Pigpan-imo' 24

Ya pag-usay ni Gubirnador Félix kan Pablo

1Na, paglabay da na limangallaw, dyumateng dun ni Césariya lekat adti Jérusalim si Ananiyas na yan ya pangulu na manga magdadugsu-ay, aw si Tértulo na sambuk na talaglawung, aw manga magdadumala͡ay sa manga Judiyu. Nyadtu silan adti asdangan ni Gubirnador Félix aw pigpadateng nilan ya kanilan limanda kan Pablo. 2Pigpatawag ni Félix si Pablo, aw sa dun da silan alag ni asdangan nan, migpalekat si Tértulo migdandanen sa limanda nilan kan Pablo, law nan, “Kay Gubirnador Félix na pagbasa͡an: Asuntu sa kadyaw na pagdumala mu, migkadugay ya kalinaw asini nasud ini, aw madég ya pig-imoꞌ mu na madyaw 3na diliꞌ nami kalingawan. Yanagaw dakulaꞌ ya kanami pagpasalamat kanmu. 4Manang diliꞌ aku malim magsalang kanmu. Yanagaw nyanginayuꞌ aku kanmu na pakanyegan mu dagawdagaw ya kanami paglongun. 5Ya utaw ini asdangan mu, yan ya gayed paglekatan sa gubut. Pangkay ayin ya kadtuwan nan na banwa, dyumala sakanan sa kasamuk adti kadég na manga Judiyu. Aw sambuk sakanan uman na maggagaday sa manga utaw dun ni sékta na Nasaréno. 6Pangkay ya kanami Témplo piglipa-an nan galu magi sa pagpa-agad nan sa utaw na Héntil. Yanagaw pigdakep nami sakanan, 7[manang dyumateng ya komandér na si Lisiyas aw pigleges nilan pigkamang si Pablo lekat adti kanami. 8Aw pigsuguꞌ kami nan na madi asdangan mu.] Magi sa kanmu pagsadsad sa utaw ini, dun mu ka-ede-i na matinaw ya kanami limanda kanan.” 9Aw ya kadég na piglong ni Tértulo kan Félix alag pigmatinaw na manga Judiyu na migkatipun dun.

10Pagkatigkas yan, pigpulingenan na gubirnador si Pablo na yan da uman ya maglong, aw tyumubag si Pablo, law nan: “Kay Gubirnador, nya-edeꞌ aku na madugay da ya pag-ukum mu asini nasud ini. Aw yanagaw, migleya aku na mabatug ku tamengan ya kanak pagka-utawun asini asdangan mu. 11Kun sadsadan mu, ka-ede-an mu na bagu sampuluꞌ tag duwa (12) ya allaw na lyumabay lekat adti pagdateng ku dun ni Jérusalim na un manimba adti Témplo. 12Aw walaꞌ aku nilan saba kita-a na migpa-ayil sa pangkay singalan dun ni seled na Témplo aw walaꞌ aku uman nilan kita-a na miggubut adti manga sinagoga aw pangkay adti kadakulaꞌ na Jérusalim. 13Diliꞌ nilan mabatug matinawun ya manga limanda nilan kanaken. 14Iman nilan aw sékta kami, manang bekeꞌ na maynan. Pa-edeꞌ ku kanmu na pigsimba ku ya Tyumanem na kanami tyugbulan aw pigdalug ku ya palna-u ni Jisus. Aw pyangintu-uwan ku ya kadakulaꞌ na Uldin na pig-atag kan Moysis aw ya pigsulat na manga propita. 15Aw kasiling na madég na Judiyu, yan uman ya pig-iman ku na matawun na Tyumanem ya kadég na utaw na nyangkamatay, dala ya dyumalug sa pagkaliman nan aw dala uman ya walaꞌ dalug. 16Yanagaw pigtibagsegan ku na malinis ya kanak anenganeng na diliꞌ aku pagsala-en na Tyumanem aw manga utaw.

17“Na, pagkatigkas na pilangka͡umay, lyumikuꞌ aku adti Jérusalim na un mag-ated sa tabang na pig-amut na manga utaw adti sambuk na banwa, aw yan uman ya sambuk na tud ku na madtu ni Témplo na un matag sa dugsuꞌ adti Tyumanem. 18Aw talana ku adti Témplo, kyumitaꞌ kanak ya manga utaw ini na nyatigkas da ku ya manga imo-unun na un tumanen dun ni kanami Uldin pada kalinisan aku. Tabay ya manga utaw dun ni Témplo, aw walaꞌ saba ya paggubut. 19Manang awun eped na manga Judiyu dun ni Témplo na lekat adti probinsiya na Asia, aw kun awun diklamu nilan kanak, silan galu ya madi asdangan mu. 20Manang asuntu na walaꞌ silan asini, usipa ya manga utaw ini kun unu ya nya-imoꞌ ku na salaꞌ na kyinitaꞌ nilan idtu na pag-usay kanak adti matas na usayanan. 21Yan oloꞌ ya piglong ku ya mabagseg na tingeg dun ni asdangan nilan, na yan ya du-an nan na pig-usayan aku kay pig-iman ku na un pa matawun ya nyangkamatay.”

22Aw asuntu na dakulaꞌ ya kya-ede-an ni Félix dadan sa manga utaw na dyumalug sa palna-u ni Jisus, pigpateneng pa nan ya pag-usay. Aw miglong sakanan kan Pablo, “Tagadan pa ku ya pagdateng ni Komandér Lisiyas. Tigkas yan, ka-ede-an da mu ya kanak pagbayaꞌ sa piglimanda nilan kanmu.” 23Pagkatigkas yan, pigsuguꞌ ni Félix ya kapitan na tunggu-an pa si Pablo manang tumbay kanan na makaluwa-luwaꞌ na dagawdagaw. Aw pigtumbay nan uman na tanawun si Pablo na manga ubaybay nan aw dala͡an nilan sakanan sa manga kapelekan nan.

Ya pagpakanyeg ni Félix aw ni Drusila sa pig-ubat-ubat ni Pablo

24Pagkatigkas na pilangallaw, lyumikuꞌ si Félix aw nyagad kanan ya ka͡ubayan nan na si Drusila. Na, si Drusila, Judiyu sakanan. Pigpatawag ni Félix si Pablo aw pigpakanyegan nan ya pag-ubat-ubat ni Pablo sa pagpangintu-u kan Kristu Jisus. 25Piglongan nan si Félix kun unu ya madyaw imo-un na utaw adti anenganeng na Tyumanem, aw kun unun na utaw ya pagtagen sa pagkaliman na pagka-utawun nan, aw kun unu ya pag-ukum na un dumateng. Aw nyallek si Félix sa piglong nan. Yanagaw piglongan nan si Pablo, “Umbaꞌ pa dun! Kun awun selat ku, pakadiyen da ta kaw uman salut.” 26Aw pig-iman uman ni Félix na atagan sakanan ni Pablo na kuwalta na tagu-taguꞌ. Yanagaw malikit nan pagpatawag si Pablo aw migbalawbalaw silan. 27Manang pagkatigkas da na duwangka͡umay, kyasayuwan da si Félix ni Porsyo Fésto sa pagka gubirnador. Aw asuntu na kaliman ni Félix na katutukan kanan ya manga Judiyu, yanagaw pigpabaya-an nan si Pablo aw walaꞌ da nan paluwa-a adti kalabusuwanan.

Currently Selected:

Pigpan-imo' 24: klgv

Highlight

Compare

Copy