Pigpan-imo' 28

Si Pablo adti puluꞌ na Malta

1Pagdateng da nami adti ligad, dun da nami ka-ede-i na ya puluꞌ na dyatengan nami pigngalanan na Malta. 2Aw pigdawat kami na manga utaw na nyeyaꞌ dun. Migduluk silan sa atulun kay kyaniki-an kami asuntu na migpalekat da uman ya ulan. 3Aw tyumabang uman si Pablo kanilan aw pigpan-imun nan ya sampisan ya kawuy na sasugung. Manang pagbetang nan sa kawuy dun ni atulun, awun lyumuwaꞌ na ulud asuntu sa kapasuꞌ aw tigkan nan pigbangaꞌ ya kamaw ni Pablo. 4Aw ya manga utaw na nyeyaꞌ dun, pagkitaꞌ nilan sa ulud na nyatatiꞌ adti kamaw ni Pablo, miggumudgumud silan, law nilan, “Ya utaw iyan nyakabunuꞌ sa eped nan. Aw pangkay nyakaluwaꞌ sakanan adti dagat, manang diliꞌ sakanan makaluwaꞌ sa pa-emel-emel na manga diliꞌ pagkita-en na asini kanaten.” 5Manang pyamilipili ni Pablo ya ulud aw nyaka-agbel adti atulun, aw walaꞌ sakanan ka-unu. 6Aw pyakatanawan nilan si Pablo kay iman nilan aw mabagaꞌ ya kamaw nan, aw kun diliꞌ yan, malukad aw matay sakanan. Manang madugay ya pagtagad nilan aw walaꞌ ya nya-imoꞌ kanan na malat, yanagaw nya-uman ya kanilan anenganeng aw law nilan, “Sambuk sakanan na tyumanem!”

7Na, ya baklayan yan tangkil na lupaꞌ ni Publiyo na yan ya malangkaw dun ni puluꞌ. Aw seled na tulungallaw, pigsanggilaꞌ kami nan adti kanan balay. 8Na, kyedelan ya ama ni Publiyo. Aw ya magkedel nan yan ya gayed magkapasuꞌ aw to-o magkedel ya buntit nan. Yanagaw pigkadtuwan ni Pablo adti tambiꞌ nan aw pigpandungan nan na kanan palad aw nyanawagtawag adti Tyumanem. Aw dayaw sakanan kyaguli-an. 9Aw yanagaw ya kadég na awun magkedel dun ni puluꞌ nyadtu silan. Aw ya kadég nilan alag kyaguli-an. 10Aw pyan-atagan kami nilan na madég na dala͡enen. Aw pagdateng na allaw na un da kami sumakay sa barko, dayaw kami nilan pyadala͡an sa kanami kapelekan.

Ya pagpasinan ni Pablo adti Roma

11Seled na tulumbulan ya pag-eyaꞌ nami adti Malta, aw tigkas yan, syumakay da kami uman sa sambuk na barko na migpasaliben dun ni ligad na puluꞌ seled na manga bulan na manikiꞌ.#28:11 Dun ni Dagat na Méditéranyo, diliꞌ magpakapanaw ya barko lekat dun ni bulan na Nubémbri taman adti katigkasan na Pibriro asuntu na to-o manikiꞌ ya manga bulan yan aw madég uman ya bagyuꞌ. Na, ya barko yeiy, lekat adti Aléksandriya aw pyangilala͡an apit adti ma-una na inutaw na pingin na tyumanem na manga Grigo. 12Aw sa pagsakay da nami lekat adti Malta, dyumungguꞌ kami adti syudad na Siracusa, aw nyapit kami seled na tulungallaw. 13Lekat dun, syumakay da kami uman aw dyumateng adti pantalan na Régiyo, banwa na Italiya. Aw pagkasalut na allaw tyumambel ya samet lekat adti Aprika, aw nyabatug ya pagpadeleg nami, aw sa kadwa na allaw nyakadateng kami adti pantalan na syudad na Putéyoli aw dun da kami panog. 14Adti Putéyoli awun pigkitaꞌ nami na manga mangintu-uway aw nyanginayuꞌ silan kanami na meyaꞌ pa kami adti tampid nilan seled na pitungallaw, aw tigkas yan, migpasinan da kami adti dakulaꞌ na syudad na Roma. 15Pagdengeg na manga mangintu-uway dun ni Roma na migpasinan da kami adti kanilan, awun syumungun kanami adti palingki dun ni dalan na pigngalanan na Apiyo, aw eped kanilan syumungun kanami adti banwa na pigngalanan uman na Tulu ya Bantukanan. Pagkitaꞌ ni Pablo kanilan, pigpasalamatan nan ya Tyumanem aw migkabagseg ya ginawa nan.

Si Pablo adti Roma

16Na, pagdateng da nami adti syudad na Roma, pigtumbay kan Pablo ya pag-eyaꞌ adti balay na oloꞌ nan sayda manang awun sundalu na gayed migtungguꞌ kanan.

17Paglabay da na tulungallaw, pigpatawag ni Pablo ya manga mangkatas na manga Judiyu na awun ni Roma. Pagkatipun da nilan adti kanan, pigpalekat ni Pablo ya pagdandan kanilan, law nan, “Kay manga inulug ku na Judiyu, yeiy ya kanak kya-agiyan adti Jérusalim: Pangkay walaꞌ ya nya-imoꞌ ku na salaꞌ adti kanaten eped na manga Judiyu aw adti manga katanem na kanaten tyugbulan, manang pigpadakep aku adti Jérusalim aw pigtumbay aku adti gubirnu na taga Roma. 18Aw pagkatigkas aku sadsadan na manga Romanen, kaliman nilan paluwa-en aku kay walaꞌ ya puliba na umbaꞌ aku ukuman na patayen. 19Manang walaꞌ dawata na manga Judiyu ya pagbayaꞌ nilan. Yanagaw nyaleges aku migsekat na usayan ni César ya limanda nilan kanak, pangkay walaꞌ ya limanda ku sa kanak adti manga Judiyu. 20Pigpatawag ta kamu adun pada magkakita͡ay kitadun aw paglongun ta kamu na ya du-an na pigsangkali-an aku, asuntu oloꞌ na pyangintu-uwan ku ya pig-iman na manga utaw na Isra-él.”

21Manang miglong silan kan Pablo, “Walaꞌ ya nyadawat nami na sulat lekat adti banwa na Judiya na migpa-edeꞌ sa malatay na pig-imoꞌ mu, aw walaꞌ uman ya malatay na piglong kanmu na manga inulug tadun na Judiyu na dyumateng asini Roma. 22Manang kaliman nami dengegen ya kanmu tingeg pada ka-ede-an nami ya kanmu anenganeng. Kay kya-ede-an nami na pangkay ayin kunu na banwa, madég ya miglong sa malat adti sékta na kya-akupan mu.”

23Yanagaw migpakang si Pablo aw ya mangkatas na manga Judiyu dun ni Roma kun unu allawa ya pagkatipun nilan. Aw pagdateng na allaw yan, migkatipun da ya madég to-o na utaw dun ni pig-eya-an ni Pablo, aw migpalna-u sakanan kanilan lekat na maselem taman na gabi. Pig-ubat-ubat nan kanilan ya Kasakupan na Pighari-an na Tyumanem, aw kun singalan si Jisus, dun ni sulat ni Moysis aw manga propita, pada mangintu-u silan kan Jisus. 24Aw awun eped kanilan na nyangintu-u sa piglong nan, manang ya eped walaꞌ pangintu-u. 25Aw asuntu na walaꞌ pag-unawa ya anenganeng nilan sa palna-u ni Pablo, yanagaw awun pa piglong ni Pablo kanilan sa walaꞌ pa silan uliꞌ, law nan, “Matinaw agaw ya piglong na Ispiritu Santo adti kanaten tyugbulan asini muna, kay pigpasulat nan kan Isayas na propita:

26 ‘Kadtuwi ya manga utaw yeiy aw paglonga silan:

“Pangkay gayed mayu pyakanyegan, manang walaꞌ mayu kalabeti,

aw pangkay gayed mayu pyaninaw, manang diliꞌ mayu kita-en.

27 Mangkategel ya anenganeng na manga utaw yeiy.

Pigsengseng da nilan ya kanilan manga talinga pada diliꞌ silan makadengeg,

aw pigpileng da nilan ya kanilan manga mata pagaw ka-ede-an nilan ya matinaw aw magselsel silan aw lanasen ya manga salaꞌ nilan.” ’ #28:26-27 Mabasa adti Isayas 6:9-10.

28Yanagaw pada ka-ede-an mayu, pigsuguꞌ na Tyumanem na ubat-ubatan da ya manga Héntil pada mabatug silan paluwa-en lekat adti pa-emel-emel nan. Kay silan saba ya magpakanyeg.” 29[Pagkatigkas da ni Pablo maglong, nyan-uliꞌ ya manga Judiyu aw to-o silan mig-ayil sa piglong nan.]

30Seled na duwangka͡umay, nyeyaꞌ si Pablo adti balay na kanan pagbayadan. Aw pangkay singalan ya mawun ni kanan, pagpapaniken nan 31aw pig-ubat-ubat nan kanilan ya Kasakupan na Pighari-an na Tyumanem aw pigpalna-u nan si Jisu-Kristu na yan ya Matas na Pangulu. Walaꞌ ya kakallekan ni Pablo mig-ubat-ubat kanilan, aw walaꞌ ya nyaka-ampang sa pag-ubat-ubat nan.

Currently Selected:

Pigpan-imo' 28: klgv

Highlight

Compare

Copy