Galasiya 1
1
1Aku si Pablo ya sambuk na apostol na migsulat adti kamayu. Ya kanak pagka-apostol walaꞌ lekat adti utaw aw bekeꞌ uman na utaw ya nyamalliꞌ kanak, manang yan baling ya nyamalliꞌ kanak si Jisu-Kristu aw ya kanan Ama na yan ya Tyumanem na migmataw kanan lekat adti pagkamatay. 2Ya kadég na mangintu-uway na ini sayid ku, migpadala kami sa sulat na un basa͡en adti kadég mayu na migkatipun nyanimba adti kamayu manga banwa na awun ni probinsiya na Galasiya.
3Padatengen galu adti kamayu ya grasya aw kalinaw na lyumekat adti Tyumanem na yan ya Ama tadun aw adti kan Jisu-Kristu na kanaten Matas na Pangulu. 4Pig-atag nan ya kanan pagka-utawun pada sa kanaten manga salaꞌ na un kitadun paluwa-en lekat adti pagdumala na malatay asini tas na lupaꞌ adun na manga allaw yeiy. Kay yeiy ya pagbayaꞌ dadan na Tyumanem na yan ya Ama tadun. 5Yanagaw umbaꞌ sakanan deyen na walaꞌ ya tyamanan. Amén.
Sambuk da oloꞌ ya Madyaw na Ubat-ubat
6Kyumegaꞌ aku kun anangaꞌ mayu maksay talikudan ya Tyumanem na yan ya migtawag kamayu asuntu sa kallat ni Kristu, aw dyumalug kamu baling sa sangkamuluꞌ na palna-u. 7Walaꞌ ya eped na matinaw na palna-u, oloꞌ saba kan Kristu. Manang awun manga utaw na nyawun dun ni kamayu na migpabelengbeleng sa pagpangintu-u mayu, aw kaliman nilan balukun ya Madyaw na Ubat-ubat kan Kristu. 8Manang pangkay singalan ya mag-ubat-ubat sa galuꞌ, pangkay kami aw kun anghil na lekat adti tas na langit, kun walaꞌ pag-unawa sa kanami pigpalna-u adti kamayu idtu muna, na, ya utaw yan umbaꞌ pa-emel-emelen na Tyumanem na walaꞌ ya tyamanan! 9Salutun pa ku ya piglong nami kamayu idtu muna: Pangkay singalan ya mag-ubat-ubat sa palna-u na walaꞌ pag-unawa sa pigdawat da mayu idtu muna, umbaꞌ saba pa-emel-emelen na Tyumanem ya utaw yan na walaꞌ ya tyamanan!
10Asuntu sa piglong ku yeiy, diliꞌ kamu mag-anenganeng na pigkaliman ku na sayaꞌ aku na manga utaw. Bekeꞌ saba na maynan! Yan saba oloꞌ ya kaliman ku na katutukan ya Tyumanem kanak. Kay kun yan ya tud ku na sayaꞌ na manga utaw, na, bekeꞌ aku na tengteng sugu-anen ni Kristu.
Ya palna-u ni Pablo lyumekat adti kan Kristu
11Kay manga inulug ku na nyangintu-u, kaliman ku ka-ede-an mayu na ya Madyaw na Ubat-ubat na pigpa-edeꞌ ku kamayu, walaꞌ lekat adti anenganeng na manga utaw. 12Walaꞌ ku yeiy kadawat lekat adti utaw, aw bekeꞌ na utaw ya migpalna-u kanak, manang si Jisu-Kristu oloꞌ ya migpa-edeꞌ dun ni pagpakitaꞌ nan kanak.#1:12 Mabasa adti Manga Pigpan-imoꞌ na Manga Apostolés 9:1-19. 13Kay dyengeg da mayu ya dadan na manga pigpan-imoꞌ ku idtu muna sa pagdalug pa ku sa katanem nami na manga Judiyu.#1:13 Ya manga utaw na Judiyu, silan ya buwadbuwad ni Jakub na pigpamalliꞌ na Tyumanem aw pigtawag silan uman na utaw na Isra-él. To-o ku pigpamulayaman ya manga utaw na Tyumanem na nyangintu-u la kan Kristu, aw pigtibagsegan ku na apnasen silan. 14Sa kadég na manga pa-unawa ku na Judiyu, aku ya dakulaꞌ ya kya-ede-an sa pagdalug sa katanem nami na manga Judiyu kay pigbetang ku adti kanak ginawa ya pagdalug sa manga katanem na tyugbulan nami.
15Manang asuntu sa dakulaꞌ na kallat na Tyumanem kanak, sa walaꞌ pa aku ka͡utaw, dadan da aku nan pigtani aw pigtawag aku nan na un ma-imoꞌ kanan sugu-anen. 16Aw dun ni pagpakitaꞌ nan kanak sa Iseꞌ nan na si Jisus na un ku pa-edeꞌ adti manga Héntil, walaꞌ aku paninaw sa utaw na un magtuladaꞌ kanak. 17Walaꞌ aku uman kadtu ni Jérusalim pada magsekat sa palna-u na manga apostolés ni Jisus na nyaka-una kanak. Manang nyadtu aku baling ni probinsiya na Arabiya aw dun da aku pag-eyaꞌ taman sa allaw na lyumikuꞌ aku adti lunsud na Damasko.
18Pagkatigkas da na tulungka͡umay lekat na allaw na pagpangintu-u ku, nyanaw aku adti Jérusalim kay kaliman ku na magkakilala͡ay kami si Pédro. Aw nyeyaꞌ aku adti sayid nan seled na sampuluꞌ tag lima (15) ka allaw. 19Manang talana ku dun, walaꞌ ya eped na manga apostolés na pigkitaꞌ ku, oloꞌ si Santiago na inulug ni Jisus.
20Nya-edeꞌ ya Tyumanem na bekeꞌ na galuꞌ ya pigsulat ku kamayu.
21Pagkatigkas yan, nyadtu aku ni manga probinsiya na Sirya aw Ciliciya. 22Na, idtu na manga allaw yan, walaꞌ pa kami pagkakilala͡ay ya manga mangintu-uway kan Kristu na migkatipun nyanimba adti probinsiya na Judiya. 23Dyengeg oloꞌ nilan na nya-uman da aku, aw law nilan, “Yan saba ya utaw na nyandakep aw nyamulayam sa manga eped tadun idtu muna. Manang adun, mig-ubat-ubat da sakanan sa palna-u na pyangintu-uwan tadun na pigtibagsegan nan galu idtu muna kalaten!” 24Aw to-o nilan pigdeyen ya Tyumanem asuntu na nyangintu-u la aku kan Kristu.
Currently Selected:
Galasiya 1: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
