Pigpan-imo' 19

Si Pablo adti Épéso

1Na, talana ni Apolos adti Corinto, nyanaw si Pablo aw pig-agiyan nan ya manga kabuntudan na awun ni manga banwa na Pisidiya aw Pridya, aw lyumos adti syudad na Épéso. Pagdateng nan dun, awun pigkitaꞌ nan na manga mangintu-uway kan Jisus, 2aw pig-usip nan silan, law nan, “Sa pagpangintu-u mayu, nyadawat da mayu ya Ispiritu Santo?” Aw tyumubag silan, “Walaꞌ pa nami dengega na awun kadiꞌ Ispiritu Santo.” 3Yanagaw nyusip si Pablo kanilan, “Na, kun maynan, unu ya kyalabetan mayu sa pagba͡utismu kamayu? Kanyan palna-u ya pigdalug mayu?” Aw tyumubag silan, “Kan Juan na Magba͡utismuway.” 4Aw miglong si Pablo kanilan, “Madyaw saba ya palna-u ni Juan, kay gayed nan pig-ubat-ubatan ya manga utaw na magselsel silan aw magpaba͡utismu silan. Aw pigpa-edeꞌ nan uman na awun pa makamoli kanan aw yan ya umbaꞌ pangintu-uwan. Aw yan si Jisus.” 5Pagdengeg nilan sa piglong ni Pablo, yanagaw migpaba͡utismu silan dun ni ngalan na kanaten Matas na Pangulu na si Jisus. 6Pagkatigkas yan, pigpandungan silan ni Pablo na kanan palad, aw dyumateng kanilan ya Ispiritu Santo. Aw nyakapaglong silan sa madég na punganan na manga tingeg na walaꞌ pa nilan lemena paglongan, aw mig-ubat-ubat silan sa pigpa-edeꞌ kanilan na Tyumanem. 7Aw ya kadég nilan, manga sampuluꞌ tag duwa (12) na tumalag eseg.

8Na, seled na tulumbulan, kada simana na Allaw na Paglagdeng, syumeled si Pablo adti sinagoga dun ni Épéso. Aw walaꞌ ya kakallekan nan migpadeleg migpalna-u sa manga utaw kun unu ya kakawasan na Kasakupan na Pighari-an na Tyumanem. Aw dun ni pagbilingbiling nilan sa palna-u nan, pigtibagsegan nan na makalabet silan pada magagad silan mangintu-u kan Jisus. 9Manang awun eped kanilan na mangkategel ya anenganeng, aw walaꞌ silan kalim pangintu-u sa palna-u nan. Aw dun ni asdangan na kadég na awun ni sinagoga, miglong silan sa malatay adti palna-u ni Pablo. Yanagaw pig-ayawan silan ni Pablo aw pigpa-agad nan ya manga nyangintu-u la kan Kristu, aw migkatipun silan adti iskwilahan ni Tirano. Aw dun da silan ni Pablo palna-uwi kada allaw. 10Aw yeiy ya pig-imoꞌ nan seled na duwangka͡umay. Yanagaw nyabekkal ya palna-u kan Kristu lekat adti tingeg na Tyumanem, aw dyengeg na kadég na utaw na nyeyaꞌ dun ni probinsiya na Asia, pangkay Judiyu aw pangkay Héntil.

11Madég ya pig-imoꞌ na Tyumanem na manga milagru magi kan Pablo. 12Pangkay ya manga panyuꞌ aw manga tuwalya ni Pablo, pigdala adti pyangkedelan, aw dayaw pyangkaguli-an ya magkedel nilan, aw ya eped na manga utaw lyumuwaꞌ lekat adti kanilan ya manga busaw. 13Manang awun uman eped na manga Judiyu na gayed miglegeb sa banwa yan aw mig-alilin sa manga busaw. Aw adun pigdala la nilan ya ngalan ni Jisus dun ni pag-alilin nilan sa manga busaw, law nilan, “Pigsuguꞌ ta kaw dun ni ngalan ni Jisus na pig-ubat-ubat ni Pablo, luwaꞌ kaw!” 14Aw maynan ya pig-imoꞌ na pitu ya mangayseꞌ ni Iskiba na eseg. Na, si Iskiba, sambuk kunu sakanan na mangkatas na magdadugsu-ay na manga Judiyu. 15Manang tyumubag kanilan ya busaw, law nan, “Pigkilala ku si Jisus, aw kyilala ku uman si Pablo, manang walaꞌ ta kamu kilala͡a kun singalan kamu!” 16Aw pigkugpan silan na utaw na syeledan na busaw, aw byadasan nan silan pigbenget mendaꞌ na walaꞌ da ya kadégkadég nilan. Aw nyalaguy silan lekat adti balay yan na tumalag paliꞌ. 17Ya kadég na nya-imoꞌ yeiy, dyengeg na manga utaw na Judiyu aw Héntil na nyeyaꞌ dun ni Épéso, aw alag nyallek ya kadég nilan, aw pigbasa͡an nilan ya ngalan ni Jisus. 18Aw ya syampetan nan, madég ya mangintu-uway kan Jisus na mig-ubat adti eped nilan sa manga imo-unun nilan na tagu-taguꞌ aw pigselselan nilan. 19Aw dun ni kanilan, madég ya anituwan na nyandala sa libréto na yan ya lyekatan sa kanilan katadeng aw pigluduk nilan dun ni asdangan na manga utaw aw sangaba. Aw pig-iyap nilan ya alagaꞌ na manga libréto na nyasangab, aw dyumateng adti kalima͡an kamalalan (50,000) ya drakma.#19:19 Ya sangka drakma yan ya umbaꞌ pagtandan sa sangallaw na utaw magtalabahu. 20Yanagaw nyabekkal ya palna-u kan Kristu lekat adti tingeg na Tyumanem, aw to-o migkadég ya manga mangintu-uway.

Ya dakulaꞌ na gubut dun ni Épéso

21Pagkatigkas yan, piggagad si Pablo na Ispiritu Santo na betang adti kanan ginawa ya pagkadtu ni Jérusalim, manang un pa mapit adti manga probinsiya na Macédoniya aw Akaya. Aw law nan, “Kun matigkas da ya panaw ku adti Jérusalim, ka-ilangan madtu pa aku uman ni syudad na Roma.” 22Aw pigpa-una nan ya duwa na tyumabang kanan na si Timotiyo aw si Érastos adti Macédoniya, manang migpatagak pa sakanan adti probinsiya na Asia.

23Na, dun ni manga allaw na nyeyaꞌ pa si Pablo adti Épéso, awun dakulaꞌ na gubut dun ni syudad asuntu sa palna-u kan Jisus. 24Kay ya du-an nan awun eseg na si Dimitriyo na magtu-angay sa bulawan na maputiꞌ, aw pigtu-ang nan ya manga mayantek na balaybalay kasiling na témplo na tyumanem nilan na si Artémis. Pigtandanan nan ya manga eped nan na magtatu-angay aw pigbaligyaꞌ nilan ya kanilan manga pig-imoꞌ. 25Aw pigtipun ni Dimitriyo ya manga utaw na pigpantandanan nan aw manga eped na mag-imo-ay, aw law nan, “Kay manga inulug, kya-ede-an da mayu na dakulaꞌ ya nyakuwalta tadun asini kanaten talabahu. 26Manang kyinitaꞌ aw dyengeg da mayu ya utaw yan na si Pablo aw ya palna-u nan. Madég ya utaw na nyagagad nan, bekeꞌ oloꞌ na asini Épéso, manang adti kadakulaꞌ na probinsiya na Asia. Aw yan ya pigpalna-u nan na bekeꞌ kunu na tengteng Tyumanem ya manga inutaw na pig-imoꞌ na utaw. 27Unu ya un datengan na talabahu tadun kun gayed nan paglongan na malat ya manga pametang na pig-imoꞌ tadun? Bekeꞌ na yeiy oloꞌ, manang malagak saba ya kadengeg na kanaten tyumanem na si Artémis aw ya témplo nan! Diliꞌ da madi ya madég na utaw asini Asia aw kadakulaꞌ na banwa na un magsimba kan Artémis, aw diliꞌ da kita-en ya kanan kanenggeya adti seled na témplo nan.”

28Pagkadengeg na manga utaw sa piglong ni Dimitriyo, to-o silan nyadaman, aw mig-iyak-iyak silan, law nilan, “To-o madyaw si Artémis! Deyen tadun na manga Épésuwanen si Artémis!” 29Aw walaꞌ kadugay, nyagubut ya kadég na utaw dun ni Épéso. Aw pigdulus nilan ya eped ni Pablo na si Gayo aw si Aristarko na taga Macédoniya, aw piggakgak nilan pasinan adti katipunanan dun ni syudad. 30Pagdengeg ni Pablo sa nya-imoꞌ adti syudad, kaliman nan galu maglong adti manga utaw dun ni katipunanan, manang pigtagenan sakanan na manga mangintu-uway. 31Aw ya manga ubaybay uman ni Pablo na mangkalangkaw dun ni probinsiya na Asia, awun pigsuguꞌ nilan adti kanan na diliꞌ sakanan pakadtuwun. 32Na, adtu ni katipunanan to-o migkawayit ya manga utaw. Ya manga eped, walaꞌ kabangal ya pigkawayit nilan. Aw madég kanilan ya walaꞌ paka-edeꞌ kun unu ya tud na pagkatipun nilan dun. 33Manang awun manga utaw na Judiyu dun ni katipun, aw kaliman nilan pa-atubang si Aléjandro adti kadég na manga utaw kay yan kunu ya magpa-edeꞌ na walaꞌ ya labet na manga Judiyu sa pig-imoꞌ nan Pablo. Yanagaw migpulingen si Aléjandro na diliꞌ da silan magkawayit. 34Manang sa pagka-edeꞌ na manga utaw na si Aléjandro utaw na Judiyu, mig-iyak-iyak silan, “To-o madyaw si Artémis! Deyen tadun na manga Épésuwanen si Artémis!” Aw walaꞌ silan teneng seled na duwangka udas.

35Manang ya magsulatay na syudad nyabatug nan ya pagpatinep sa kawayit na manga utaw, law nan, “Kay manga ubaybay ku na taga Épéso, singalan utawa asini ya walaꞌ paka-edeꞌ na kitadun ya pigtaliguwan sa pagtungguꞌ sa témplo na kanaten tyumanem na si Artémis? Kay ya kanaten banwa ya kyolugan na inutaw nan lekat adti langit. 36Singalan utawa ya un magbalyaw sa piglong ku yeiy? Yanagaw diliꞌ kamu magkawayit aw diliꞌ da kamu mag-imoꞌ sa gubut, 37kay ya manga utaw na dyala mayu asini, walaꞌ saba ya tyakaw nilan lekat adti témplo tadun, aw walaꞌ ya piglong nilan na malatay adti kanaten tyumanem. 38Yanagaw kun awun diklamu ni Dimitriyo aw manga eped nan na mag-imo-ay adti pangkay singalan utawa, kadtuwan nilan galu ya manga mag-usayay aw manga magdadumala͡ay sa syudad. Aw dun da nilan limanda͡an. 39Aw kun awun eped na diklamu na pangkay singalan kamayu, madyaw pa usayen dun ni allaw na pagkatipun tadun, diliꞌ da asini, 40pagaw dengegen na manga migdumala adti Roma na awun gubut asini kanaten aw pagaw kitadun baling ya pasala-en nilan. Walaꞌ ya indeganan tadun saba maggubut.” 41Aw pagkatigkas nan maglong, pigpa-uliꞌ nan ya manga utaw.

Currently Selected:

Pigpan-imo' 19: klgv

Highlight

Compare

Copy