Galasiya 2

Ya pagdawat kan Pablo na manga apostolés

1Paglabay da na sampuluꞌ tag upat (14) ya umay, lyumikuꞌ aku adti Jérusalim eped ku si Bérnabi aw pigpa-agad ku uman si Tito. 2Ya du-an na lyumikuꞌ aku kay awun pigpa-edeꞌ kanak na Tyumanem na ka-ilangan na madtu aku. Talana ku dun, migbalawbalaw kami ya manga maggagaday sa manga mangintu-uway na oloꞌ kami. Aw pigpa-edeꞌ ku kanilan kun unu ya Madyaw na Ubat-ubat na pigpalna-u ku adti manga Héntil. Pig-imoꞌ ku yeiy pada diliꞌ masapad ya pigpalna-u ku lekat pa idtu muna taman adun. 3Aw ya eped ku na si Tito, pangkay Héntil sakanan na nyangintu-u kan Kristu, walaꞌ nilan legesa na dumalug sa katanem na manga Judiyu na pagtuli-en. 4Manang awun manga Judiyu na sallong kunu nyangintu-u la kan Kristu. Aw ya tud nilan, yan oloꞌ ya manilib dun ni katipun na manga mangintu-uway. Kay kaliman nilan kita-en kun matinaw na pigpaluwaꞌ da kitadun ni Kristu Jisus lekat adti pagdumala na Uldin na manga Judiyu. Aw kaliman nilan na ma-allang kitadun na kanilan Uldin. 5Manang walaꞌ nami ka͡agadi ya kanilan pigpalna-u pangkay sambuk, pada walaꞌ ya makadaliꞌ adti matinaw na pigpalna-u nami kamayu na yan ya Madyaw na Ubat-ubat kan Kristu.

6Aw ya manga maggagaday sa manga mangintu-uway, pangkay to-o silan pigkilala, manang walaꞌ aku kabekenbeken paglong kanilan. Kay adti Tyumanem mig-unawa la ya kadég nami. Aw walaꞌ ya pigdugang nilan adti pigpalna-u ku. 7Manang dun da baling nilan ka-ede-i na aku ya pigtaliguwan na Tyumanem na un magpalna-u sa Madyaw na Ubat-ubat kan Kristu adti manga Héntil, kasiling ni Pédro na pigtaliguwan nan uman sa pagpalna-u adti manga Judiyu. 8Kay ya Tyumanem na mig-imoꞌ kan Pédro apostol adti manga Judiyu, yan uman ya mig-imoꞌ kanak apostol adti manga Héntil. 9Yanagaw, sa pagdengeg ni Santiago#2:9 Ya Santiago yeiy, inulug ni Jisus na iseꞌ uman ni Maria. aw ni Pédro aw ni Juan sa piglong ku, dun da nilan ka-ede-i na pigpakadyaw na Tyumanem ya kanak pigpan-imoꞌ. Silan ya salig dun ni manga mangintu-uway, aw pig-alimanu kami nilan si Bérnabi. Aw pigka-unawa͡an da nami na kami si Bérnabi ya magpadeleg magpalna-u adti manga Héntil, aw silan ya magpalna-u adti manga Judiyu. 10Yan oloꞌ ya pigsekat nilan kanami, na tabangan ya manga utaw na to-o migkapelek.#2:10 Mabasa adti Manga Pigpan-imoꞌ na Manga Apostolés 11:29-30. Aw maynan uman ya kanak pagkaliman imo-un.

Ya pagsagda ni Pablo kan Pédro

11Na, sa pagkawun ni Pédro adti syudad na Antiyokiya, pigsagda ku sakanan, kay diliꞌ madyaw ya pig-imoꞌ nan. 12Kay idtu muna, madyaw ya bet nan adti manga mangintu-uway na Héntil pangkay walaꞌ silan tuli-a, aw gayed sakanan syumambuk kanilan kyuman. Manang sa pagka-edeꞌ da ni Pédro na dyumateng da ya manga utaw na pigsuguꞌ ni Santiago lekat adti Jérusalim, walaꞌ da sakanan sambuk sa manga Héntil kyuman.#2:12 Adti katanem na manga Judiyu asini muna, walaꞌ kanilan tumbayan na sumambuk kuman eped ya manga Héntil. Kay nyallek sakanan sa manga Judiyu na lyumeges sa manga eped nilan na mangintu-uway na dalugun ya manga suguꞌ dun ni Uldin. 13Aw walaꞌ kadugay migsiling uman kan Pédro ya madég na Judiyu na nyangintu-u, pangkay kya-ede-an nilan na diliꞌ malat ya sumambuk kuman sa manga Héntil. Pangkay si Bérnabi nyagagad uman sa pig-imoꞌ nilan. 14Sa pagka-edeꞌ ku na walaꞌ da nilan daluga ya matinaw na palna-u dun ni Madyaw na Ubat-ubat kan Kristu, piglongan ku si Pédro adti asdangan na kadég nilan, “Kay Lew, anangaꞌ walaꞌ da kaw sambuk sa manga Héntil? Kasiling na pigleges mu baling silan na dumalug sa manga katanem tadun na manga Judiyu! Pangkay ikaw, walaꞌ da mu daluga ya manga katanem na manga Judiyu, aw kasiling da kaw adun na Héntil.”

Ya Judiyu aw Héntil alag makaluwaꞌ magi sa pagpangintu-u kan Kristu

15Judiyu ya tengteng na tyugbulan nami, bekeꞌ kami na manga Héntil na walaꞌ paka-edeꞌ sa Uldin na Tyumanem. 16Nya-edeꞌ kitadun na bekeꞌ na pagdalug sa Uldin ya du-an na dawaten kitadun na Tyumanem kasiling na walaꞌ da ya salaꞌ, manang magi saba oloꞌ sa pagpangintu-u kan Kristu. Yanagaw kami na manga Judiyu, nyangintu-u uman kan Kristu Jisus pada dawaten kami na Tyumanem kasiling na walaꞌ da ya salaꞌ. Kay walaꞌ ya utaw na dawaten na Tyumanem magi sa pagdalug nan sa Uldin.

17Manang kun tibullukun nami na ma-imoꞌ na walaꞌ ya salaꞌ asuntu na nyakasambuk da kami kan Kristu, dun da baling kami ka-imoꞌ makasasalaꞌ adti anenganeng na manga eped nami na Judiyu. Kun maynan, liwan na si Kristu baling ya mig-imoꞌ kanami makasasalaꞌ. Manang bekeꞌ saba na maynan! 18Manang kun liku-an ku ya manga katanem na manga Judiyu na pig-ayawan da ku, na, dun da ka-ede-i na piglakadan ku ya Uldin. 19Kyalabetan da ku na diliꞌ ku mabatug tumanen ya kadakulaꞌ na Uldin pada dawaten na Tyumanem, aw yan ya du-an na nya-imoꞌ aku kasiling na nyatay da dun ni pagdalug ku sa Uldin kay walaꞌ da aku dumalayi na Uldin. Pig-ayawan da ku yeiy aw kasiling na nyataw da aku adun pada tumanen ya pagkaliman na Tyumanem. 20Aw asuntu na nyaka-agad da aku sa pagkamatay ni Kristu adti krus, yanagaw diliꞌ da ku tumanen ya pagkaliman na pagka-utawun ku, manang yan da baling ya tumanen ku ya pagkaliman ni Kristu na nyeyaꞌ asini kanak. Aw yan da ya pigsaligan ku adun si Jisus na Iseꞌ na Tyumanem, kay pigginawa͡an aku nan aw pig-atag nan ya kanan pagka-utawun kalyu kanaken. 21Yanagaw walaꞌ ku talikudi ya kallat na Tyumanem, kay kun dawaten nan ya manga utaw asuntu sa pagdalug nilan sa Uldin, na, walaꞌ ya untung na pagkamatay ni Kristu!

Currently Selected:

Galasiya 2: klgv

Highlight

Copy

Compare