Pigpan-imo' 14

Si Pablo aw si Bérnabi adti Ikoniyo

1Na, talana nilan adti Ikoniyo, syumeled silan adti sinagoga na manga Judiyu aw migpalna-u silan. Aw madég ya manga Judiyu aw Héntil na nyangintu-u kan Jisus. 2Manang awun eped na manga Judiyu na kyumele sa palna-u nilan, aw pigsutsutan nilan ya manga Héntil na walaꞌ pangintu-u, pada kadamanan nilan ya manga bagu nyangintu-u kan Jisus. 3Madugay si Pablo aw si Bérnabi nyeyaꞌ dun ni lunsud yan aw pig-ubat-ubat nilan si Jisus na walaꞌ ya kakallekan. Aw ya Tyumanem yan ya migmatinaw sa piglong nilan sa kanan kallat, magi sa manga pangilala aw manga milagru na pigpa-imoꞌ nan kanilan. 4Na, nyatengaꞌ ya manga utaw na nyeyaꞌ dun ni Ikoniyo. Awun manga utaw na tyumandeꞌ sa palna-u ni Pablo aw ni Bérnabi, aw awun uman manga utaw na tyumandeꞌ sa manga Judiyu.

5Walaꞌ kadugay, migkasambuk ya manga Judiyu aw manga Héntil na walaꞌ pangintu-u dala ya manga migdumala kanilan, aw migpalpa silan na pamulayaman nilan ya manga apostolés aw badasan nilan na babintu. 6Manang pagka-edeꞌ na manga apostolés sa palpa nilan, nyalaguy silan pasinan adti manga syudad na Listra aw Dérbi dun ni banwa na Lica͡oniya aw palibed nan. 7Aw pigpa-edeꞌ nilan dun ya Madyaw na Ubat-ubat kan Jisus.

Si Pablo aw si Bérnabi adti Listra aw Dérbi

8Na, dun ni Listra awun sambuk na eseg na gayed nyingkud kay kapig ya manga siki nan. Lekat pa na pagka͡utaw nan, walaꞌ sakanan pakapanaw. 9Aw migpakanyeg sakanan sa palna-u ni Pablo. Aw sa pag-inunu ni Pablo kanan, kya-ede-an nan na dakulaꞌ ya pagpangintu-u na utaw yeiy na kaguli-an sakanan. 10Yanagaw miglong si Pablo kanan sa mabagseg na tingeg, “Indeg kaw!” Aw tigkan mig-ugpasen ya eseg aw migpanawpanaw da sakanan. 11Pagkitaꞌ na manga utaw sa nya-imoꞌ ni Pablo, mig-iyak-iyak silan dun ni kanilan tingeg na Lica͡oniyanen na maglong, “Ini ya manga tyumanem na migtimbaluyan utaw na dyumateng asini kanaten!” 12Aw pigtawag nilan si Bérnabi na Ze͡us aw si Pablo pigtawag nilan uman na Hérmés kay si Pablo yan ya matadeng maglong.#14:12 Nyangintu-u ya manga utaw na Grigo na si Ze͡us yan ya pangulu sa kadég na kanilan manga tyumanem. Aw si Hérmés, yan ya sambuk kunu na tyumanem nilan na to-o matadeng maglong. 13Na, ya témplo ni Ze͡us awun ni luwaꞌ na inalad na syudad, aw dun panimba ya manga utaw na Lica͡oniyanen na gayed magdugsuꞌ kanan. Awun sambuk na magdadugsu-ay dun ni témplo yan, aw migpa-angay sakanan sa duwa ya baka na pigkapun aw dayaw nilan pigpamalyegan na bulak, aw pigdupput nilan adti suwangan na inalad na syudad na un nan pagdugsuꞌ eped na manga utaw adti kan Pablo aw kan Bérnabi. 14Manang pagka-edeꞌ ni Pablo aw ni Bérnabi na un da silan dugsu-an na manga utaw, pigkéséꞌ nilan ya kanilan kadégkadég kay walaꞌ silan katutuki sa pigpan-imoꞌ na manga utaw. Aw maksay silan adti tengaꞌ na katipun na manga utaw aw pigsagda nilan, law nilan, 15“Ya-i mayu pag-imo-a yan! Utaw saba kami oloꞌ kasiling mayu! Nyadi kami na un magpa-edeꞌ kamayu sa Madyaw na Ubat-ubat pada diliꞌ da mayu dalugun ya manga tyumanem mayu na galuꞌ na walaꞌ ya guna, manang yan baling ya dalugun mayu ya Tyumanem na Gayed Awun na mig-imoꞌ sa langit aw lupaꞌ aw dagat aw sa kadég na awun ni kanilan. 16Asini muna, pigpabaya-an na Tyumanem ya manga tyugbulan na kadég na manga utaw na mag-imoꞌ sa pangkay unu ya kaliman nilan imo-un. 17Manang madég ya manga puliba lekat adti kanan pada kilala͡en sakanan na manga utaw magi sa madég na pigpan-imoꞌ nan na madyaw: Pig-atagan kamu nan na ulan, aw pigpatulin nan ya manga tanem mayu pada awun kanen mayu aw to-o kamu magleya.” 18Pangkay maynan ya manga piglong ni Pablo aw ni Bérnabi, walaꞌ da galu nilan katageni ya manga utaw na magdugsuꞌ kanilan.

19Manang awun manga Judiyu na dyumateng dun na lekat adti Antiyokiya sakup na Pisidiya, aw lekat uman adti Ikoniyo. Aw piggagad nilan ya madég na manga utaw, aw yan ya syampetan nan, byadasan nilan si Pablo na babintu. Aw pigguyud nilan adti luwaꞌ na lunsud, kay iman nilan aw nyatay da sakanan. 20Manang pigtabangan si Pablo na manga bagu mangintu-uway kan Kristu, aw migbangun sakanan aw lyumikuꞌ adti seled na lunsud. Pagkasalut na allaw, nyagad da kan Bérnabi pasinan adti Dérbi.

Ya paglikuꞌ ni Pablo aw ni Bérnabi adti Antiyokiya sakup na Sirya

21Pagdateng da ni Pablo aw ni Bérnabi adti syudad na Dérbi, pigpa-edeꞌ nilan ya Madyaw na Ubat-ubat, aw madég ya utaw na nya-imoꞌ mangintu-uway kan Jisus. Pagkatigkas yan, pigliku-an nilan ya kanilan pig-agiyan idtu muna adti Listra aw Ikoniyo aw Antiyokiya sakup na Pisidiya. 22Pigpakabagseg nilan ya ginawa na manga mangintu-uway, law nilan, “Pagpadeleg kamu sa pagpangintu-u mayu pangkay dumateng ya madég na kalugan. Kay ka-ilangan saba ka-agiyan ya kadég yeiy na manga un sumeled adti Kasakupan na Pighari-an na Tyumanem na adti tas na langit.” 23Aw adti manga banwa yeiy na awun manga mangintu-uway na nyanimba sa Tyumanem, nyamalliꞌ si Pablo aw si Bérnabi sa manga utaw na un maggagad kanilan. Aw nyanawagtawag silan adti Tyumanem aw migpuwasa, aw pigtaligu nilan adti kan Jisus ya manga bagu pigpamalliꞌ, kay si Jisus ya kanilan pyangintu-uwan.

24Pagkatigkas yan, nyagi silan adti Pisidiya aw dyumateng adti probinsiya na Pampilya. 25Aw pagkatigkas nilan mag-ubat-ubat sa tingeg na Tyumanem dun ni syudad na Pérga, tyumubang silan adti pantalan na Atalya. 26Aw syumakay silan sa barko pasinan adti Antiyokiya sakup na Sirya. Kay ya Antiyokiya dun silan panawagtawagi na manga mangintu-uway idtu muna, pada tabangan silan na Tyumanem dun ni manga imo-unun na pigtaligu kanilan. Aw adun da, nyatigkas da ya manga imo-unun yeiy.

27Pagdateng da nilan dun, pigpantipun nilan ya kadég na manga mangintu-uway, aw pigdandan nilan ya kadég na pigpan-imoꞌ na Tyumanem magi kanilan aw ya pag-atag nan sa selat adti manga Héntil pada mangintu-u silan kan Jisus. 28Aw nyeyaꞌ pa silan dun na madugaydugay adti sayid na manga mangintu-uway kan Jisus.

Currently Selected:

Pigpan-imo' 14: klgv

Highlight

Compare

Copy