Pigpan-imo' 11

Ya pagdandan ni Pédro sa pagpangintu-u na manga Héntil

1Na, ya manga apostolés aw manga mangintu-uway adti probinsiya na Judiya, dyengeg nilan na awun uman manga Héntil na nyangintu-u la sa tingeg na Tyumanem. 2Yanagaw paglikuꞌ ni Pédro adti Jérusalim, pigsalaꞌ sakanan na manga Judiyu na nyangintu-u kan Jisus, 3law nilan, “Anangaꞌ kaw madtu ni manga utaw na Héntil? Aw anangaꞌ kaw sumambuk kanilan kuman?” 4Manang pigpalekat ni Pédro ya pagdandan adti kanilan sa kadég na nya-imoꞌ, law nan:

5“Sa dun pa aku ni syudad na Jopa, talana ku nyanawagtawag adti Tyumanem, awun pigpakitaꞌ kanak na liwan na dakulaꞌ na abul na nya-ulad na pig-eketan ya upat ya tuktuk nan aw nyatonton lekat adti langit taman adti asdangan ku. 6Pag-inunu ku sa awun ni seled na abul, kyinitaꞌ ku ya madég na punganan na mannanap aw ayep, dala ya manga magpanaw aw ya manga magpananap aw ya manga langgam. 7Aw awun tingeg na dyengeg ku na miglong, ‘Kay Pédro, indeg kaw aw pag-iyaw kaw aw kana!’ 8Aw tyumubag aku, ‘Kay Matas na Pangulu, diliꞌ aku san magkan! Taman adun walaꞌ pa ya syumeled adti bakaꞌ ku na malipaꞌ na pigpigil adti Uldin nami na manga Judiyu.’ 9Manang uman da tyumubag ya tingeg na lekat adti tas na langit, ‘Kun unu ya piglong da na Tyumanem na malinis, ka-ilangan na diliꞌ da mu pagngalanan na malipaꞌ.’ 10Aw makatlu yeiy ka-imoꞌ, aw tigkas yan, nya-engat ya dakulaꞌ na abul adti langit. 11Aw dun ni udas yan, awun nyaka-ibwang na tulu ya eseg na lekat adti Césariya adti balay na pigbantukan ku. Pigsuguꞌ silan na un mangay kanak. 12Aw miglong kanak ya Ispiritu Santo, ‘Diliꞌ kaw magduwaduwa mag-agad kanilan aw diliꞌ mu silan pagkele͡an asuntu na utaw silan na Héntil.’ Yanagaw nyagad aku kanilan, aw nyagad uman kanak ya enem ya eseg yeiy na inulug tadun na mangintu-uway na taga Jopa. Aw nyadtu kami adti balay ni Cornélyo na yan ya migsuguꞌ kanilan. Aw pigpaseled nan kami, 13aw pigdandan nan ya kadég na nya-imoꞌ kanan, na awun kyinitaꞌ nan na anghil adti seled na balay nan, aw law na anghil kanan, ‘Pa-angayan ya sambuk na utaw na adti Jopa na si Simon na pigngalanan uman na Pédro. 14Kay un nan ubat kanmu kun unun na Tyumanem ya pagpaluwaꞌ kamayu, dala ya ka-epedanan mu.’ Yan ya piglong na anghil kan Cornélyo. 15Yanagaw, pigpalekat ku ya pag-ubat-ubat kanilan. Aw talana ku mig-ubat-ubat, dyumateng ya Ispiritu Santo adti kanilan, kasiling na kanaten idtu muna. 16Aw dun da ku ka-anenganengi ya piglong ni Jisus idtu muna, law nan, ‘Si Juan migba͡utismu kamayu magi sa tubig, manang diliꞌ madugay ba͡utismuwan kamu sa Ispiritu Santo.’ 17Yanagaw, ya manga utaw na Héntil, kasiling da silan kanaten, kay dun ni pagpangintu-u nilan kan Jisu-Kristu na kanaten Matas na Pangulu, pig-atag uman na Tyumanem kanilan ya Ispiritu nan. Aw kun maynan ya pig-imoꞌ na Tyumanem, singalan aku na makatagen sa palpa nan?”

18Pagdengeg da na manga mangintu-uway dun ni Jérusalim sa pigdandan ni Pédro, walaꞌ da silan pagdiklamu kanan. To-o nilan baling pigdeyen ya Tyumanem, aw law nilan, “Yan kadiꞌ! Pangkay ya manga utaw na Héntil, pig-atagan uman na Tyumanem na selat na magselsel pada matagtun nilan ya ginawa na walaꞌ ya katigkasan.”

Ya manga bagu nyangintu-u adti Antiyokiya sakup na Sirya

19Na, lekat adti allaw na pagpatay kan Éstéban, migbeklag nyamalaguy ya manga mangintu-uway lekat adti Judiya asuntu sa pagpamulayam kanilan, aw awun eped kanilan na dyumateng adti banwa na Ponisiya, aw ya eped adti puluꞌ na Cipré, aw ya eped adti syudad na Antiyokiya sakup na Sirya. Aw oloꞌ manga utaw na Judiyu ya pigpa-edeꞌ nilan sa Madyaw na Ubat-ubat. 20Manang awun manga mangintu-uway na lekat adti Cipré aw Ciréné na dyumateng dun ni Antiyokiya, aw pigpa-edeꞌ nilan uman adti manga Héntil ya Madyaw na Ubat-ubat sa Matas na Pangulu na si Jisus. 21Aw awun ni kanilan ya katulus na Tyumanem, yanagaw madég to-o ya manga Héntil na nyagagad adti pagpangintu-u kan Jisus.

22Na, ya manga mangintu-uway adti Jérusalim, pagdengeg nilan sa manga Héntil na bagu nyangintu-u adti Antiyokiya, pigpakadtu nilan si Bérnabi adti kanilan. 23Pagdateng nan dun ni sayid nilan, kyinitaꞌ nan na pigkallatan na Tyumanem ya manga Héntil aw to-o sakanan migleya. Aw pigpakabagseg nan ya ginawa na kadég nilan na magpadeleg aw matibulluk adti pagpangintu-u kan Jisus pangkay unu pa ya dumateng kanilan. 24Kay madyaw ya bet ni Bérnabi aw nyatmuꞌ sakanan na Ispiritu Santo aw masalig ya kanan pagpangintu-u kan Jisus. Aw asuntu sa pagpalna-u nan, to-o pa kyadugangan ya kadég na manga utaw na nyangintu-u kan Jisus.

25Yanagaw nyadtu si Bérnabi ni syudad na Tarso aw pyaninaw nan si Saulo. 26Pagkitaꞌ da nan kan Saulo, pigpa-agad nan adti Antiyokiya. Aw seled na sangka͡umay migsambuk silan sa manga mangintu-uway dun, aw pigpalna-uwan nilan ya to-o madég na utaw na bagu nyangintu-u kan Jisus. Aw ya manga utaw na nyangintu-u kan Kristu dun ni Antiyokiya, silan ya tagnaꞌ na pigngalanan na Kristuwanen.

27Na, dun ni manga allaw yan, awun manga propita na lekat adti Jérusalim na nyadtu ni Antiyokiya. 28Ya sambuk kanilan pigngalanan na Agabo. Aw sa pagkatipun da na manga mangintu-uway, nyindeg si Agabo adti asdangan nilan aw migpa-edeꞌ kanilan magi sa katulus na Ispiritu Santo na un dumateng ya dakulaꞌ na getem adti kadakulaꞌ na banwa. Na, nyatuman ya piglong nan adti manga umay na migdumala si Cla͡udiyo na impirador sa kasakupan na Roma. 29Yanagaw, ya manga mangintu-uway adti Antiyokiya, migkasambuk ya ginawa nilan tumabang sa manga mangintu-uway na nyeyaꞌ adti Judiya, taman na mabatug na tagsambuksambuk kanilan. 30Aw pigpadala nilan si Bérnabi aw si Saulo adti Jérusalim na un mag-ated sa tabang adti manga maggagaday sa manga mangintu-uway.

Currently Selected:

Pigpan-imo' 11: klgv

Highlight

Compare

Copy