Épéso 1

1Aku si Pablo ya migsulat adti kamayu. Nya-imoꞌ aku apostol ni Kristu Jisus kay yan saba ya pagbayaꞌ na Tyumanem. Aw pigpadala ku ya sulat ini adti kadég mayu na mangintu-uway na awun ni syudad na Épéso na nyatibulluk dyumalug kan Kristu.

2Padatengen galu adti kamayu ya grasya aw kalinaw na lyumekat adti Tyumanem na yan ya Ama tadun aw adti kan Jisu-Kristu na kanaten Matas na Pangulu.

Ya manga kadyawan na lekat adti Tyumanem

3Naten deyen ya Tyumanem na yan ya Ama na kanaten Matas na Pangulu na si Jisu-Kristu. Kay dun ni pagpakasambuk tadun kan Kristu, pig-atagan kitadun na Tyumanem na madég na kadyawan magi sa Ispiritu Santo, aw alag saba yeiy lekat adti tas na langit. 4Sa walaꞌ pa na Tyumanem imo-a ya kadakulaꞌ na banwa, dadan da kitadun nan pigpamalliꞌ aw pigtani na un makasambuk kan Kristu, pada walaꞌ ya pagsalaꞌ kanaten dun ni asdangan nan. Asuntu sa pagginawa nan kanaten, 5yan ya kanan dadan palpa na ma-imoꞌ kitadun kanan manga mangayseꞌ magi kan Jisu-Kristu, kay yan saba ya makatutuk sa Tyumanem aw yeiy ya kanan pagkaliman. 6Deyen tadun sakanan kay dakulaꞌ ya kanan grasya na pig-atag nan kanaten magi dun ni kanan Iseꞌ na to-o nan pigginawa͡an.

7Pangkay piglakadan tadun ya manga suguꞌ na Tyumanem, manang dun ni pagkamatay na Iseꞌ nan adti krus, piglekat da kitadun na duguꞌ nan aw piglanas da ya manga salaꞌ tadun magi sa kadakulaꞌ na kallat na Tyumanem kanaten. 8Aw asuntu sa kallat nan na walaꞌ ya maka-unawa, pig-atagan kitadun nan na katadeng aw ya pagpaka-edeꞌ sa palpa nan. 9Kay pigbukasan da nan adti kanaten ya kanan palpa na pigtaguꞌ asini muna. Aw dun yeiy katuman ni kan Kristu. 10Aw kun dumateng da ya allaw na pigpamalliꞌ nan dadan, magi dun ni pigpalpa nan, un nan pagsambukun ya kadég na awun ni langit aw ya asini tas na lupaꞌ, aw ya kadég yeiy si Kristu alag ya magdumala.

11Lekat pa asini muna alag pig-imoꞌ na Tyumanem ya kadég magi sa kanan palpa aw pagbayaꞌ. Pigpamalliꞌ kitadun nan dadan na un ma-imoꞌ kanan manga utaw dun ni pagpakasambuk tadun kan Kristu. 12Kami na manga Judiyu ya nyuna nyangintu-u kan Kristu pada deyen nami ya kadyaw na Tyumanem. 13Aw maynan uman kamu, sa pagpakadengeg mayu sa tengteng matinaw na yan ya Madyaw na Ubat-ubat na makapaluwaꞌ kamayu, nyangintu-u kamu kan Kristu. Aw pigbetang na Tyumanem dun ni seled mayu ya Ispiritu Santo na pigpakang nan, aw yeiy ya pangilala na nya-imoꞌ da kamu kanan manga utaw. 14Ya Ispiritu Santo, yan ya palangad eket na tengteng tadun madawat ya kadég na pigpakang kanaten na Tyumanem, dun ni allaw na malingeb da ya paglekat nan kanaten. Yanagaw deyen tadun sakanan asuntu sa kadyaw nan.

Ya pagpanawagtawag ni Pablo adti Tyumanem

15Yanagaw lekat dun ni allaw na dyengeg ku ya kamayu pagpangintu-u sa kanaten Matas na Pangulu na si Jisus aw ya pagginawa mayu sa kadég na mangintu-uway, 16walaꞌ aku teneng sa pagpasalamat adti Tyumanem asuntu kamayu. Aw gayed ta kamu pigngalanan dun ni kanak pagpanawagtawag 17adti Tyumanem na to-o pagbasa͡an na yan ya Ama na kanaten Matas na Pangulu na si Jisu-Kristu. Migsekat aku adti kanan na magi sa Ispiritu nan atagan kamu na katadeng, aw bukasan adti kamayu ya matinaw sa kana Tyumanem, pada to-o pa mayu ka-ede-an sakanan. 18Aw pigsekat ku uman adti kanan na ka-ilawan ya anenganeng mayu pada ka-ede-an mayu kun unu ya un mayu imanen asuntu na pigtawag da kamu na Tyumanem. Aw ka-ede-an mayu uman ya alagaꞌ na un nan atag na to-o madyaw, aw kamu saba na manga mangintu-uway ya un makatagtun. 19Kaliman ku uman na ka-ede-an mayu ya kadakulaꞌ na katulus nan na walaꞌ ya maka-unawa na asini kanaten na manga mangintu-uway. Aw pigpakitaꞌ nan ya kanan katulus dun ni 20pagmataw aw pagpa-ingkud nan kan Kristu adti kalintu nan na adti tas na langit. 21Aw ya pagdumala ni Kristu matas pa kay sa kadég na awun katulus magdumala aw sa manga awun katundanan, pangkay adun na allaw aw pangkay sa dumadateng pa. 22Ya kadég yeiy alag pigpadumala na Tyumanem kan Kristu aw pig-imoꞌ nan ulu sa kadég na manga mangintu-uway. 23Aw kitadun na manga mangintu-uway ya kalingeban sa lawas ni Kristu, aw si Kristu uman ya kalingeban sa kadég.

Currently Selected:

Épéso 1: klgv

Highlight

Copy

Compare