Pigpan-imo' 18

Si Pablo adti syudad na Corinto

1Walaꞌ kadugay, nyindeg si Pablo lekat adti Aténas aw nyanaw pasinan adti Corinto. 2Aw dun ni Corinto, bagu nan pigkilala ya sambuk na utaw na Judiyu na pigngalanan na Akila. Na, si Akila taga probinsiya na Ponto idtu muna, aw madugay silan ya ka͡ubayan nan na si Priscilla nyeyaꞌ adti probinsiya na Italiya. Manang awun suguꞌ na impirador na si Cla͡udiyo na alilinan ya kadég na manga Judiyu lekat adti syudad na Roma, sakup na Italiya. Yanagaw dyumateng si Akila aw si Priscilla adti syudad na Corinto. Aw nyadtu si Pablo adti sayid nilan. 3Aw nyeyaꞌ pa dun aw syumambuk kanilan sa talabahu, kay alag silan magtaté-ay sa madakmel na manggad na pag-imo-un layaglayag. 4Aw kada simana na Allaw na Paglagdeng, nyadtu si Pablo ni sinagoga aw migbalawbalaw sa manga Judiyu aw manga Grigo aw migbilingbiling eped nilan, kay kaliman nan mangintu-u silan kan Kristu.

5Pagdateng ni Silas aw ni Timotiyo dun ni Corinto lekat adti Macédoniya, nyatibulluk ya ginawa ni Pablo adti pag-ubat-ubat sa manga Judiyu aw gayed nan pigmatinaw adti kanilan na si Jisus, yan ya Misiyas. 6Manang pig-ampangan aw pigsupla baling nilan sakanan. Yanagaw pigtaptap nan ya alikabuk adti kadégkadég nan aw law nan kanilan, “Walaꞌ da ya labet ku kamayu! Kamayu la yan salaꞌ kun pa-emel-emelen kamu na Tyumanem! Lekat adun adtu la aku pagpalna-u adti manga utaw na Héntil.” 7Yanagaw pig-ayawan nan ya manga Judiyu dun aw nyadtu ni balay ni Tito Justo aw dun pag-eyaꞌ adti sayid nan. Na, si Tito Justo, utaw sakanan na Héntil aw nyanimba sa Tyumanem, aw dun ni tangkil na balay nan ya sinagoga. 8Aw ya sambuk na magdadumala͡ay adti sinagoga na si Crispo, nyangintu-u la sakanan kan Jisus dala ya kadég na ka-epedanan nan dun ni balay. Aw madég pa uman ya manga utaw dun ni Corinto na migpakanyeg sa palna-u ni Pablo aw nyangintu-u uman aw migpaba͡utismu silan.

9Na, sambuk na gabi, migpakitaꞌ kan Pablo si Jisus na kasiling na tagaynep, law nan, “Diliꞌ kaw magkallek! Diliꞌ mu pagpatenengen ya paglong sa kanak tingeg adti kanilan. 10Kay gayed ta kaw agad-agadan. Walaꞌ ya utaw na un magpakalat kanmu. Kay madég pa ya utaw asini syudad ini na un pa mangintu-u kanak.” 11Yanagaw nyatingen pa si Pablo adti syudad na Corinto seled na sangka͡umay aw tengaꞌ, aw gayed nan pigpalna-u adti manga utaw ya tingeg na Tyumanem.

12Pag-ingkud da ni Galyon na gubirnador sa probinsiya na Akaya, migsambuk ya ginawa na manga Judiyu na walaꞌ pangintu-u dun ni Corinto na limanda nilan si Pablo aw pigpa-agad nilan adti asdangan na ingkudanan na pag-ukum na gubirnador, 13aw law nilan, “Ya utaw ini, gayed miggagad sa manga utaw adti sangkamuluꞌ na pa-agi sa pagsimba sa Tyumanem, aw ya imo-unun nan lyumakad baling sa bala-ud tadun.” 14Manang sa un da galu maglong si Pablo, tyumubag si Galyon adti manga Judiyu, “Ya limanda mayu yeiy, kun tengteng kyalakadan nan ya bala-ud tadun, aw kun malat ya pig-imoꞌ nan, awun indeganan ku pakanyegan ya diklamu mayu. 15Manang kun yan ya pig-ayilan mayu ya kakawasan na manga tingeg mayu aw ya manga ngalan na utaw aw ya kamayu Uldin na dyalug na manga Judiyu, walaꞌ ya labet ku kamayu mag-usay. Kamu la ya pagbayaꞌ.” 16Aw pigpa-alilinan nan silan lekat adti asdangan na kanan ingkudanan na pag-ukum. 17Aw asuntu na walaꞌ pagbetangan sa ginawa na gubirnador ya limanda nilan, pig-agaw nilan si Sosténés na yan ya sambuk na magdadumala͡ay sa sinagoga, aw byadasan nilan pyanumbag adti pamanag na usayanan na gubirnador. Manang pigpalipaslipasan ni Galyon ya pig-imoꞌ nilan.

Ya paglikuꞌ ni Pablo adti Antiyokiya sakup na Sirya

18Na, nyeyaꞌ pa na madugaydugay si Pablo dun ni Corinto, aw tigkas yan, nyanabi sakanan sa manga mangintu-uway dun aw nyanaw pasinan adti pantalan na Cénkriya. Pagdateng nilan dun, migpabulu si Pablo asuntu sa sapaꞌ nan adti Tyumanem. Tigkas yan, syumakay sakanan sa barko pasinan adti Sirya. Aw nyagad si Akila aw ya ka͡ubayan nan na si Priscilla. 19Aw sa pag-apit nilan adti pantalan na Épéso, migpatagak si Akila aw si Priscilla dun. Aw nyadtu si Pablo ni sinagoga aw migbalawbalaw sa manga Judiyu na nyanimba dun. 20Aw pagkatigkas nan magpalna-u kanilan, kaliman nilan na madugay pa galu si Pablo meyaꞌ adti sayid nilan. Manang walaꞌ sakanan kalim pagpatagen kanilan adti panaw nan, 21aw law nan, “Liku-an ta kamu kun tumbay na Tyumanem.” Aw nyanik si Pablo sa barko aw syumakay pasinan adti Sirya.

22Pagdateng ni Pablo adti pantalan na Césariya, nyadtu sakanan adti Jérusalim aw nyapit adti manga mangintu-uway na nyanimba dun. Pagkatigkas na tud nan adti Jérusalim, nyanaw da uman pasinan adti Antiyokiya. 23Pagkatigkas na pag-eyaꞌ nan dun na pilangallaw, nyindeg sakanan pasinan adti probinsiya na Galasiya aw banwa na Pridya, aw pigpakasalig nan ya pagpangintu-u na kadég na manga mangintu-uway dun ni manga banwa yan.

Ya pagpalna-u ni Apolos

24Na, dyumateng adti Épéso ya sambuk na eseg na Judiyu na pigngalanan na Apolos na taga syudad na Aléksandriya. Si Apolos to-o sakanan matadeng maglong aw dakulaꞌ ya kya-ede-an nan sa pigpasulat na Tyumanem asini muna. 25Dadan da sakanan kyapalna-uwan kan Jisus, yanagaw nyatibulluk ya ginawa nan mag-ubat-ubat, aw matulid ya palna-u nan kun singalan si Jisus. Manang ya ba͡utismu na kya-ede-an nan, yan oloꞌ ya kan Juan. 26Aw migpalekat si Apolos mig-ubat-ubat adti seled na sinagoga na walaꞌ ya kakallekan. Pagpakadengeg ni Akila aw ni Priscilla sa ubat-ubat nan, pigpa-agad nilan sakanan adti kanilan balay. Aw dayaw nilan si Apolos pigpalna-uwan, aw kyadugangan ya kya-ede-an nan sa manga pa-agi na Tyumanem. 27Pagkatigkas yan, migpalpa si Apolos tumalipag sa dagat taman adti probinsiya na Akaya. Aw pigpakabagseg na manga mangintu-uway dun ni Épéso sa palpa nan, aw pigsulatan nilan ya manga mangintu-uway adti Akaya pada dawaten nilan si Apolos. Pagdateng nan dun, dakulaꞌ ya nyatabang nan sa manga utaw na nyangintu-u la magi sa kallat na Tyumanem, 28kay dun ni asdangan na manga utaw, pigdeg nan ya manga Judiyu na migbilingbiling sa palna-u nan. Kay pigmatinaw nan lekat adti pigpasulat na Tyumanem na si Jisus, yan ya Misiyas.

Currently Selected:

Pigpan-imo' 18: klgv

Highlight

Compare

Copy