Pigpan-imo' 17

Si Pablo aw si Silas adti syudad na Tésalonika

1Na, pig-agiyan nilan ya manga syudad na Ampipolis aw Apolonya pasinan adti syudad na Tésalonika#17:1 Ya Tésalonika, yan ya ulu na probinsiya na Macédoniya. na awun sinagoga na manga Judiyu dun. 2Pagdateng nilan, nyadtu si Pablo ni sinagoga aw syumeled dun ni katipun kay yan ya kanan kyanalaman. Aw seled na tulungkasimana, kada Allaw na Paglagdeng, pig-ubat-ubat nan sa manga Judiyu ya pigpasulat na Tyumanem, 3aw pigpalabet nan kanilan na ya Kristu ka-ilangan magti-is aw mataw lekat adti pagkamatay. Aw miglong sakanan, “Si Jisus na pig-ubat-ubat ku kamayu, yan saba ya Misiyas na kamayu pigtagadan.” 4Aw awun manga Judiyu na migpakanyeg kanan aw eped kanilan nyagagad ni Pablo aw ni Silas. Aw madég ya Héntil na dadan da nyanimba sa Tyumanem manang bagu silan mangintu-u kan Jisus, dala ya eped na mangkadengeg na ka͡ubayan dun ni syudad.

5Manang awun manga utaw na Judiyu na nyingaꞌ kan Pablo aw kan Silas. Yanagaw migtipun silan sa manga utaw dun ni palingki na malatay ya bet na walaꞌ ya manga talabahu, aw madég ya eped na utaw na nyaka-akup kanilan, aw alag silan migpanggubut adti seled na syudad. Aw pigsulung nilan ya balay ni Jason kay un nilan paninawun si Pablo aw si Silas aw kaliman nilan pa-agad adti asdangan na manga utaw. 6Manang walaꞌ nilan kita-a si Pablo aw si Silas. Yan ya pigleges nilan pya-agad si Jason aw manga eped na mangintu-uway, aw piggakgak nilan adti asdangan na manga magdadumala͡ay sa syudad aw piglimanda nilan, “Ya manga utaw yeiy, migpanggubut silan pangkay ayin na banwa, aw dyumateng da silan asini kanaten, 7aw dyawat ni Jason adti balay nan. Gayed silan kunu miglong na awun sambuk na hariꞌ na yan kunu si Jisus, yanagaw gayed ya kadég nilan nyatu sa manga suguꞌ ni Impirador César.” 8Pagdengeg na manga utaw aw manga magdadumala͡ay sa limanda nilan, nyagubut silan. 9Yanagaw dyumawat silan sa piyansa kan Jason aw manga eped nan, aw pigpaluwaꞌ da nilan.

Si Pablo aw si Silas adti lunsud na Bérya

10Pagkagabi la, pigpapanaw na manga mangintu-uway dun ni Tésalonika si Pablo aw si Silas pasinan adti lunsud na Bérya. Pagdateng nilan dun, nyadtu silan ni sinagoga na manga Judiyu. 11Na, ya manga utaw na Judiyu adti Bérya maksay silan magdawat sa palna-u ni Pablo aw ni Silas kay sa manga Judiyu adtu ni Tésalonika, aw kada allaw pigsadsadan nilan kun matinaw aw kun galuꞌ ya pigpalna-u nilan. 12Aw ya syampetan nan, madég kanilan ya nyangintu-u kan Jisus, eped nilan ya madég na manga ka͡ubayan na Grigo na to-o pigkilala aw eped na manga eseg. 13Manang ya manga Judiyu na taga Tésalonika, pagka-edeꞌ nilan na si Pablo ya mig-ubat-ubat sa tingeg na Tyumanem adti Bérya, dyumalug silan uman adtu pada magtanemtanem sa malat adti kanan aw pada magubut ya manga utaw dun. 14Aw maksay si Pablo pig-ated na manga mangintu-uway adti ligad na dagat, manang si Silas aw si Timotiyo migpatagak pa silan dun ni Bérya. 15Ya manga utaw na mig-ated kan Pablo, nyagad silan uman taman adti syudad na Aténas. Aw sa paglikuꞌ nilan adti Bérya, pyamene-an silan ni Pablo na paglongun si Silas aw si Timotiyo na maksay silan dumalug adti sayid nan dun ni Aténas.

Si Pablo adti syudad na Aténas

16Talana ni Pablo tyumagad kan Silas aw kan Timotiyo adti syudad na Aténas, migkalat ya ginawa nan kay pigkitaꞌ nan dun na to-o madég ya manga inutaw na pig-imoꞌ nilan tyumanem. 17Yanagaw syumeled sakanan dun ni sinagoga pada magbalawbalaw sa manga Judiyu aw sa manga Héntil na dadan nyanimba sa Tyumanem, aw migbilingbiling eped nilan sa palna-u na Tyumanem. Aw kada allaw maynan uman ya pig-imoꞌ nan adti palingki. 18Walaꞌ kadugay, migkitaꞌ si Pablo aw manga magpalna-uway na lekat adti iskwilahan na manga Épikuryo aw adti iskwilahan na manga Éstoyko,#17:18 Ya manga Épikuryuwanen dyumalug sa palna-u ni Épikuryo. Aw yan ya kanan palna-u na dalugun mu ya makapaleba kanmu asini tas na lupaꞌ. Ya manga Éstoyko dyumalug sa palna-u ni Zéno. Aw yan ya kanan palna-u na magtagen galu ya manga utaw sa ginawa nilan, aw gagaden silan galu na anenganeng nilan na madyaw. Ya duwa yeiy, alag silan utaw na Grigo. aw pigpalekat nilan ya pagbilingbiling sa palna-u ni Pablo. Ya eped kanilan miglong, “Pada-padaꞌ da ya piglong na utaw iyan!” Aw ya eped miglong, “Dun ni pag-ubat-ubat nan iman mu awun pa eped na manga tyumanem adti mawat na banwa na walaꞌ tadun ka-ede-i.” Maynan ya piglong nilan kay pig-ubat-ubat ni Pablo si Jisus, aw pigpalna-u nan uman ya pagkataw na manga utaw lekat adti pagkamatay. 19Yanagaw pigpa-agad nilan si Pablo adti Ariyopago na yan ya pigkatipunan dun ni tenga-tengaꞌ na syudad. Aw miglong silan kanan, “Kaliman nami galu ka-ede-an ya bagu na palna-u na pig-ubat-ubat mu. 20Kay walaꞌ pa nami dengega ya palna-u na maynan asini banwa ini. Yanagaw pa-ede-an kanami aw unu ya kakawasan nan.” 21Na, ya manga utaw na taga Aténas aw ya manga dumadayu, gayed nilan pigbalawbalawan ya pangkay unu na palna-u na dyumateng adti kanilan.

22Yanagaw nyindeg si Pablo adti asdangan na manga utaw na migkatipun dun ni Ariyopago, aw law nan, “Kay manga utaw na taga Aténas, kyinitaꞌ ku na to-o kamu nyatibulluk migsimba sa manga tyumanem mayu. 23Kay sa paglegeb ku asini syudad mayu, kyinitaꞌ ku ya madég to-o na manga inutaw na manga tyumanem mayu. Awun pa kyinitaꞌ ku na sambuk na dugsu-anan na dadan da pigsulatan sa tingeg ini: ‘Yeiy ya dugsu-anan adti sambuk na tyumanem na walaꞌ kilala͡a.’ Yanagaw, kay manga utaw na taga Aténas, un ta kamu ubatan kun singalan ya Tyumanem yeiy na walaꞌ pa mayu kilala͡a. 24Ya Tyumanem yeiy, yan ya mig-imoꞌ sa kadakulaꞌ na banwa aw sa kadég na asini tas na lupaꞌ. Aw asuntu na tagtun sakanan sa kadég na awun ni langit aw lupaꞌ, walaꞌ sakanan pag-eyaꞌ adti seled na manga témplo na pig-imoꞌ oloꞌ na manga utaw. 25Walaꞌ sakanan pagsekat sa tabang na manga utaw kay yan saba ya lyekatan sa ginawa na kadég, aw yan uman ya nyatag sa kadakulaꞌ na kapelekan tadun. 26Asini muna, pig-imoꞌ nan ya tagnaꞌ na utaw na yan ya tyugbulan na kadég na pigpa-eyaꞌ nan asini tas na lupaꞌ, aw migbuwadbuwad silan taman na nya-imoꞌ ya kadég na nasud. Aw pigpalpa dadan na Tyumanem ya manga eletanan na manga nasud, aw kun sangunu ya kadugay na pag-eyaꞌ na manga utaw dun. 27Ya kadég yeiy pig-imoꞌ na Tyumanem pada paninawun sakanan na manga utaw aw kita-en nilan, manang diliꞌ to-o mawat ya Tyumanem adti tagsambuksambuk kanaten. 28Kasiling na paglongun na manga utaw asini muna: ‘Ya mig-atag kanaten sa ginawa, yan uman ya migdiyaga kanaten dun ni pag-eyaꞌ aw dun ni manga imo-unun tadun.’ Aw miglong uman asini muna ya sambuk na tyugbulan mayu na matadeng mag-ubaten, law nan: ‘Kitadun saba ya kanan manga buwadbuwad.’

29“Yanagaw kun kitadun ya buwadbuwad na Tyumanem, diliꞌ da kitadun mag-anenganeng na mig-unawa ya pagka Tyumanem nan aw ya manga inutaw na pig-imoꞌ lekat adti bulawan, aw adti bulawan na maputiꞌ, aw adti batu, aw pangkay unu na pig-imoꞌ na utaw na lyumekat adti katadeng nilan. 30Asini muna, walaꞌ na manga utaw ka-ede-i ya Tyumanem, yanagaw pigpabaya-an pa nan silan. Manang adun, pigsuguꞌ da nan ya kadég na manga utaw adti kadég na banwa na magselsel silan sa manga imo-unun nilan na malatay. 31Kay un dumateng ya allaw na dadan da nan pigpamalliꞌ na un nan ukuman ya kadég na utaw magi sa sambuk na utaw na pigsuguꞌ da nan, aw matinaw ya kanan pagbayaꞌ. Aw pigmatinaw da na Tyumanem adti kadég na utaw kun singalan ya pigsuguꞌ nan, kay pigmataw nan lekat adti pagkamatay.”

32Pagdengeg da na manga utaw sa ubat-ubat ni Pablo na awun pagkataw, awun eped dun ni kanilan na mig-odoy-odoy kanan. Manang awun manga eped kanilan uman na miglong kanan, “Likuꞌ kaw salut adi kay kaliman pa nami magpakanyeg sa palna-u mu.” 33Aw lyumuwaꞌ si Pablo lekat adti katipun nilan, 34manang awun uman manga utaw na dyumalug kanan aw nyangintu-u la, dala si Dyonisyo na yan ya sambuk na mag-usayay adti Ariyopago, aw ya sambuk uman na ka͡ubayan na si Damaris. Aw awun pa manga eped na nyangintu-u.

Currently Selected:

Pigpan-imo' 17: klgv

Highlight

Compare

Copy