Colosas 2

1Na, kaliman ku na ka-ede-an mayu na to-o dakulaꞌ ya pagtibagseg ku pada kamayu aw sa kadég na manga mangintu-uway dala ya manga taga La͡odiciya, aw sa eped pa na walaꞌ pakakitaꞌ kanak. 2Ya tud ku yan ya pagpakabagseg sa ginawa na kadég aw gayed kamu magkasambuk dun ni paggaginawa͡ay, pada kalabetan mayu ya palpa na pigtaguꞌ na Tyumanem asini muna na yan si Kristu. 3Kay dun ni kanan pigtaguꞌ na Tyumanem ya kadakulaꞌ na pagka-edeꞌ aw katadeng.

4Piglong ku ya kadég yeiy pada diliꞌ kamu makasuway magi sa tingeg na manga utaw na madyaw pakanyegan. 5Aw pangkay walaꞌ aku dun ni kamayu, manang gayed ta kamu pig-anenganeng, aw dakulaꞌ ya kanak pagleya asuntu na migsambuk ya kamayu anenganeng aw to-o la masalig ya pagpangintu-u mayu kan Kristu.

Si Kristu oloꞌ ya umbaꞌ dalugun

6Yanagaw asuntu na pigdawat da mayu si Kristu Jisus na kanaten Matas na Pangulu, padelega mayu ya pagdalug kanan. 7Aw ya kamayu pagpangintu-u kanan, kasiling galu na kawuy na to-o tyumelled ya dalid. Daluga mayu ya kadég na pigpalna-u kamayu pada to-o pa magkasalig ya pagpangintu-u mayu kanan, aw gayed kamu pagpasalamat adti Tyumanem.

8Magpakatadeng kamu pagaw madala kamu na manga utaw na awun katadeng magpalna-u sa galuꞌ. Kay ya palna-u nilan walaꞌ lekat adti kan Kristu, manang oloꞌ yeiy saba lyumekat adti katanem na pigpadalug na kanilan mangkatikadeng na lekat adti anenganeng na manga utaw. 9Kay awun ni lawas ni Kristu ya kadakulaꞌ na pagka Tyumanem. 10Aw asuntu na nyakasambuk da kamu kanan, nyatagtun da mayu ya kadég na awun ni kanan. Kay si Kristu ya matas pa sa kadég na migdumala.

11Asuntu na awun da kamu uman ni kan Kristu, kasiling na nyatuliꞌ da kamu, manang diliꞌ kasiling na pagtuliꞌ na manga utaw na awun pagkamangen dun ni lawas. Ya pigkamang ni Kristu, yan ya pagkaliman na pagka-utawun mayu mag-imoꞌ sa salaꞌ. 12Aw dun ni pagba͡utismu kamayu, kasiling na nyaka-agad da kamu adti paglebeng kanan aw adti pagkataw nan, magi sa pagpangintu-u mayu sa katulus na Tyumanem na yan ya migmataw kan Kristu. 13Idtu muna kamu na manga Héntil, kasiling na nyatay da kamu kay piglakadan mayu ya manga suguꞌ na Tyumanem, aw gayed kamu pigdumala͡an na dadan na pagka-utawun mayu. Manang adun, nyaka-agad da kamu kan Kristu dun ni pagkataw nan asuntu na piglanas da na Tyumanem ya kadég na manga salaꞌ mayu. 14Aw dun ni pagkalabu kan Kristu adti krus, pigkalat da nan ya manga listahan sa kanaten manga salaꞌ, yanagaw walaꞌ da ya tubagenen tadun dun ni allaw na kanan pag-ukum. 15Magi uman sa pagkamatay ni Kristu adti krus, pigkamang da na Tyumanem ya katulus aw katundanan na manga migdumala na diliꞌ pagkita-en, aw pigbukasan nan adti kadég na dyeg da nan silan.

16Yanagaw, ya-i mayu pagtumbayan na awun magsalaꞌ kamayu asuntu oloꞌ sa pagkan aw pag-inem mayu sa pigpigil nilan, aw asuntu uman na walaꞌ kamu tambung sa manga pista nilan dala ya pista na tagnaꞌ na pagsilat na bulan aw ya kanilan allaw na paglagdeng. 17Ya manga katanem yeiy kasiling oloꞌ na alung na un dumateng. Manang asuntu na dyumateng da si Kristu, yan da saba ya tengteng kalingeban. 18Diliꞌ kamu magpakanyeg sa manga utaw na maglong na diliꞌ kamu makaluwaꞌ kun diliꞌ mayu imo-un ya piggelgel nilan kamayu, kasiling na sallong migpadalem aw migsimba sa manga anghil. Kay awun kunu manga pigpakitaꞌ kanilan na kasiling na tagaynep, yanagaw migpatastas silan, manang ya tengteng matinaw, ya anenganeng nilan na baluk yan ya du-an na migpatastas silan pangkay walaꞌ ya indeganan. 19Ya manga utaw yeiy walaꞌ silan pakasugpat adti kan Kristu na palangad ulu sa manga mangintu-uway. Kitadun saba ya palangad lawas nan. Kay si Kristu pigpakadyaw nan ya pag-isugpat na kadég tadun pada to-o pa magkabagseg ya kanan lawas magi sa tabang na Tyumanem.

Ya bagu na pagka-utawun dun ni kan Kristu

20Na, dun ni pagpakasambuk da mayu kan Kristu, kasiling na nyaka-agad da kamu adti pagkamatay nan, aw pigpaluwaꞌ da kamu lekat adti manga migdumala asini kadakulaꞌ na banwa. Yanagaw anangaꞌ pa mayu silingan ya bet na manga utaw asini tas na lupaꞌ na walaꞌ dalug sa pagkaliman na Tyumanem? Anangaꞌ pa mayu dalugun ya katanem na manga utaw na gyumelgel na miglong: 21“Diliꞌ mayu pag-awidan! Diliꞌ mayu pagtémtéman! Diliꞌ mayu pagdamdamen!” 22Kay ya manga katanem yeiy na pigpalna-u nilan, pig-imo-imoꞌ oloꞌ na utaw. Aw ya kadég na pigpigil nilan, alag saba magkalat. 23Kun anenganengen, iman mu aw matinaw ya pigpalna-u nilan kay nyatibulluk silan dyumalug aw migpadalem silan aw byadasan nilan pya-emel-emel ya kanilan lawas. Manang ya tengteng matinaw, ya pig-imoꞌ nilan yeiy diliꞌ makatabang sa pagtagen sa pagkaliman na pagka-utawun.

Currently Selected:

Colosas 2: klgv

Highlight

Copy

Compare