Galasiya 4

1Yeiy ya kaliman ku palabet: Alimbawaꞌ, kun awun ayawanan na ama sa iseꞌ nan na tagbiꞌ pa, diliꞌ pa na iseꞌ matagtun. Yanagaw kasiling pa sakanan na allang, 2kay pagka͡agadan nan ya suguꞌ na manga utaw na pigtaliguwan kanan mendaꞌ sa allaw na pigpamalliꞌ dadan na ama nan na atag da kanan ya ayawanan. 3Maynan uman ya pagpakabetang tadun asini muna sa walaꞌ pa kitadun pangintu-u kan Kristu. Pig-allang kitadun na pa-agi na pigdalug tadun idtu muna.#4:3 Adti eped na pag-ubad, ya mig-allang sa utaw, yan ya manga busaw na migdumala asini tas na lupaꞌ.

4Manang pagdateng na allaw na dadan da na Tyumanem pigpamalliꞌ, pigpadala nan ya kanan Iseꞌ na un ma͡utaw adti sambuk na ka͡ubayan. Aw pigdalug na Iseꞌ nan ya Uldin na manga Judiyu 5na un lekaten ya kadég na nya-allang na Uldin, pada ma-imoꞌ silan mangayseꞌ na Tyumanem. 6Aw asuntu na nya-imoꞌ da kamu iseꞌ na Tyumanem, pigpadala nan ya Ispiritu na kanan Iseꞌ na un meyaꞌ adti kamayu anenganeng. Yanagaw mabatug da tadun tawagen ya Tyumanem na “Maꞌ!” 7Yanagaw bekeꞌ da kitadun na allang manang mangayseꞌ da na Tyumanem, aw un kitadun nan uman atagan sa manga pigpakang nan kanaten.

Ya kakaypengan ni Pablo sa manga mangintu-uway dun ni Galasiya

8Na, idtu muna sa walaꞌ pa kamu paka-edeꞌ sa tengteng Tyumanem, pig-allang kamu na kamayu manga pyangintu-uwan na tyumanem na galuꞌ. 9Manang adun, kya-ede-an da mayu ya tengteng Tyumanem. Aw ya Tyumanem nyaka-edeꞌ uman kamayu. Yanagaw, anangaꞌ kaliman pa mayu lumikuꞌ adti manga katanem na walaꞌ ya guna? Anangaꞌ na kaliman pa mayu magpa-allang salut? 10Aw kenneꞌ pa mayu pigdalug ya manga katanem na manga Judiyu dun ni pagtani mayu sa manga matas na allaw aw sa manga bulan, aw manga pista nilan dun ni seled na sangka͡umay, aw sa manga matas na umay. 11Nyaypeng aku pagaw masapad baling ya kadég na pigpalna-u ku kamayu.

12Kay manga inulug, to-o aku nyanginayuꞌ kamayu na silingan aku mayu dun ni pag-ayaw ku sa Uldin na manga Judiyu. Pangkay Judiyu aku manang liwan aku na Héntil. Idtu muna sa pagkawun ku dun ni kamayu walaꞌ aku mayu pakalata. 13Kya-anenganengan pa gya mayu ya tagnaꞌ na pagkawun ku adti sayid mayu na to-o aku kyatigda-an. Talana mayu kanak mig-ipat, nyakaselat aku kamayu migpa-edeꞌ sa Madyaw na Ubat-ubat kan Kristu. 14Aw pangkay to-o nyakapabegat kamayu ya kanak pagpakabetang manang walaꞌ kamu kele kanak. Pigdawat aku mayu baling kasiling na anghil na Tyumanem, aw ya pagpamasa mayu kanak kasiling uman na si Kristu Jisus ya pigbasa͡an mayu. 15Idtu na manga allaw yan, to-o kamu migleya. Manang adun, migkanu la kamu seiy? Dun ni manga allaw yan, makamatinaw aku na pangkay ya kamayu mata lugiten mayu galu aw atag kanak. 16Manang nya-uman da ya ginawa mayu kanak. Unu kaꞌ, pig-imoꞌ da aku mayu po-on asuntu oloꞌ na piglong ku kamayu ya matinaw?

17Na, kya-ede-an da ku na awun manga magpalna-uway dun ni kamayu na sallong kunu nyaypeng kamayu. Manang ya matinaw, diliꞌ madyaw ya tud nilan. Kay kaliman nilan talikudan aku mayu aw silan da ya dalugun mayu. 18Diliꞌ saba malat kun maypeng ya sambuk na utaw, asal nan madyaw ya kanan tud, pangkay walaꞌ aku dun ni sayid mayu. 19Kay manga inulug, pigsiling ta kamu na kanak tengteng mangayseꞌ. Migti-is aku asuntu kamayu kasiling na ka͡ubayan na pyetesan, aw magpadeleg aku magti-is mendaꞌ na kita-en si Kristu dun ni pagka-utawun mayu. 20Madyaw galu kun awun aku ni tampid mayu pada diliꞌ to-o masakit ya kanak tingeg, kay to-o aku nyaypeng kamayu.

Ya pundinganan sa duwa ya ka͡ubayan na si Sara aw si Hagar

21Na, awun usip ku sa manga utaw na malim dumalug sa manga suguꞌ dun ni Uldin na manga Judiyu. Unu, kya-ede-an mayu ya kakawasan na piglong dun ni Uldin? 22Pigsulat dun na awun duwa ya iseꞌ ni Abraham na eseg. Ya sambuk nya͡utaw adti allang na si Hagar, aw ya sambuk nya͡utaw adti ka͡ubayan nan na si Sara. 23Ya pagka͡utaw na iseꞌ nan adti allang kasiling oloꞌ na katanem na utaw mag-iseꞌ. Manang ya pagka͡utaw na iseꞌ adti tengteng ka͡ubayan nan, yan ya pagtuman na Tyumanem sa pigpakang nan.

24Na, ya duwa ya ka͡ubayan yeiy nya-imoꞌ pundinganan sa duwa ya pakang na Tyumanem na dayaw mig-iganget. Ya allang na si Hagar, kasiling sakanan na Uldin na pig-atag na Tyumanem adti manga utaw na Isra-él dun ni Buntud na Sinay, kay ya manga utaw na gayed syumalig sa Uldin kasiling saba na allang. 25Aw si Hagar nya-imoꞌ alung sa Uldin na pig-atag dun ni Buntud na Sinay adti banwa na Arabiya. Kay silan ya manga buwadbuwad nan, alag silan nya-allang kasiling na manga Judiyu na nyeyaꞌ adti Jérusalim na nyatibulluk adti pagdalug sa Uldin. 26Manang si Sara na bekeꞌ na allang, nya-imoꞌ sakanan pundinganan sa bagu na Jérusalim na awun ni tas na langit. Aw yan ya palangad ina na kadég tadun kay walaꞌ kitadun ka-allang na Uldin. 27Kay pigpasulat na Tyumanem asini muna:

“Pagleya kaw, ikaw na ka͡ubayan na diliꞌ magpaka-iseꞌ.

Pag-iyak-iyak kaw na to-o magleya, ikaw na walaꞌ lemen petesi.

Kay pangkay pig-ayawan kaw na eseg mu, manang magkadég pa ya buwadbuwad mu kay sa ka͡ubayan na awun eseg.”#4:27 Mabasa adti Isayas 54:1.

28Na, kay manga inulug ku na nyangintu-u, nya-imoꞌ da kamu iseꞌ na Tyumanem asuntu na nyatuman da ya pigpakang nan, kasiling ni Isa-ak na iseꞌ ni Sara na pigpakang na Tyumanem. 29Manang dun ni manga allaw yan, si Isma-él na nya͡utaw kasiling na katanem na manga utaw na mag-iseꞌ, pigpamulayaman nan si Isa-ak na nya͡utaw magi sa katulus na Ispiritu Santo. Aw maynan uman ya nya-imoꞌ adti kadég tadun na pigbagu la na Ispiritu Santo, pigpamulayaman kitadun na manga utaw na syumalig sa Uldin. 30Manang yeiy ya pigpasulat na Tyumanem asini muna: “Ya ka͡ubayan ini na allang, papanawa la sakanan aw ya iseꞌ nan na eseg! Kay ya iseꞌ na allang diliꞌ saba bagi-an sa ayawanan na un tagtunun na iseꞌ na ka͡ubayan na bekeꞌ na allang.”#4:30 Mabasa adti Génésis 21:9-10. 31Yanagaw, kay manga inulug, bekeꞌ kitadun na iseꞌ na ka͡ubayan na allang, manang manga buwadbuwad kitadun baling na ka͡ubayan na bekeꞌ na allang.

Currently Selected:

Galasiya 4: klgv

Highlight

Copy

Compare