Pigpan-imo' 13

Ya pagtani aw pagpadala kan Bérnabi aw kan Saulo

1Na, dun ni manga mangintu-uway na migkatipun nyanimba adti Antiyokiya, awun manga propita na Tyumanem aw manga utaw na matadeng magpalna-u sa tingeg nan. Silan si Bérnabi, aw si Simyon na pagsagnayen na Négro, aw si Lucio na taga Ciréné, aw si Mana-in, aw si Saulo. Si Mana-in, migpan-itulin silan si Hérodés Antipas. 2Talana na kadég nilan nyanimba sa Tyumanem aw migpuwasa, piglongan silan na Ispiritu Santo, “Taniya mayu kanak si Bérnabi aw si Saulo kay pigtawag da ku silan aw awun imo-unun na un ku atag kanilan.” 3Pagkatigkas nilan magpuwasa aw manawagtawag, pigpandungan nilan na kanilan manga palad si Bérnabi aw si Saulo aw nyanawagtawag silan salut adti Tyumanem na pakadyawun nan ya duwa yeiy. Aw tigkas yan, pigpapanaw da nilan.

Si Bérnabi aw si Saulo adti puluꞌ na Cipré

4Na, asuntu na pigsuguꞌ na Ispiritu Santo si Bérnabi aw si Saulo, nyanaw silan pasinan adti pantalan na Séléyuciya. Lekat dun, syumakay silan sa barko pasinan adti puluꞌ na Cipré. 5Aw nyagad kanilan si Juan na pigngalanan uman na Markos na un tumabang kanilan. Pagdateng da nilan adti pantalan na Salamina dun ni puluꞌ na Cipré, nyadtu silan ni manga sinagoga na un pa-edeꞌ adti manga Judiyu ya Madyaw na Ubat-ubat kan Jisus. 6Pagkatigkas yan, piglegeb nilan ya kadakulaꞌ na puluꞌ aw nyakadateng silan adti lunsud na Papos. Dun ni banwa yan, awun pigkitaꞌ nilan na anituwan na sallong kunu propita na pigngalanan na Bar-Jisus. Judiyu sakanan, 7aw ubaybay uman na gubirnador na si Sérgiyo Pa͡ulo. Ya gubirnador yeiy, to-o sakanan matadeng, yanagaw pigpatawag nan si Bérnabi aw si Saulo kay kaliman nan magpakanyeg sa tingeg na Tyumanem. 8Manang dun uman si Bar-Jisus na pigngalanan adti tingeg na Grigo: Élimas. Aw sa talana ni Bérnabi aw ni Saulo mig-ubat-ubat adti asdangan ni Sérgiyo, gayed ni Élimas pig-ampangan ya palna-u nilan pada diliꞌ mangintu-u si Sérgiyo. 9Manang si Saulo na pigngalanan uman na Pablo nyatmuꞌ na katulus na Ispiritu Santo, aw pigtengtengan nan si Élimas, 10aw law nan, “Iseꞌ kaw na busaw! Po-on kaw na kadég na pagkaliman na Tyumanem! Gayed mu piggawayan ya manga eped mu aw pig-akalan mu silan. Walaꞌ ya katantanan na pag-imoꞌ mu sa malatay kay gayed mu pagsayuwan na galuꞌ ya tingeg na Tyumanem! 11Na! Un da kaw pa-emel-emelen na Tyumanem. Lekat adun, diliꞌ kaw kumitaꞌ seled na pilangallaw, aw pangkay kalalamdag na sega diliꞌ mu kita-en.” Aw dun da pagkangitngit ya pag-inunu nan aw walaꞌ da sakanan kitaꞌ. Aw nyandamdam da sakanan aw gayed nyaninaw sa utaw na un mag-agak kanan. 12Pagkitaꞌ na gubirnador sa nya-imoꞌ dun, to-o sakanan nya-enneng-enneng sa katulus na Tyumanem aw nyangintu-u kan Jisus na pigpalna-u nilan.

Si Pablo aw si Bérnabi adti Antiyokiya sakup na Pisidiya

13Na, syumakay si Pablo aw ya manga eped nan sa barko lekat adti Papos pasinan adti probinsiya na Pampilya. Pagdateng nilan adti syudad na Pérga, pig-ayawan silan ni Juan Markos aw nyuliꞌ sakanan adti Jérusalim. 14Manang migpadeleg pa si Pablo aw si Bérnabi nyanaw aw dyumateng silan adti lunsud na Antiyokiya na awun ni banwa na Pisidiya.#13:14 Ya Antiyokiya asini birsikulu, yeiy ya sakup na Pisidiya, aw ya sambuk na Antiyokiya, yan ya sakup na Sirya. Pagdateng da na Allaw na Paglagdeng, syumeled silan adti sinagoga aw nyingkud dun ni sayid na manga utaw. 15Aw pigbasa adti asdangan nilan ya Uldin aw ya pigsulat na manga propita. Tigkas yan, migsuguꞌ ya manga magdadumala͡ay sa sinagoga na paglongun si Pablo aw si Bernabi, law nilan, “Kay manga inulug, kun awun palna-u mayu na magpakabagseg sa ginawa na manga utaw, ubatan da mayu.”

16Yanagaw nyindeg si Pablo dun ni asdangan nilan aw pigpulingenan nan silan pada matinep ya manga utaw. Aw migpalekat mig-ubat-ubat kanilan, law nan, “Kamu na manga buwadbuwad ni Isra-él aw kamu uman na manga Héntil na gayed nyanimba sa Tyumanem, pakanyegi mayu ya un ku paglongun: 17Ya Tyumanem na pigsimba na buwadbuwad ni Isra-él, dadan da nan pigpamalliꞌ ya manga tyugbulan tadun asini pa muna pada ma-imoꞌ kanan manga utaw. Seled na pag-eyaꞌ nilan adti banwa na Ihiptu, migkadég silan aw pigtabangan nan silan. Tigkas yan, pigpakitaꞌ nan kanilan ya kanan katulus dun ni pag-allad nan kanilan lekat adti banwa yan. 18Aw seled na kapatan (40) ya umay talana nilan miglegeblegeb adti kaligbinan, pigtagenan na Tyumanem ya kadaman nan sa manga salaꞌ nilan. 19Aw pagdateng da nilan adti banwa na Canaan, pigkalat nan ya pitu ya nasud dun ni seled na Canaan dala ya manga utaw na nyan-eyaꞌ dun, pada tagtunun na kanan manga utaw ya banwa yan na dadan da nan pigpakang na atag adti manga tyugbulan tadun. 20Na, lekat adti pagdateng nilan adti Ihiptu taman na nyatagtun nilan ya banwa na Canaan, upatenggatus aw kalima͡an (450) ya umay.

“Aw pagkatigkas yan, nyamalliꞌ ya Tyumanem sa manga mag-usayay kanilan na gayed migsayusayu migdumala, taman na manga allaw ni Samwél na propita. 21Pagkatigkas yan, migsekat silan adti Tyumanem na atagan silan na hariꞌ. Yanagaw pig-atag nan kanilan si Sa-ul na iseꞌ ni Kis na lekat adti buwadbuwad ni Bénjamin, aw yan ya migdumala sa manga utaw na Isra-él seled na kapatan (40) ya umay. 22Aw sa pagkatigkas da na pag-alilin na Tyumanem kan Sa-ul, yan ya pigsayu nan si Dabid na un magdumala kanilan. Aw pigsayaꞌ sakanan na Tyumanem, law nan, ‘Si Dabid na iseꞌ ni Jési na eseg, yan ya utaw na to-o nyakatutuk kanak, aw un nan tumanen ya kadég na pagkaliman ku.’ 23Aw lekat adti kanan buwadbuwad ya Magpaluwa-ay sa manga utaw na Isra-él, kasiling na dadan da nan pigpakang. Si Jisus saba ya Magpaluwa-ay yan. 24Na, sa walaꞌ pa dateng si Jisus, si Juan ya nyuna mig-ubat-ubat adti kadég na utaw na Isra-él na ayawan nilan ya kanilan manga salaꞌ aw magselsel aw magpaba͡utismu silan. 25Aw sa agpet da ni Juan matigkas ya imo-unun nan, miglong sakanan adti madég na utaw, ‘Iman mayu aw aku ya magpaluwa-ay na pigpadala na Tyumanem, manang bekeꞌ ku saba! Un pa dumateng ya sambuk na matas pa kanak aw diliꞌ aku kanan makatumbuk, pangkay sa pag-ubad sa eket na sandal nan diliꞌ aku umbaꞌ.’

26“Na, kay manga kadégan ku na buwadbuwad ni Abraham aw kamu uman na manga Héntil na awun pagkallek sa Tyumanem, pigpa-edeꞌ da kanaten na Tyumanem na awun da pa-agi na un kitadun paluwa-en lekat adti pa-emel-emel nan. 27Manang ya manga Judiyu na nyeyaꞌ adti Jérusalim aw ya manga migdumala kanilan, walaꞌ nilan kilala͡a na si Jisus yan ya pigpadala na Tyumanem. Aw walaꞌ nilan kalabeti na si Jisus ya pigsulat na manga propita, pangkay gayed nilan pigbasa kada simana dun ni Allaw na Paglagdeng. Aw pangkay walaꞌ nilan ka-ede-i manang dun ni kanilan katuman ya pigsulat asini muna, kay ya manga magdadumala͡ay ya mig-ukum aw migpapatay kan Jisus. 28Aw pangkay kya-ede-an nilan na walaꞌ ya salaꞌ na nya-imoꞌ nan na umbaꞌ sakanan patayen, manang pigsekat nilan baling adti kan Pilato na patayen sakanan. 29Aw sa nyatuman da nilan ya kadég na pigsulat dadan na manga propita, awun da uman manga utaw na migkamang sa lawas nan lekat adti krus aw pigbetang nilan adti ilib na lebenganan. 30Manang pigmataw sakanan na Tyumanem lekat adti pagkamatay, 31aw seled na madég na allaw, migpakitaꞌ sakanan adti manga umagakan na nyagad kanan idtu muna lekat adti Galiliya taman adti Jérusalim. Aw silan da ya migmatinaw adti kanaten na manga utaw na Isra-él sa kadég na nya-imoꞌ idtu muna. 32Aw yan ya tud nami adun na pa-edeꞌ nami kamayu ya Madyaw na Ubat-ubat sa pakang na Tyumanem adti manga tyugbulan tadun, 33kay pigtuman da nan kanaten na manga buwadbuwad nilan magi sa pagmataw nan kan Jisus. Aw yanagaw nyatuman uman ya pigsulat dun ni kadwa na Salmo, law na Tyumanem,

‘Ikaw ya Iseꞌ ku na eseg.

Adun na allaw yeiy un ku pa-edeꞌ na aku ya Ama mu.’#13:33 Mabasa adti Salmo 2:7.

34Aw yan uman ya pigpasulat asini muna na Tyumanem, na un nan matawun si Jisus lekat adti pagkamatay aw diliꞌ da salut matay, law nan,

‘Un ku atag adti kamayu ya manga kadyawan na dadan da ku pigpakang kan Dabid.’#13:34 Mabasa adti Isayas 55:3.

35Yanagaw si Jisus, yan ya migtuman sa pigpakang na Tyumanem kay awun uman pigsulat ni Dabid dun ni Salmo, law nan,

‘Ya Sugu-anen mu na un mu padala,

diliꞌ mu tumbay na malandak ya lawas nan adti lebeng.’#13:35 Mabasa adti Salmo 16:10.

36Na, si Dabid, pagkatigkas nan imo-un ya pigpa-imoꞌ kanan na Tyumanem, nyatay sakanan aw piglebeng adti tampid na mangkatikadeng nan, aw nyalandak saba ya lawas nan. 37Manang si Jisus, walaꞌ kalandak ya kanan lawas, kay pigmataw sakanan na Tyumanem lekat adti pagkamatay. 38Yanagaw, kay manga kadégan ku, pada ka-ede-an mayu adun na allaw yeiy kun unu ya tengteng matinaw, paglongun ta kamu na magi sa pigpan-imoꞌ ni Jisus mabatug da lanasen ya manga salaꞌ tadun, 39aw magi kan Jisus, pangkay singalan ya mangintu-u kanan dawaten saba na Tyumanem kasiling na walaꞌ da ya salaꞌ. Aw diliꞌ yeiy mabatug magi dun ni pagtuman sa Uldin na pig-atag kan Moysis. 40Yanagaw, magpakatadeng kamu, pagaw dumateng kamayu ya pigpasulat na Tyumanem adti manga propita:

41 ‘Pakanyegi mayu, kamu na gayed mig-odoy-odoy.

Kumegaꞌ kamu, aw malatay ya un mayu datengan.

Kay dun ni manga allaw mayu, awun imo-un ku, aw kita-en mayu manang diliꞌ kamu mangintu-u, pangkay kun awun pa mag-ubad sa kakawasan adti kamayu.’ ”#13:41 Mabasa adti Habakuk 1:5.

42Pagluwaꞌ da ni Pablo aw ni Bérnabi lekat adti sinagoga, nyanginayuꞌ ya manga utaw kanilan na sugpatan aw padelegen pa galu nilan ya palna-u pagkasalut na Allaw na Paglagdeng. 43Aw pagkatigkas da na pagkatipun nilan, madég ya utaw na nyagad kanilan, dala ya manga Judiyu aw manga Héntil na dyumalug da sa manga katanem na manga Judiyu. Aw pigpakabagseg ni Pablo aw ni Bérnabi ya ginawa nilan na magpadeleg dun ni kallat na Tyumanem.

44Pagkasalut na Allaw na Paglagdeng, nyabus da galu migkatipun adti sinagoga ya manga utaw na nyeyaꞌ dun ni lunsud pada magpakanyeg sa tingeg na Tyumanem. 45Manang dun ni manga utaw na Judiyu, awun eped kanilan na walaꞌ pangintu-u. Aw sa pagkitaꞌ nilan na to-o la madég ya manga utaw na migkatipun dun, to-o silan nyingaꞌ. Yanagaw pigsalaꞌ nilan ya palna-u ni Pablo aw pig-odoy-odoy nilan sakanan. 46Manang to-o baling migkabagseg ya ginawa ni Pablo aw ni Bérnabi miglong kanilan, “Ka-ilangan na kamu na manga Judiyu ya muna paglongan sa tingeg na Tyumanem. Manang asuntu na pigkele͡an mayu yeiy, na, pigpakitaꞌ da mayu na diliꞌ kamu umbaꞌ atagan sa ginawa na walaꞌ ya katigkasan. Yanagaw lekat adun, adtu la kami ni manga Héntil pagpalna-u. 47Kay yan ya suguꞌ kanami na Tyumanem, law nan,

‘Pigpamalliꞌ da ta kaw na un mag-ilaw sa anenganeng na manga Héntil, pada ya kadég na utaw asini tas na lupaꞌ makaluwaꞌ lekat adti manga salaꞌ nilan.’ ”#13:47 Mabasa adti Isayas 42:6 aw 49:6.

48Aw sa pagdengeg na manga Héntil sa piglong ni Pablo, to-o silan migleya aw pigdeyen nilan ya tingeg na Tyumanem. Aw nyangintu-u la ya manga pigpamalliꞌ da dadan na Tyumanem na un makatagtun sa ginawa na walaꞌ ya katigkasan.

49Aw nyabekkal ya Madyaw na Ubat-ubat kan Kristu Jisus dun ni kadakulaꞌ na palibed na Antiyokiya. 50Manang ya manga Judiyu na kyumele sa palna-u yan, pigsutsutan nilan ya manga mangkalangkaw dun ni lunsud, dala ya manga ka͡ubayan na madengeg na nyatibulluk uman adti Tyumanem. Ya syampetan nan, pyamulayaman si Pablo aw si Bérnabi aw pig-alilinan silan lekat adti lunsud. 51Yanagaw, pigtaptap nilan ya alikabuk dun ni kanilan siki kay yan ya pangilala na ukuman na Tyumanem ya manga utaw na kyumele sa palna-u nilan. Aw nyanaw silan aw dyumateng adti lunsud na Ikoniyo. 52Manang ya manga bagu nyangintu-u na pig-ayawan nilan adti Antiyokiya, migpadeleg silan migleya aw nyatmuꞌ silan na Ispiritu Santo.

Currently Selected:

Pigpan-imo' 13: klgv

Highlight

Compare

Copy