Galasiya 6
6
Ya pagtatabangay
1Kay manga inulug ku na nyangintu-u la, kun awun sambuk na inulug mayu na kyinitaꞌ na mig-imoꞌ sa salaꞌ, kamu na piggagad na Ispiritu Santo ya umbaꞌ tumabang kanan pada makalikuꞌ sakanan adti Tyumanem. Manang pakadyawa ya tingeg mayu kanan. Aw magpakatadeng kamu pagaw kamu uman mabuyu adti pagpakasalaꞌ. 2Gayed kamu pagtatabangay pangkay unu ya manga puluglima na nyakapisan kamayu. Kun imo-un mayu yeiy, dun da mayu katuman ya suguꞌ ni Kristu. 3Kay kun awun sambuk adti kamayu na mig-anenganeng na matas pa sakanan kay sa eped pangkay ya tengteng matinaw walaꞌ ya mabatug nan, na, piggawayan nan baling ya kanan pagka-utawun. 4Madyaw pa ya tagsambuksambuk kamayu anenganengen nan ya kanan imo-unun. Aw tigkas yan, kun ka-ede-an nan na madyaw ya kanan imo-unun, magleya sakanan, aw diliꞌ nan pagpa-unawa ya kanan pagka-utawun adti manga eped nan. 5Kay awun tubagenen na tagsambuksambuk na utaw sa manga pig-imoꞌ nan.
6Ya utaw na pigpalna-uwan sa tingeg na Tyumanem, ka-ilangan tumabang sakanan sa manga kapelekan na migpalna-u kanan.
7Diliꞌ mayu pag-akalan ya pagka-utawun mayu. Ya Tyumanem diliꞌ mabatug gawayan. Kay pangkay unu ya tanemen na utaw, yan uman ya un nan aniyen. 8Maynan uman, kun dalugun na utaw ya pagkaliman na pagka-utawun nan adti pag-imoꞌ sa salaꞌ, yan ya ma-ani nan ya pa-emel-emelen na walaꞌ ya tyamanan. Manang ya utaw na dumalug sa pagkaliman na Ispiritu Santo, yan ya ma-ani nan ya ginawa na walaꞌ ya katigkasan. 9Diliꞌ tadun pag-ilaban ya pag-imoꞌ sa manga imo-unun na madyaw. Kay kun magpadeleg kitadun mag-imoꞌ sa madyaw, dumateng ya allaw na awun aniyen tadun na lekat adti Tyumanem, kun diliꞌ magkalumay ya ginawa tadun. 10Yanagaw pangkay kinunu na awun selat tadun, naten imo-an na madyaw ya kadég na manga utaw, labi la ya manga eped tadun na manga mangintu-uway.
Ya katigkasan na palna-u ni Pablo
11Na, tengtengi mayu ya mangkabaklaꞌ na litra asini katigkasan na sulat ku ini. Kanak da tengteng tulluꞌ ya migsulat seiy.#6:11 Yan ya katanem ni Pablo na awun pagsugu-un nan magsulat sa piglong nan. Manang asini tekap ini, sakanan da ya tengteng migsulat. 12Ya manga utaw na gayed gyumelgel kamayu magpatuliꞌ, kaliman nilan na sayaꞌ na manga eped na Judiyu asuntu sa pagtuman nilan sa katanem yan. Pig-imoꞌ nilan yeiy kay nyallek silan pagaw pamulayaman na manga eped na Judiyu kun mag-ubat-ubat silan na dawaten na Tyumanem ya manga utaw magi oloꞌ sa pagkamatay ni Kristu adti krus. 13Pangkay ya manga utaw yeiy na migpatuliꞌ, walaꞌ nilan kadalug ya kadég na suguꞌ dun ni Uldin. Yan ya du-an na piggelgel kamu nilan magpatuliꞌ kay kaliman nilan magpalibantug adti kanilan eped na manga Judiyu.
14Manang adi kanak, yan oloꞌ ya pigpalibantug ku ya pagkamatay na kanaten Matas na Pangulu na si Jisu-Kristu adti krus. Asuntu sa pagkamatay nan, walaꞌ da aku ka-allang na pagkaliman na manga utaw asini tas na lupaꞌ aw walaꞌ da ya ma-untung nilan adi kanak. 15Kay dun ni kan Kristu, pangkay migpatuliꞌ kitadun aw walaꞌ, yan ya dakulaꞌ na ma-untung tadun, ya pagbagu kanaten na Ispiritu Santo. 16Ya kadég na dumalug sa palna-u ku yeiy, silan ya tengteng manga utaw na Tyumanem. Aw awun galu ni kanilan ya kalinaw na Tyumanem aw ya kanan kallat.
17Yanagaw lekat adun, diliꞌ aku malim na linggalen na pangkay singalan. Kay kyapulba͡an da magi sa manga ulat na kanak kindal, na si Kristu, yan da ya kanak pigdalug.
18Kay manga inulug ku na nyangintu-u, ayin pa aku galu na awun gayed ni kamayu ya grasya ni Jisu-Kristu na kanaten Matas na Pangulu. Amén.
Currently Selected:
Galasiya 6: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
