Épéso 2

Ya pagpaluwaꞌ magi sa kallat na Tyumanem

1Idtu na muna, asuntu sa manga salaꞌ mayu aw sa paglakad mayu sa manga suguꞌ na Tyumanem, adti kanan anenganeng kasiling kamu na nyatay da. 2Kay yan baling ya pigdalug mayu ya bet na manga utaw na walaꞌ pangintu-u sa Tyumanem. Aw pigdalug mayu uman si Satanas na pangulu sa manga busaw na nyeyaꞌ dun ni dalem na langit na yan ya miggagad sa anenganeng na manga utaw na walaꞌ dalug sa Tyumanem. 3Aw maynan uman ya pigpan-imoꞌ na kadég tadun idtu muna. Pigdalug tadun ya pagkaliman na kanaten pagka-utawun dun ni pag-imoꞌ sa malatay. Aw pig-imoꞌ tadun ya pangkay unu na pagkaliman na kanaten lawas aw anenganeng. Aw umbaꞌ galu kitadun pa-emel-emelen na Tyumanem kasiling na eped na manga utaw. 4Manang ya Tyumanem, dakulaꞌ ya kanan kallat aw to-o kitadun nan pigginawa͡an. 5Pangkay piglakadan tadun ya manga suguꞌ na Tyumanem aw kasiling kitadun idtu muna na nyatay da, manang adun, pigmataw kitadun nan eped ni Kristu. Yanagaw magi sa kallat na Tyumanem nyakaluwaꞌ kitadun. 6Aw asuntu na pigmataw kitadun eped ni Kristu, makasambuk kitadun uman kanan pa-ingkudun dun ni ingkudanan na kanan paghariꞌ adti tas na langit. 7Pig-imoꞌ nan yeiy pada sa manga allaw na dumadateng pa, pakitaꞌ nan adti kadég ya kanan kallat na walaꞌ ya maka-unawa, na yan ya kallat nan adti kadég tadun na nyakasambuk da kan Kristu Jisus. 8Asuntu saba sa kallat na Tyumanem, pigpaluwaꞌ kamu nan magi sa pagpangintu-u mayu kan Kristu Jisus. Bekeꞌ na asuntu sa manga pigpan-imoꞌ mayu, manang asuntu baling na yan ya pig-atag na Tyumanem na walaꞌ ya bayad. 9Ya pig-atag nan bekeꞌ saba na tandan kamayu asuntu sa pagtibagseg mayu mig-imoꞌ sa madyaw, yanagaw walaꞌ ya utaw na makapalibantug sa pigpan-imoꞌ nan. 10Kay ya Tyumanem, yan saba ya migbagu kanaten. Pig-imoꞌ nan yeiy magi dun ni pagpakasambuk tadun kan Kristu Jisus, pada ma-imoꞌ tadun ya manga madyaw na imo-unun na pigtagilan dadan kanaten na Tyumanem.

Ya pagkasambuk na manga Judiyu aw manga Héntil magi kan Kristu

11Yanagaw anenganenga mayu ya kamayu pagpakabetang idtu muna. Kamu na manga Héntil, pigkele͡an kamu na manga utaw na Judiyu na migpatuliꞌ kay walaꞌ kamu pagpatuliꞌ. Manang ya pagpatuliꞌ, pangilala oloꞌ dun ni lawas na utaw. 12Anenganenga mayu uman na idtu muna walaꞌ kamu pakasambuk adti kan Kristu. Aw walaꞌ uman ya labet mayu dun ni manga utaw na Isra-él. Kasiling kamu na dumadayu kay walaꞌ pa kamu paka-akup adti manga utaw na dyumawat sa manga pakang na Tyumanem na dayaw mig-iganget. Yanagaw sa pag-eyaꞌ mayu asini tas na lupaꞌ, walaꞌ ya pag-iman mayu na dumawat sa kadyawan na lekat adti Tyumanem aw walaꞌ ya kya-ede-an mayu kanan. 13Manang adun, nyakasambuk da kamu kan Kristu. Pangkay idtu muna mawat kamu adti Tyumanem, manang adun pigpalapit da kamu magi sa duguꞌ ni Kristu. 14Kay si Kristu ya kanaten kalinaw. Pigsambuk da nan ya ginawa na kadég tadun na nyangintu-u kanan, pangkay manga Judiyu aw manga Héntil. Aw magi sa pagkamatay nan dun ni krus, pig-agbaꞌ da nan ya nyaka-elet kanaten idtu muna na yan ya pagkamatalapo-on tadun. 15Aw pig-imoꞌ ni Kristu na walaꞌ da ya katundanan na manga suguꞌ dun ni Uldin na manga Judiyu kay yan baling ya nyaka-elet kanaten. Pig-imoꞌ nan yeiy pada ya kadég tadun na nyangintu-u kanan ma-imoꞌ da sambuk na bagu na kasakupan, aw awun da kalinaw adti kadég tadun na manga mangintu-uway. 16Asuntu sa pagkamatay ni Kristu adti krus, pigpalikuꞌ da nan kitadun adti Tyumanem aw pigkamang da nan ya pagkamatalapo-on na manga Héntil aw manga Judiyu, aw adun migkasambuk da ya kadég dun ni palangad lawas ni Kristu. 17Yan saba ya pigkadi ni Kristu ya pagpa-edeꞌ sa Madyaw na Ubat-ubat na yan ya mig-atag sa kalinaw adti kamayu na manga Héntil na mawat sa Tyumanem, aw sa manga Judiyu na malapit adti kanan. 18Kay magi sa pig-imoꞌ ni Kristu kanaten, ya kadég tadun na nyangintu-u kanan pangkay Judiyu aw pangkay Héntil alag da kitadun makapalapit sa Ama magi sa Ispiritu Santo.

19Yanagaw kamu na manga Héntil, bekeꞌ da kamu na dumadayu, manang nyaka-akup da kamu dun ni kasakupan na manga utaw na Tyumanem. Aw ya kasakupan yeiy na manga mangintu-uway, kasiling na pamilya. 20Kitadun na manga mangintu-uway kasiling kitadun na balay. Si Kristu Jisus, yan ya tullukanan na to-o masalig, aw ya manga apostolés aw manga propita na Tyumanem, kasiling silan na manga aligi. 21Aw magi dun ni pagpakasambuk tadun kan Kristu, kasiling kitadun na manga kawuy na paggamiten dun ni pag-imoꞌ sa balay na dayaw mig-idapat, aw pigpadeleg nan ya pag-imoꞌ kanaten témplo na pigtani la adti Tyumanem. 22Aw kamu na manga Héntil, nyakasugpat da kamu uman adti balay yeiy na pig-imoꞌ témplo na pig-eya-an da na Tyumanem magi sa kanan Ispiritu.

Currently Selected:

Épéso 2: klgv

Highlight

Copy

Compare