ kabatug na Uldin ya pag-uman sa pakang na Tyumanem kan Abraham. 18Kay kun ya pagdawat tadun sa pigpakang na Tyumanem magi oloꞌ sa pagdalug sa Uldin, walaꞌ saba ya ma-untung sa pakang nan, manang pig-atagan nan si Abraham asuntu na pigpakangan nan.

19Pagaw awun utaw na musip, “Kun walaꞌ ya labet na Uldin dun ni pagpakadyaw na Tyumanem kan Abraham, na, unu saba ya tud na Uldin?” Tumubag aku kanan, “Pig-atag na Tyumanem ya Uldin pada ka-ede-an ya salaꞌ na manga utaw.” Manang migdumala ya Uldin sa manga utaw taman oloꞌ na allaw na dyumateng si Kristu na yan ya buwadbuwad ni Abraham na pigpakangan na Tyumanem asini muna. Aw ya Uldin, pig-atag nan magi sa manga anghil aw si Moysis na yan ya migpatengaꞌ sa manga utaw adti Tyumanem. 20Manang ya pakang bekeꞌ na maynan. Dun ni pagpakang na Tyumanem kan Abraham, walaꞌ ya migpatengaꞌ kanilan, sayda la nan oloꞌ ya mig-atag sa pakang.

21Pagaw iman mayu aw walaꞌ pag-unawa ya tud na Uldin aw ya tud na manga pakang na Tyumanem. Bekeꞌ saba na maynan! Kay kun mabatug pa na Uldin atag adti manga utaw ya tengteng ginawa na walaꞌ ya katigkasan, yan galu ya pa-agi na dawaten na Tyumanem ya manga utaw kasiling na walaꞌ ya salaꞌ. 22Manang pigpasulat da dadan na Tyumanem na pigdumala͡an da na salaꞌ ya kadég na utaw. Yanagaw ya kadég na pigpakang na Tyumanem asini muna, yan oloꞌ ya un nan atagan ya manga utaw na mangintu-u kan Jisu-Kristu.

23Sa walaꞌ pa dateng si Kristu aw walaꞌ pa tadun pangintu-uwi, pigdumala͡an kitadun na Uldin mendaꞌ na pigbukasan ya pa-agi na yan ya pagpangintu-u tadun kanan. 24Yanagaw ya Uldin, yan ya kasiling na maggagatay kanaten mendaꞌ na dyumateng si Kristu. Aw adun, magi sa pagpangintu-u kan Kristu, mabatug da kitadun dawaten na Tyumanem. 25Manang adun na nyangintu-u la kitadun kan Kristu, walaꞌ da ya katundanan na Uldin kanaten.

26Kay magi dun ni pagpangintu-u mayu kan Kristu Jisus, nya-imoꞌ da ya kadég mayu iseꞌ na Tyumanem. 27Ya kadég mayu na pigba͡utismuwan dun ni kan Kristu, ya kakawasan yeiy, nyakasambuk da kamu kanan, aw piggagad da nan ya kamayu anenganeng. 28Aw adun, mig-unawa la ya manga Judiyu aw ya manga Héntil, aw pangkay allang aw bekeꞌ na allang, aw pangkay eseg aw ka͡ubayan asuntu na ya kadég mayu nyakasambuk da dun ni kan Kristu. 29Aw kun nyaka-akup da kamu adti kan Kristu, nya-imoꞌ da kamu buwadbuwad ni Abraham aw un kamu uman atagan sa pigpakang na Tyumanem kan Abraham.

Currently Selected:

Galasiya 3: klgv

Highlight

Copy

Compare