1 Tésalonika 1
1
1Aku si Pablo aw ya kanak manga eped na si Silas aw si Timotiyo un magpadala sa sulat ini adti kamayu na awun ni syudad na Tésalonika na gayed migkatipun nyanimba sa Tyumanem na kanaten Ama aw kan Jisu-Kristu na kanaten Matas na Pangulu.
Padatengen galu na Tyumanem adti kamayu ya kanan grasya aw kalinaw.
Ya pagpangintu-u na manga mangintu-uway dun ni Tésalonika
2Pigpasalamatan nami ya Tyumanem asuntu sa kadég mayu. Aw gayed kamu nami pigpa-eped dun ni kanami pagpanawagtawag 3adti Tyumanem na kanaten Ama. Kay kya-anenganengan nami ya pagpangintu-u mayu aw ya kamayu pagginawa kanan na alag kyinitaꞌ dun ni manga imo-unun mayu. Aw walaꞌ nami uman kalingawi ya pagpadeleg mayu pangkay madég ya pagti-is kay pig-iman mayu ya paglikuꞌ ni Jisu-Kristu na kanaten Matas na Pangulu. 4Kay manga inulug na pigginawa͡an na Tyumanem, kya-ede-an nami na pigpamalliꞌ da kamu nan. 5Kay dun ni pagpa-edeꞌ nami kamayu sa Madyaw na Ubat-ubat kan Kristu, bekeꞌ oloꞌ na tingeg manang pigmatinaw uman na Ispiritu Santo magi sa katulus nan, aw walaꞌ kami pagduwaduwa na yan ya tengteng matinaw. Kyinitaꞌ mayu uman ya bunga na kanami pagpangintu-u talana nami nyeyaꞌ adti sayid mayu, aw nya-edeꞌ kamu na ya kadég na pigpan-imoꞌ nami alag yeiy pada kamayu.
6Aw migsiling kamu kanami aw sa kanaten Matas na Pangulu na si Jisu-Kristu, aw pangkay to-o kamu pigpamulayaman na manga eped na utaw asuntu sa pagpangintu-u mayu, manang dakulaꞌ ya pagleya mayu dyumawat sa tingeg na Tyumanem, aw lekat saba adti Ispiritu nan ya kamayu pagleya. 7Yanagaw nya-imoꞌ da kamu pundinganan adti kadég na mangintu-uway dun ni probinsiya na Macédoniya aw asini probinsiya na Akaya. 8Asuntu kamayu, nyabekkal ya Madyaw na Ubat-ubat kan Jisus, aw bekeꞌ oloꞌ adti Macédoniya aw Akaya, manang kya-ede-an uman adti kadég na manga banwa ya kamayu pagpangintu-u. Yanagaw walaꞌ da ya mapaglong nami adti kanilan sa kamayu pagpangintu-u. 9Kay gayed nilan pigkasampetan ya pagdawat mayu kanami aw ya pag-ayaw mayu sa manga tyumanem na galuꞌ aw yan da ya pigdalug mayu ya tengteng Tyumanem na Gayed Awun. 10Pig-ubat nilan uman ya pagtagad mayu sa paglikuꞌ na Iseꞌ na Tyumanem lekat adti tas na langit na yan si Jisus na pigmataw nan lekat adti pagkamatay, aw yan ya migpaluwaꞌ kanaten lekat adti pa-emel-emel na Tyumanem adti kamoliyan na allaw.
Currently Selected:
1 Tésalonika 1: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
