Pigpan-imo' 12

Ya pagpadakep ni Hérodés Agripa kan Santiago aw kan Pédro

1Na, dun ni manga allaw yan, ya hariꞌ na si Hérodés Agripa migpalekat nyamulayam sa manga mangintu-uway kan Jisus. 2Aw pigpa-utud nan ya ulu ni Santiago na inulug ni Juan. 3Aw pagka-edeꞌ da ni Hérodés na kyatutukan ya manga Judiyu asuntu sa pagpapatay nan kan Santiago, pigpadakep nan uman si Pédro dengan na Pista na Pan na Walaꞌ Patulina. 4Aw sa pagpadakep da nan kan Pédro, pigpakalabusu nan aw pigpasayusayu nan pigpatunggu-an sa sampuluꞌ tag enem (16) ya sundalu na tag upat-upat. Kay yan ya palpa ni Hérodés na pagkatigkas da na pista, pa-atubang nan si Pédro adti asdangan na madég na manga Judiyu pada usayan aw ukuman. 5Manang talana ni Pédro adti seled na kalabusuwanan, madég ya manga mangintu-uway na nyatibulluk nyanawagtawag adti Tyumanem pada kanan.

6Dun ni gabi yan na tyumagad silan sa allaw na pag-ukum kan Pédro, nyakatulug sakanan dun ni elet na duwa ya sundalu, aw dayaw sakanan pigsangkali-an na duwa ya sangkaliꞌ. Aw gayed uman pigtunggu-an na manga sundalu ya tatakep na kalabusuwanan. 7Aw walaꞌ imanmana awun migpakitaꞌ kan Pédro na anghil na Tyumanem aw migkalalamdag to-o ya seled na tambiꞌ na kalabusuwanan. Aw pigkablit na anghil ya kilid ni Pédro aw pukawa nan, aw piglongan nan, “Na! Pagbangun da kaw!” Aw nyangkataktak ya manga sangkaliꞌ adti manga bekten nan. 8Aw miglong ya anghil kanan, “Pangelen kaw aw dayaw pagsandal.” Aw dyalug ni Pédro ya piglong kanan. Aw miglong pa uman ya anghil, “Pagkulimutan ya kayab mu aw dalug kaw kanak!” 9Aw dyumalug si Pédro sa anghil pasinan adti luwaꞌ na kalabusuwanan, manang walaꞌ nan ka-ede-i na matinaw ya nya-imoꞌ kanan. Iman nan aw oloꞌ tagaynep. 10Lyabayan nilan ya tagnaꞌ na sundalu na migtungguꞌ adti tatakep na kalabusuwanan aw tigkas yan uman nilan lyabayan ya kadwa, aw dyumateng silan adti dakulaꞌ na tatakep na alag putaw. Aw dayaw kya-uwangan ya tatakep na walaꞌ ya mig-uwang, aw nyakaluwaꞌ silan na migpasinan adti syudad. Pagpakalabay da nilan sa kadwa na suwayan na dalan, biglaꞌ nyalanas ya anghil. 11Pagkalanas da na anghil, dun da ni Pédro ka-ede-i na bekeꞌ na tagaynep ya nya-imoꞌ kanan. Miglong adti anenganeng nan, “Matinaw kadiꞌ ya nya-imoꞌ kanak. Pigsuguꞌ na Tyumanem ya kanan anghil pada paluwa-en aku lekat adti pagamak ni Hérodés aw manga utaw na Judiyu.”

12Pagka-edeꞌ nan seiy, syuminan sakanan adti balay ni Maria na ina ni Juan Markos. Madég ya manga mangintu-uway na migkatipun dun pada manawagtawag adti Tyumanem. 13Pigtuktuk ni Pédro ya tatakep aw migtatawag sakanan lekat adti luwaꞌ na inalad na balay. Aw nyadtu ya sambuk na sugu-anen na pigngalanan na Roda, kay un nan galu uwangan. 14Pagdengeg nan sa tingeg ni Pédro, to-o sakanan migleya. Manang walaꞌ da nan baling ka-uwangi kay maksay sakanan lyumikuꞌ adti manga eped nan na un mag-ubat-ubat na awun si Pédro ni luwaꞌ. 15Piglongan nilan si Roda, “Nyakasuway gya ya madyaw na anenganeng mu, kay Déꞌ!” Manang gyumelgel sakanan miglong kanilan, “Matinaw ya pig-ubat ku!” Aw tyumubag silan, “Yan gya ya anghil na migtameng kanan.” 16Manang migpadeleg si Pédro migtuktuk sa tatakep. Yanagaw sa pag-uwang nilan, si Pédro agaw ya awun ni luwaꞌ. Aw to-o silan nya-enneng-enneng. 17Manang pigpulingenan silan ni Pédro pada matinep silan. Tigkas yan, pigdandan nan kanilan ya pagpaluwaꞌ kanan na Tyumanem lekat adti kalabusuwanan aw law nan kanilan, “Ubatan mayu yeiy adti kan Santiago#12:17 Ya Santiago yeiy, yan ya magdadumala͡ay sa manga mangintu-uway na awun ni Jérusalim, aw inulug sakanan uman ni Jisus. aw eped na manga inulug tadun.” Pagkatigkas yan, nyindeg si Pédro syuminan adti sambuk na banwa.

18Pagkamaselem da, ya manga sundalu na migtungguꞌ adti kalabusuwanan, walaꞌ katingen ya kanilan anenganeng aw to-o silan nyallek kay walaꞌ nilan ka-ede-i kun ayin da si Pédro pasinan. 19Aw migsuguꞌ si Hérodés na paninawun si Pédro, manang walaꞌ nilan kita-a. Yanagaw pigsadsadan nan ya manga sundalu na migtungguꞌ, aw migsuguꞌ sakanan na alag silan pamatayen. Pagkatigkas yan, nyindeg si Hérodés adti Judiya, aw nyanaw pasinan adti syudad na Césariya aw dun pag-eyaꞌ.

Ya pagkamatay ni Hérodés Agripa

20Na, to-o nyadaman si Hérodés sa manga utaw adti manga syudad na Tiro aw Sidon. Yanagaw migsambuk ya anenganeng nilan kun unu ya pa-agi na maka-uliꞌ ya ginawa ni Hérodés kanilan. Kay ya banwa na pigtakmagan nan, yan uman ya pagkamangan nilan sa kanilan pagkanen. Yanagaw, nyadtu silan aw pig-ubaybay nilan una si Blasto na yan ya tengteng pagsaligan ni Hérodés aw yan ya magpa-edeꞌ kan Hérodés sa tud nilan. 21Na, pagdateng da na allaw na un magpakitaꞌ si Hérodés adti manga utaw, syumut sakanan sa kadégkadég na pagsutun na hariꞌ, aw nyingkud adti trunu aw miglong adti kadég na manga utaw na migkatipun dun ni asdangan nan. 22Aw miglong ya manga utaw sa mabagseg na tingeg, law nilan, “Bekeꞌ na utaw ya miglong, manang sambuk saba sakanan na tyumanem!” 23Aw asuntu na walaꞌ silan ni Hérodés pagsagda͡an aw walaꞌ nan padeyenan ya tengteng Tyumanem, biglaꞌ sakanan na anghil na Tyumanem pigpakelegan na magkedel aw pig-ulud ya lawas nan aw walaꞌ kadugay nyatay sakanan.

24Aw migpadeleg nyabekkal ya Madyaw na Ubat-ubat kan Jisus aw migkadég ya manga utaw na nyangintu-u.

25Na, si Bérnabi aw si Saulo, lyumikuꞌ silan adti Antiyokiya kay nyabatug da ya kanilan tud adti Jérusalim. Aw pigpa-agad nilan si Juan na pigngalanan uman na Markos.

Currently Selected:

Pigpan-imo' 12: klgv

Highlight

Compare

Copy