Colosas 4

1Na, kamu na manga amu, pakadyawa ya kamayu manga allang aw atagan ya umbaꞌ kanilan. Kay kya-ede-an mayu na awun uman amu mayu adti tas na langit.

Ya eped na palna-u adti kadég na manga mangintu-uway

2Na, tibulluka mayu gayed ya kamayu ginawa dun ni pagpanawagtawag, aw pagpakatanaw kamu pagaw makasuway ya kamayu anenganeng. Aw pagpasalamat kamu uman adti Tyumanem. 3Aw panawagtawagi kami uman adti Tyumanem na atagan pa kami nan na dakulaꞌ na selat magpa-edeꞌ sa Madyaw na Ubat-ubat kan Kristu na pigtaguꞌ asini muna. Yeiy saba ya du-an nan na nyakalabusu aku. 4Panawagtawagi mayu uman na to-o ku mabangal ya pagpalna-u kay yan ya imo-unun na pigtaligu kanak na Tyumanem.

5Kun pag-iyeped mayu ya manga utaw na walaꞌ pangintu-u, magpakatadeng kamu sa un mayu imo-un, aw selatan ya pag-imoꞌ sa madyaw adti kanilan. 6Pakadyawa ya kamayu paglong kanilan pada maga͡an ya ginawa nilan dumawat sa kamayu paglongun aw umbaꞌ uman ya tubag mayu sa pangkay singalan ya musip sa pagpangintu-u mayu.

Ya pagpangumusta ni Pablo sa manga mangintu-uway

7Na, si Tikiko ya magpa-edeꞌ kamayu sa pagpakabetang ku asini Roma. Inulug tadun sakanan na pigginawa͡an aw kasaligan dun ni imo-unun na Tyumanem eped nami, aw sugu-anen ni Kristu na migtabang kanak. 8Yan ya du-an nan na pigpakadtu ku sakanan dun ni kamayu na un magpa-edeꞌ kamayu kun unu ya pagpakabetang nami adi pada magkabagseg ya ginawa mayu. 9Aw nyagad kanan si Onésimo na sambuk na inulug tadun na kasaligan aw pigginawa͡an na lekat dun ni kamayu. Duwa silan ya magpa-edeꞌ kamayu kun unu alag ya nya-imoꞌ adi.

10Si Aristarko na eped ku idi kalabusuwanan, nyangumusta sakanan kamayu. Nyangumusta uman kamayu si Markos na kadégan ni Bérnabi. Na, piglongan da ta kamu dadan na kun dumateng si Markos adti kamayu, dawata mayu sakanan. 11Aw nyangumusta kamayu si Joswé na pigngalanan uman na Justo. Ya tulu yeiy, silan oloꞌ ya Judiyu adti manga eped ku na migtabang kanak adi migpa-edeꞌ sa Kasakupan na Pighari-an na Tyumanem. Aw to-o nilan pigpakabagseg ya ginawa ku.

12Si Épapras na taga dun ni kamayu, sambuk uman na sugu-anen ni Kristu Jisus, aw nyangumusta uman kamayu. Gayed sakanan nyatibulluk nyanawagtawag adti Tyumanem na kenneꞌ galu na kasalig na pagpangintu-u mayu, pada ka-ede-an mayu ya kadakulaꞌ na pagkaliman na Tyumanem. 13Makamatinaw aku na to-o dakulaꞌ ya pagud ni Épapras kamayu aw sa manga mangintu-uway na nyeyaꞌ dun ni manga lunsud na La͡odiciya aw Hérapolis.

14Si Lukas na doktor na pigginawa͡an tadun, aw si Démas uman, alag silan nyangumusta kamayu.

15Padatengan mayu ya kanami pagpangumusta adti manga inulug tadun na nyeyaꞌ adti La͡odiciya, dala si Nimpa aw manga mangintu-uway na migkatipun nyanimba dun ni balay nan. 16Pagkatigkas basa͡en ya sulat ini adti kamayu, pabasa͡an mayu uman adti manga mangintu-uway na migkatipun nyanimba adti syudad na La͡odiciya. Aw maynan uman, basa͡en mayu ya sulat na pigpadala ku adti kanilan. 17Aw paglonga mayu kanak si Arkipo na tigkasen nan ya imo-unun na pigtaligu kanan ni Kristu.

18Aku si Pablo ya migsulat sa pangumusta ini. Dun ni kamayu pagpanawagtawag adti Tyumanem, diliꞌ aku mayu pagkalingawan na nyakalabusu pa aku. Ayin pa aku galu na gayed awun ni kamayu ya grasya na Tyumanem.

Currently Selected:

Colosas 4: klgv

Highlight

Copy

Compare