Colosas 3

1Na, kun nyaka-agad da kamu sa pagkataw ni Kristu, yan ya to-o mayu pagbetangan sa ginawa ya manga adti tas na langit, kay adtu la si Kristu nyingkud adti kalintu na Tyumanem. 2Gayed mayu tibulluka ya kamayu anenganeng sa kadég na awun ni tas na langit, aw bekeꞌ na asini tas na lupaꞌ. 3Kay nyaka-agad da kamu sa pagkamatay ni Kristu, aw nyadawat da mayu ya bagu na ginawa na pigdayaw da adti kan Kristu na adtu la ni sayid na Tyumanem. 4Ya ginawa mayu awun da ni kan Kristu, aw dun ni allaw na pakitaꞌ da sakanan, kamu uman pakitaꞌ eped nan dun ni kalalamdag na kanan pagka Tyumanem.

Ya dadan aw ya bagu na pagka-utawun

5Yanagaw pataya mayu ya pagkaliman na kamayu pagka-utawun na kasiling na pagkasala-enen, aw ya malatay na anenganeng, ya pag-imoꞌ sa makamulamula sa lawas, aw ya manga pigkaliman mayu na diliꞌ madyaw. Aw pataya mayu uman ya pagkaybeg sa manga pametang aw ka-unan na eped na utaw, kay kun unu ya pigkaybegan na utaw, yan ya nya-imoꞌ tyumanem nan. 6Asuntu sa manga imo-unun na maynan, un saba dumateng ya kadaman na Tyumanem adti manga utaw na gayed mig-imoꞌ sa malatay. 7Maynan uman ya kamayu pig-imoꞌ idtu muna sa walaꞌ pa kamu pangintu-u kan Kristu. 8Manang adun, ayawi la mayu ya kadég na imo-unun na malatay. Diliꞌ kamu maksay magkadaman, aw diliꞌ kamu magluduk sa kadaman adti anenganeng mayu. Diliꞌ kamu magpalpa sa malatay adti eped na utaw. Diliꞌ kamu magtanemtanem sa malat. Diliꞌ kamu maglong sa malatay na tingeg adti eped. 9Diliꞌ da kamu maggagalu-ay, kay pigluwas da mayu ya kamayu dadan na pagka-utawun dala ya kadég na imo-unun na malatay. 10Aw asuntu na pigsut da mayu ya bagu na pagka-utawun na pig-imoꞌ na Tyumanem, silingi mayu ya kanan bet pada to-o mayu sakanan ka-ede-an. 11Yanagaw dun ni bagu na pagka-utawun yeiy, mig-unawa la ya Héntil aw Judiyu, pangkay kun pigtuliꞌ aw walaꞌ, pangkay kun nyaka-iskwila aw walaꞌ, aw pangkay allang aw bekeꞌ na allang. Mig-unawa la ya kadég tadun kay nyakasambuk da kitadun adti kan Kristu na yan ya nyeyaꞌ adti seled na kadég tadun.

12Pigpamalliꞌ da kamu na Tyumanem, aw pigtani la kamu nan aw pigginawa͡an. Yanagaw ka-ilangan imo-un mayu ya maynini: Pagkallatan mayu ya kamayu manga eped, aw pagtabangan mayu silan. Pagpadalem kamu, aw pakadyawa ya eped mayu. Tageni ya kamayu kadaman, 13aw magtati-isay kamu. Kun awun diklamu mayu sa kamayu eped, magpasinsiya͡ay kamu baling. Kay piglanas da ni Kristu ya manga salaꞌ mayu, yanagaw pasinsiyayi uman ya kamayu eped. 14Aw ya to-o ka-ilangan, yan ya kamayu paggaginawa͡ay, kay yan ya magpa-iganget sa kadég yeiy pada gayed magkasambuk ya kamayu anenganeng. 15Aw tumbayan na ya kalinaw na pig-atag ni Kristu kamayu, yan ya maggagad sa kamayu anenganeng. Kay pigtawag da kamu nan pada ma-imoꞌ da sambuk na lawas na yan ya manga mangintu-uway. Aw gayed kamu pagpasalamat adti kanan. 16Tumbayan na matmuꞌ ya anenganeng mayu na tingeg ni Kristu. Ya tagsambuksambuk kamayu palna-uwan nan ya kanan manga eped, aw magsasagda͡ay kamu magi sa katadeng na pig-atag kamayu na Tyumanem. Deyenan mayu ya Tyumanem aw pasalamatan mayu sakanan magi sa manga salmo, aw sa manga ubaten, aw sa eped pa na manga tingeg na Tyumanem na pig-imoꞌ da dalangan. 17Aw pangkay unu ya imo-un mayu aw paglongun mayu, imo-a yan dun ni ngalan na kanaten Matas na Pangulu na si Jisus. Aw magi kanan, pasalamati mayu ya Tyumanem na yan ya Ama.

Ya palna-u ni Pablo adti manga ka͡ubayan aw eseg aw mangayseꞌ

18Kamu na manga ka͡ubayan, magpasakup kamu sa kamayu manga eseg kay yeiy ya umbaꞌ imo-un na manga mangintu-uway kan Kristu. 19Kamu na manga eseg, ginawayi ya kamayu manga ka͡ubayan, aw diliꞌ mayu silan to-o pagkadamanan. 20Kamu na manga mangayseꞌ, pagka͡agadan mayu ya kamayu mangkatikadeng kay yan ya makatutuk sa Tyumanem. 21Kamu uman na manga ama, diliꞌ mayu pagpasobla͡an ya pagpitul sa kamayu mangayseꞌ pagaw magkalumay ya ginawa nilan.

Ya palna-u ni Pablo adti manga allang aw manga amu nilan

22Na, kamu na manga allang, dun ni kadég na kamayu imo-unun, pagka͡agadan mayu ya kamayu amu asini tas na lupaꞌ. Diliꞌ kamu oloꞌ magkaseb sa udas na bantayan kamu nilan pada sayaꞌ kamu. Manang tibulluka baling mayu ya pagtuman sa pigsuguꞌ nilan kay kun imo-un mayu yeiy, pigbasa͡an mayu si Kristu.

23Yanagaw pangkay unu ya kamayu imo-un, to-o mayu tibagsegi kay kya-ede-an mayu na si Kristu ya tengteng na amu mayu aw bekeꞌ na utaw. 24Kya-ede-an da mayu na awun saba madawat mayu na lekat adti kan Kristu, kay si Kristu ya tengteng na pigtalabahuwan mayu. 25Aw ya mig-imoꞌ sa malatay, pa-emel-emelen sakanan umbaꞌ sa pig-imoꞌ nan na malatay, kay walaꞌ ya pigkibang na Tyumanem.

Currently Selected:

Colosas 3: klgv

Highlight

Copy

Compare