Pigpan-imo' 15

Ya sangkamuluꞌ na palna-u na dyumateng adti Antiyokiya sakup na Sirya

1Na, awun manga eseg lekat adti Judiya na dyumateng adti Antiyokiya sakup na Sirya. Judiyu silan na nyangintu-u la kan Jisus. Aw migpalekat silan migpalna-u sa manga mangintu-uway dun. Miglong silan, “Diliꞌ kamu paluwa-en na Tyumanem kun diliꞌ kamu una magpatuliꞌ, kay yan ya pagtuman mayu sa suguꞌ na awun ni Uldin na pig-atag nan kan Moysis.” 2Manang gayed ni Pablo aw ni Bérnabi pigbilingbilingan ya kanilan piglong mendaꞌ na nya-imoꞌ ya dakulaꞌ na ayil. Yanagaw migkasambuk ya anenganeng na manga mangintu-uway dun ni Antiyokiya na pakadtuwun nilan adti Jérusalim si Pablo aw si Bérnabi aw manga eped na inulug na taga Antiyokiya. Kaliman nilan na magkitaꞌ silan ya eped na manga apostolés aw ya manga maggagaday sa mangintu-uway, aw balawbalawan kun ayin ya umbaꞌ na palna-u na un nilan dalugun.

3Aw pigpapanaw da silan na manga mangintu-uway. Aw sa pag-agi nilan adti manga banwa na Ponisiya aw Samariya, gayed nilan pig-ubat-ubat ya pagpangintu-u na madég na manga Héntil adti eped na manga banwa. Aw ya kadég na dyumengeg alag silan migleya. 4Pagdateng da nilan adti Jérusalim, pigdawat silan na manga mangintu-uway dun, dala ya manga maggagaday kanilan aw ya manga apostolés. Aw pigdandan nilan ya kadég na pigpan-imoꞌ na Tyumanem magi kanilan. 5Manang awun manga Judiyu na kenneꞌ pa na pagka Parisiyo nilan pangkay nyangintu-u la silan kan Jisus, aw nyindeg silan adti asdangan na manga utaw aw miglong, “Kay manga inulug, pangkay bekeꞌ na Judiyu ya eped na nyangintu-u la, manang ka-ilangan magpatuliꞌ silan aw palna-uwan silan na tumanen ya Uldin na pig-atag na Tyumanem kan Moysis.”

6Yanagaw migkatipun ya kadég na manga apostolés aw manga maggagaday sa manga mangintu-uway na un nilan balawbalawan kun unu ya madyaw nilan imo-un. 7Aw pagkatigkas nilan magbilingbiling, nyindeg si Pédro adti asdangan nilan aw miglong sakanan, “Kay manga inulug ku, kya-ede-an da mayu na idtu muna pigpamalliꞌ aku na Tyumanem lekat adti kanaten pada magi kanak pa-ede-en ya manga Héntil sa Madyaw na Ubat-ubat kan Jisus aw mangintu-u silan. 8Aw ya Tyumanem yan ya nya-edeꞌ kun unu ya awun ni anenganeng na manga utaw. Aw pigpakitaꞌ da nan na pigdawat nan ya manga utaw na Héntil na nyangintu-u kan Jisus, kay pig-atag da na Tyumanem kanilan ya kanan Ispiritu kasiling na pag-atag nan kanaten. 9Kay mig-unawa la ya kadég tadun adti Tyumanem. Aw kasiling na pig-imoꞌ nan kanaten, piglinisan da nan uman ya kanilan anenganeng asuntu sa pagpangintu-u nilan kan Jisus. 10Yanagaw, anangaꞌ mayu tanda-en ya Tyumanem sa paglong mayu na diliꞌ nan dawaten ya manga Héntil kun diliꞌ nilan dalugun ya kanaten katanem? Kun walaꞌ kabatug na tyugbulan tadun ya pagtuman sa kadakulaꞌ na Uldin aw diliꞌ tadun uman mabatug, na, anangaꞌ tadun gelgelen ya manga Héntil na dumalug sa kanaten katanem? 11Kay manga inulug ku, diliꞌ mayu pagkalingawan ya kallat ni Jisus na kanaten Matas na Pangulu, na yeiy oloꞌ ya du-an na nyangintu-u la kitadun aw pigpaluwaꞌ na Tyumanem. Aw maynan uman ya kallat nan adti manga Héntil na nyangintu-u kanan.”

12Pagdengeg nilan sa piglong ni Pédro, nyatinep ya kadég nilan. Aw pigpakanyegan nilan uman si Bérnabi aw si Pablo sa pagdandan nilan sa kadég na mangkadyaw na pangilala aw milagru na Tyumanem magi kanilan dun ni pagpanaw nilan adti manga utaw na Héntil. 13Pagkatigkas nilan magdandan, miglong si Santiago, “Kay manga inulug ku, pakanyegi mayu ya un ku paglongun. 14Dyengeg da tadun adun ya pigpa-edeꞌ kanaten ni Simon Pédro sa imo-unun na pigpalekat na Tyumanem adti manga Héntil pada maka-akup uman silan adti kanan manga utaw. 15Aw ya piglong ni Pédro mig-unawa saba sa piglong na Tyumanem dun ni pigsulat na manga propita asini muna:

16 ‘Pagkatigkas yan, dumateng ya allaw na lumikuꞌ aku,

aw pa-indegen ku salut ya kasakupan ni Dabid na migkalat da.

Dayaw ku pantipunun ya nyangkabélét aw pa-indegen ku ya bagu.

17 Yeiy ya un ku imo-un pada paninawun aku na eped na utaw dala ya manga Héntil na pigtawag da ku na un ma-imoꞌ kanak manga utaw.

18 Yeiy ya piglong na Tyumanem na dadan da nan pigpa-edeꞌ lekat pa na asini muna.’#15:16-18 Mabasa adti Amos 9:11-12.

19Yanagaw ini ya anenganeng ku. Diliꞌ tadun pabegatan ya manga Héntil na malim mangintu-u sa Tyumanem. 20Manang naten baling silan sulatan, aw yan oloꞌ ya paglongun tadun kanilan na diliꞌ nilan pagkanen ya unud na pigdugsuꞌ da adti manga tyumanem na galuꞌ. Aw diliꞌ silan uman magkasala-enen. Aw diliꞌ silan magkan sa duguꞌ aw unud na walaꞌ pakaluwaꞌ ya duguꞌ. 21Kya-ede-an da na kadég na manga utaw na Judiyu ya manga suguꞌ yeiy na lekat adti Uldin na pig-atag na Tyumanem kan Moysis. Kay lekat pa asini muna, kada simana dun ni Allaw na Paglagdeng, ya Uldin pigpa-edeꞌ adti kadég na manga lunsud, aw kenneꞌ pa adun pagbasa͡en adti manga sinagoga tadun.”

Ya sulat na manga apostolés adti manga Héntil na nyangintu-u la

22Pagkatigkas yan, migkatipun ya manga apostolés aw ya kadég na manga mangintu-uway dala ya manga maggagaday kanilan, aw pigbalawbalawan nilan ya kadakulaꞌ na kanilan pigdengeg, aw pigkasambukan na ginawa nilan na mamalliꞌ sa manga eseg lekat adti kanilan na un magad kan Pablo aw kan Bérnabi adti Antiyokiya. Aw yan ya manga eseg na pigsuguꞌ nilan si Judas na pigngalanan uman na Barsabas, aw si Silas, na alag pigbasa͡an na manga mangintu-uway. 23Aw yeiy ya pigsulat na manga utaw dun ni katipun:

“Kay manga inulug, kami na manga apostolés aw manga maggagaday sa mangintu-uway asini Jérusalim, nyangumusta sa kadég mayu na manga Héntil na nyangintu-u la dun ni Antiyokiya aw adti kadakulaꞌ na probinsiya na Sirya aw Ciliciya. 24Dyengeg nami na awun manga utaw na nyadtu ni kamayu lekat asini na migsagunut sa anenganeng mayu magi sa sangkamuluꞌ na palna-u nilan. Manang pada ka-ede-an mayu, walaꞌ nami silan sugu-a adti kamayu, aw walaꞌ nami silan atagi na katundanan magpalna-u sa maynan. 25Yanagaw pigkasambukan na ginawa nami na mamalliꞌ kami sa manga utaw na un padala adti kamayu, eped ni Pablo aw si Bérnabi na kanaten pigginawa͡an 26na gayed migpan sa kanilan pagka-utawun pangkay adti kalatayan, pada mabatug ya imo-unun na kanaten Matas na Pangulu na si Jisu-Kristu. 27Aw pigpadala nami si Judas aw si Silas na un magmatinaw adti kamayu asini sulat ini kun unu ya pagbayaꞌ nami. 28Aw yan saba ya pigpalna-u kanami na Ispiritu Santo aw pigtandeꞌ nami na diliꞌ kamu nami pabegatan sa kadég na katanem na manga Judiyu. Manang ini ya ka-ilangan mayu dalugun: 29Diliꞌ mayu pagkanen ya unud na pigdugsuꞌ da adti manga tyumanem na galuꞌ. Aw diliꞌ kamu magkan sa duguꞌ aw unud na walaꞌ pakaluwaꞌ ya duguꞌ. Aw diliꞌ kamu magkasala-enen. Kun tumanen mayu yeiy, yan saba ya madyaw. Aw asini la taman ya sulat nami ini.”

30Yanagaw pigpapanaw da silan pasinan adti Antiyokiya. Pagdateng nilan dun, pigpantipun nilan ya madég na mangintu-uway aw pig-atag kanilan ya sulat. 31Aw sa pagbasa na manga mangintu-uway, migkabagseg ya ginawa nilan sa palna-u na pigsulat kanilan aw to-o silan migleya. 32Na, si Judas aw si Silas manga propita silan na Tyumanem, aw madég uman ya piglong nilan adti manga mangintu-uway na un magpakabagseg kanilan aw magpakasalig sa pagpangintu-u nilan. 33Pagkatigkas na pilangallaw na pag-eyaꞌ nilan dun, nyuliꞌ silan adti migsuguꞌ kanilan na awun ni Jérusalim. Sa walaꞌ pa silan indeg, pigpanawagtawagan silan na manga mangintu-uway na pakadyawun na Tyumanem ya panaw nilan. 34[Manang si Silas migpatagak adti Antiyokiya.] 35Aw kenneꞌ pa ni Pablo aw ni Bérnabi nyatingen dun ni Antiyokiya, aw madég uman ya tyumabang kanilan migpalna-u aw migpa-edeꞌ sa tingeg na Tyumanem.

Ya pagsuway ni Bérnabi aw ni Pablo

36Na, paglabay da na pilangallaw, miglong si Pablo kan Bérnabi, “Nateꞌ liku-an ya manga syudad na pigpa-ede-an ta idtu muna sa Madyaw na Ubat-ubat kan Jisus, pada ka-ede-an nateꞌ kun manu la ya kanilan pagpakabetang.” 37Aw tyumandeꞌ si Bérnabi, manang kaliman nan na pa-agad nilan si Juan na pigngalanan uman na Markos, 38manang si Pablo diliꞌ malim, kay idtu muna talana ni Pablo aw ni Bérnabi adti probinsiya na Pampilya, pig-ayawan silan ni Markos aw walaꞌ sakanan pagpadeleg agad kanilan dun ni imo-unun nilan adti Pampilya. 39Yanagaw to-o mig-ayil si Pablo aw si Bérnabi, aw ya syampetan yan, migsuway silan. Pigpa-agad ni Bérnabi si Markos aw syumakay silan sa barko pasinan adti puluꞌ na Cipré. 40Aw si Pablo, pigpamalliꞌ nan si Silas na un magad kanan. Aw sa walaꞌ pa silan panaw, nyanawagtawag ya manga mangintu-uway dun ni Antiyokiya aw migsekat adti Tyumanem na pakadyawun nan silan. Aw nyanaw da silan. 41Aw pyangkadtuwan nilan ya manga mangintu-uway na migkatipun nyanimba adti manga probinsiya na Sirya aw Ciliciya pada pakasaligen ya pagpangintu-u nilan kan Jisus.

Currently Selected:

Pigpan-imo' 15: klgv

Highlight

Compare

Copy