Épéso 3
3
Ya palpa na Tyumanem sa manga utaw na Héntil
1Aw asuntu sa kadég yeiy, aku si Pablo nyanawagtawag kamayu adti Tyumanem. Idi aku ni kalabusuwanan asuntu na pigpalna-u ku si Kristu Jisus adti kamayu na manga Héntil. 2Pigdengeg da mayu gya ya grasya na Tyumanem na pig-atag nan kanak pada makapalna-u kamayu. 3Kay pigbukasan nan kanak ya kanan palpa na pigtaguꞌ asini muna na yan ya pigpa-edeꞌ da ku asini makagpaꞌ na sulat ku ini.#3:3 Ya palpa na Tyumanem na pigbukasan asini, mabasa adti Épéso 2:11-22. 4Aw sa pagbasa mayu sa pigsulat ku ini, ka-ede-an mayu uman ya kyalabetan da ku sa palpa na Tyumanem kamayu magi kan Kristu. 5Asini muna, walaꞌ pa yeiy na Tyumanem bukasi adti manga utaw, manang adun, pigpa-edeꞌ da nan magi sa Ispiritu Santo adti kanan manga apostolés aw manga propita. 6Aw ini ya kanan palpa na pigbukasan da: Kamu na manga Héntil, magi sa Madyaw na Ubat-ubat kan Kristu, pigdawat mayu uman ya manga kadyawan na lekat adti Tyumanem kasiling na nyadawat na manga Judiyu. Aw nyaka-akup da kamu uman dun ni palangad lawas ni Kristu. Aw pigpakangan uman kamu na Tyumanem kay nyakasambuk da kamu kan Kristu.
7Magi sa katulus na Tyumanem, pig-atagan aku nan na grasya na ma-imoꞌ aku sugu-anen nan pada magpa-edeꞌ sa Madyaw na Ubat-ubat kan Kristu. 8Pangkay aku ya to-o madalem sa kadég na mangintu-uway, manang asuntu sa grasya na Tyumanem, aku ya pigtaliguwan nan mag-ubat-ubat adti manga Héntil sa manga kadyawan ni Kristu na walaꞌ ya maka-unawa. 9Ya Tyumanem na mig-imoꞌ sa kadég, yan ya migsuguꞌ kanak na ilawan ya anenganeng na kadég na utaw pada ka-ede-an nilan kun unun ya pagtuman sa palpa na pigtaguꞌ nan asini muna. 10Aw magi sa kadég na manga mangintu-uway, un pa-edeꞌ ya kalalem na katadeng na Tyumanem adti kadég na awun katulus aw manga migdumala na awun ni dalem na langit. 11Kay yeiy ya pigpalpa nan dadan lekat pa asini muna, aw pigtuman nan yeiy magi kan Kristu Jisus na kanaten Matas na Pangulu. 12Aw asuntu na nyakasambuk da kitadun kanan, diliꞌ kitadun mallek aw mabekenbeken magpalapit adti Tyumanem. Mabatug da yeiy kay nyangintu-u la kitadun kan Kristu. 13Yanagaw, asuntu sa kadég yeiy, sekaten ku adti kamayu na diliꞌ mayu pagpakalumayen ya ginawa mayu asuntu sa pagti-is ku sa pagpalna-u kamayu, kay dun kamu saba ka-untungi.
Ya pagginawa ni Kristu kanaten
14Aw sa pag-anenganeng ku sa palpa na Tyumanem, lyumuhud aku aw nyanawagtawag adti asdangan na Ama tadun 15na yan ya lyekatan sa kadég na pamilya asini tas na lupaꞌ aw adti tas na langit. 16Asuntu na yan ya lyekatan uman sa kadakulaꞌ na katulus, migsekat aku adti kanan na to-o nan pakabagsegen ya kamayu ginawa magi sa Ispiritu Santo, 17pada meyaꞌ si Kristu dun ni seled mayu asuntu sa pagpangintu-u mayu kanan. Pigsekat ku adti Tyumanem na to-o pa magkasalig ya kamayu pagginawa kanan aw sa kamayu manga eped. 18Aw pigsekat ku uman kanan na mabatug mayu kalabetan ya pagginawa ni Kristu kanaten, kun sangunu ya kadakulaꞌ aw ya kalalem na pagginawa nan na walaꞌ ya maka-unawa, aw kalabetan uman na kadég na manga mangintu-uway. 19Ka-ede-an mayu galu ya kanan pagginawa pangkay diliꞌ pa adun yeiy alag kalabetan, pada kun unu ya awun ni kana Tyumanem yan uman ya awun ni kamayu.
20Deyen tadun ya Tyumanem! Kay magi sa katulus nan na migtalabahu dun ni seled tadun, mabatug nan imo-un ya to-o pa dakulaꞌ kay sa kadég na pigsekat tadun aw sa kanaten pig-anenganeng. 21Umbaꞌ deyen ya Tyumanem na walaꞌ ya tyamanan, asuntu sa kadég tadun na manga mangintu-uway na migsimba kanan, aw asuntu kan Kristu Jisus na kanaten Matas na Pangulu. Amén.
Currently Selected:
Épéso 3: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
