Pigpan-imo' 20

Ya panaw ni Pablo adti Grécia aw Macédoniya

1Pagkatigkas da na gubut, pigpatawag ni Pablo ya manga mangintu-uway dun ni Épéso na un magkatipun, aw pigpakabagseg nan silan. Aw tigkas yan, nyanabi sakanan kanilan aw nyindeg da pasinan adti probinsiya na Macédoniya. 2Aw lekat dun, madég ya manga banwa na pigkadtuwan nan aw gayed nan pigpakabagseg ya manga mangintu-uway. Aw lyumos sakanan adti probinsiya na Grécia. 3Aw nyeyaꞌ pa sakanan dun seled na tulumbulan. Tigkas yan, migpalpa si Pablo sumakay sa barko pasinan adti Sirya. Manang pagka-edeꞌ nan na pigbantakan sakanan na manga utaw na Judiyu, yanagaw lyumikuꞌ sakanan adti Macédoniya. 4Aw nyagad kanan si Sopater na iseꞌ ni Pirro na taga Bérya, aw si Aristarko aw si Ségundo na alag taga Tésalonika, aw si Gayo na taga Dérbi, aw si Timotiyo, aw ya duwa uman na taga Asia na si Tikiko aw si Tropimo. 5Aw pagdateng nami adti Pilipos, nyuna ya manga eped ni Pablo adti Troas aw adtu silan pagtagad kanami. 6Pagkatigkas da na Pista na Pan na Walaꞌ Patulina, pig-indegan nami ya Pilipos, aw syumakay sa barko. Pagkatigkas na limangallaw, dyumateng kami adti Troas, aw migkitaꞌ kami ya manga eped nami na nyaka-una, aw dun da kami pag-eyaꞌ seled na sangkasimana.

Ya pagkataw ni Yutiko lekat adti pagkamatay

7Pagdateng na allaw na Linggo, migkatipun kami ya manga mangintu-uway na un magsambuk kuman. Aw migpalekat si Pablo migpalna-u mendaꞌ na migtengaꞌ ya gabi, kay pagka͡allaw un sakanan manaw. 8Na, adtu ni katlu na kansad awun madég na saleng, aw kya-ilawan ya gibalayan na kyatipunan nami. 9Aw talana ni Pablo mig-ubat-ubat, nyantaw adti bintanaꞌ ya sambuk na eseg na bagu pa ya ginawa na si Yutiko, aw pigtudtud sakanan. Aw asuntu sa kadugay na pagpalna-u ni Pablo, nyakatulug si Yutiko, aw tigkan yan kolug, aw tulungkansad ya katas na kyolugan nan taman adti lupaꞌ. Aw pig-engat nilan na walaꞌ da ya ginawa. 10Manang nyanog si Pablo aw piglebleban nan aw kepkepa. Aw miglong si Pablo, “Diliꞌ kamu magkallek kay nyataw da sakanan.” 11Paglikuꞌ ni Pablo adti tas, kyuman ya kadég nami. Tigkas yan, migpadeleg pa sakanan mig-ubat-ubat mendaꞌ na migpakallawunun, aw pagkatigkas nan magpalna-u, nyindeg sakanan. 12Aw si Yutiko, pya-agad na manga utaw nyuliꞌ, aw to-o silan migleya kay nyataw da sakanan.

Ya pagtipun ni Pablo sa manga maggagaday na taga Épéso

13Yanagaw syumuway kanami si Pablo, aw nyuna kami kanan syumakay sa barko pasinan adti pantalan na Asos, kay ya palpa ni Pablo na manaw da sakanan pasinan adtu aw apiten da nami adti Asos. 14Aw sa pagdateng da nami dun, nyanik sakanan sa barko aw syumakay eped nami pasinan adti pantalan na Mitiléné. 15Pagkatigkas nami mapit dun ni Mitiléné, syumakay da kami uman aw pagkasambuk na allaw pigdipagan da nami ya puluꞌ na Kiyos. Aw pagkasalut da na allaw nyapit da kami uman adti puluꞌ na Samos, aw pagkasalut pa uman na allaw dyumateng kami adti pantalan na Miléto. 16Kay yan ya kaliman ni Pablo na diliꞌ da mapit adti Épéso pagaw masalang sakanan dun ni probinsiya na Asia, kay migkagallat sakanan adti Jérusalim pada tumambung sa Pista na Allaw na Péntékostés.

17Sa bagu pa kami dyumateng adti Miléto, pigpatawag ni Pablo adti sayid nan ya manga maggagaday sa manga mangintu-uway na awun ni Épéso. 18Pagdateng nilan adti Miléto, miglong si Pablo kanilan, “Kay manga inulug, kya-ede-an da mayu ya kanak manga imo-unun idtu muna sa pag-eyaꞌ ku adti sayid mayu, lekat pa adti tagnaꞌ na pagdateng ku asini probinsiya na Asia. 19Dun ni kanak imo-unun na pig-atag na kanaten Matas na Pangulu, walaꞌ aku pagpatastas pangkay ya manga luwaꞌ ku gayed nyangkataktak. Pangkay pigpakalugan aku na manga kadégan ku na Judiyu aw byantakan aku nilan, manang gayed ku dyalug ya suguꞌ ni Jisus. 20Aw kya-ede-an mayu uman na dun ni pag-ubat-ubat ku walaꞌ ya pigtaguꞌ ku pangkay sambuk, manang pigbukasan ku adti kamayu pada magkasalig ya pagpangintu-u mayu. Pigpalna-uwan ta kamu dun ni katipun mayu aw pangkay adti kamayu manga balay. 21Alag ku pig-ubat-ubatan ya manga Judiyu aw ya manga Héntil, na magselsel silan aw lumikuꞌ adti Tyumanem aw pangintu-uwan nilan ya kanaten Matas na Pangulu na si Jisu-Kristu. 22Aw manaw da aku adun adti Jérusalim kay yan ya suguꞌ kanak na Ispiritu Santo. Aw walaꞌ ku ka-ede-i kun unu ya un ku datengan dun. 23Yan oloꞌ ya kya-ede-an ku na pangkay ayin na syudad aw lunsud ya kadtuwan ku, pigpa-edeꞌ aku dadan na Ispiritu Santo na madég ya kalugan na dumateng pa kanak aw dala ya pagkalabusu kanak. 24Manang diliꞌ ku demet ya kanak pagka-utawun. Yan oloꞌ ya kaliman ku na tigkasen ya manga imo-unun na pigtaligu kanak na Matas na Pangulu tadun na si Jisus, na yan ya pagpa-edeꞌ sa Madyaw na Ubat-ubat sa kallat na Tyumanem.

25“Na, ya kadég mayu na pigpalna-uwan da ku sa paghariꞌ na Tyumanem, kya-ede-an ku adun na diliꞌ da kitadun salut magkakita͡ay. 26Yanagaw paglongun ta kamu adun, kun awun dun ni kamayu na diliꞌ makaluwaꞌ lekat adti pa-emel-emel na Tyumanem, na, bekeꞌ da yan na kanak salaꞌ. 27Kay walaꞌ ya pigtaguꞌ ku kamayu pangkay sambuk. Pigbangal da ku kamayu ya kadakulaꞌ na pagkaliman na Tyumanem aw ya kanan palpa. 28Yanagaw pakatanawi mayu ya kamayu pagka-utawun aw ya kadég na manga mangintu-uway na pigtaligu kamayu na Ispiritu Santo, aw sanggila-a mayu ya kadég na nyangintu-u na pigbayadan da na Tyumanem magi sa duguꞌ na Iseꞌ nan. 29Kay kya-ede-an ku na kun walaꞌ da aku asini sayid mayu, awun sumeled adti kamayu katipun na magpalna-u sa galuꞌ pada pasuwayen kamu dala ya manga mangintu-uway na pigtaligu kamayu. Ya manga magpalna-uway yeiy, un kamu saba nilan kalaten na walaꞌ ya pagkallat. 30Aw bekeꞌ na yan oloꞌ, manang awun uman utaw na lekat dun ni kamayu na magpalna-u sa galuꞌ na magpasuway sa manga mangintu-uway pada ya kanilan palna-u yan da ya dalugun. 31Yanagaw gayed kamu magpakatadeng. Anenganenga mayu ya pag-eyaꞌ ku adti sayid mayu seled na tulungka͡umay. Allaw aw gabi, walaꞌ ku patenenga ya pagpalna-u adti kadég mayu pangkay to-o aku migti-is.

32“Aw adun, taligu la ta kamu adti Tyumanem, aw tabangan kamu na kanan tingeg. Kay ya tingeg nan yan ya magpa-edeꞌ sa kallat nan aw magpakabagseg sa pagpangintu-u mayu, aw dun da mayu ka-ede-i na atag nan saba ya kanan pigpakang adti manga utaw na pigtani la nan. 33Na, walaꞌ aku kaybeg sa kuwalta aw kadégkadég mayu, 34aw kya-ede-an mayu na migtalabahu aku pada awun pagkamangan nami ya kanak manga eped sa kanami manga kapelekan. 35Aw sa kadég na pig-imoꞌ ku, pigpakitaꞌ ku kamayu ya kaseb na umbaꞌ mayu silingan kay ka-ilangan makatabang kamu sa manga utaw na walaꞌ ya pagkamangan. Aw diliꞌ mayu pagkalingawan ya piglong ni Jisus na kanaten Matas na Pangulu, na ‘Madyaw to-o ya kana utaw na nyatag kay sa pig-atagan.’ ”

36Pagkatigkas ni Pablo maglong, lyumuhud sakanan eped nilan aw nyanawagtawag adti Tyumanem. 37Aw to-o silan migsasugaway aw pigkepkep nilan si Pablo#20:37 Pigsulat adti tingeg na Grigo na pig-alekan nilan si Pablo kay yan ya katanem na manga utaw na Grigo. 38kay to-o migkalat ya ginawa nilan asuntu sa piglong nan na diliꞌ da nilan sakanan kita-en salut. Pagkatigkas yan, pig-ated nilan adti pantalan na un manik sa barko.

Currently Selected:

Pigpan-imo' 20: klgv

Highlight

Compare

Copy