2 Pédro 3

Ya paglikuꞌ ni Jisu-Kristu

1Kay manga inulug na kanak pigginawa͡an, yeiy ya kadwa na sulat na pigpadala ku adti kamayu. Ya du-an na pigsulatan ta kamu kay kaliman ku na pa-anenganeng kamayu ya dadan da mayu kya-ede-an, pada ya malinis na anenganeng mayu to-o pa magkasalig. 2Diliꞌ mayu pagkalingawan ya pigpa-edeꞌ na manga propita na Tyumanem, aw ya suguꞌ na kanaten Matas na Pangulu aw Magpaluwa-ay na pig-atag kamayu magi kanami na manga apostolés. 3Ini ya muna kaliman ku na kalabetan mayu: Adti kamoliyan na manga allaw awun dumateng na manga utaw na mag-odoy-odoy sa manga mangintu-uway. Pagdalugun nilan ya pangkay unu ya kaliman nilan imo-un na malatay. 4Aw maglong silan, “Endaꞌ, migpakang si Kristu na lumikuꞌ kunu? Na! Ayin da ya pigpakang nan? Kilana nyangkamatay da ya manga mangkatikadeng tadun, aw walaꞌ sakanan likuꞌ. Walaꞌ saba ya nya-uman lekat na pagka-imoꞌ na kadakulaꞌ!”

5Manang pigpalipaslipasan nilan ya matinaw, na magi sa paglong na Tyumanem asini pa na muna nya-imoꞌ ya manga langit. Aw magi uman sa paglong nan nya-imoꞌ ya kadakulaꞌ na banwa, aw pigpatungngaw nan ya lupaꞌ lekat adti tubig. Aw magi sa tubig, nyataw saba ya kadég na pig-imoꞌ nan asini tas na lupaꞌ. 6Aw magi uman sa tubig, pigpalenepan nan ya kadakulaꞌ na banwa aw migpangkalat ya kadég. 7Manang magi uman sa paglong na Tyumanem, ya manga langit aw lupaꞌ na pigkitaꞌ tadun adun, pigtagilanan na atulun pada sa allaw na pag-ukum aw pa-emel-emelen na walaꞌ ya tyamanan ya kadég na migpan-imoꞌ sa malatay.

8Kay manga inulug ku na kanak pigginawa͡an, diliꞌ mayu pagkalingawan na ya sammalalan (1,000) ka umay sangallaw oloꞌ adti kana Tyumanem. Aw ya sangallaw kasiling na sammalalan (1,000) ka umay. 9Iman na manga eped na utaw aw pigpakadugay na Matas na Pangulu tadun ya pagtuman sa pakang na lumikuꞌ sakanan. Manang ya tengteng matinaw, pigtagadan nan na magselsel ya kadég mayu, kay diliꞌ sakanan malim na ka-eletan ya pangkay singalan adti kanan na walaꞌ ya tyamanan. 10Manang lumikuꞌ saba ya Matas na Pangulu tadun, aw ya allaw na paglikuꞌ nan kasiling na pagdateng na matakaw na diliꞌ imanmanen na dumateng sakanan. Aw dun ni allaw yan, awun mangkabaklaꞌ na dalagunut na dengegen, aw mabus mangkasangab ya kadég na awun ni dalem na langit aw ya asini kadakulaꞌ na banwa. 11Na, asuntu na kya-ede-an da mayu na un kalaten ya kadakulaꞌ, yanagaw tibulluka ya kamayu anenganeng adti pag-imoꞌ sa makatutuk sa Tyumanem pada walaꞌ ya un pagsalaꞌ sa bet mayu. 12Aw talana mayu tyumagad sa paglikuꞌ nan, pagkaseb kamu dun ni imo-unun na Tyumanem pada maksay ya paglikuꞌ nan. Kay un pa dumateng ya allaw na un kalaten ya awun ni dalem na langit aw asini tas na lupaꞌ magi sa kapasuꞌ na atulun. 13Manang yan ya pigtagadan tadun ya dadan da nan pigpakang na bagu na langit aw bagu na lupaꞌ, aw dun pag-eyaꞌ ya manga utaw na dyumalug sa pagkaliman na Tyumanem.

14Yanagaw, kay manga inulug ku na kanak pigginawa͡an, asuntu na migtagad kamu sa kadég yeiy, tibagsegi mayu na katutukan ya Tyumanem kamayu pada walaꞌ ya un pagsalaꞌ kamayu aw awun kalinaw na kamayu anenganeng dun ni pagpalapit mayu adti asdangan nan.

15Anenganenga mayu na pigtagadan na kanaten Matas na Pangulu na magselsel ya kadég na manga utaw pada makaluwaꞌ silan. Yeiy uman ya pigsulat kamayu na inulug tadun na pigginawa͡an na si Pablo, kay pig-atagan sakanan na Tyumanem na katadeng. 16Gayed nan pigkasampetan adti kadég na pigsulat nan. Aw dun ni manga pigsulat nan, awun to-o malug kalabetan, yanagaw pigbaluk na manga utaw na walaꞌ paka-edeꞌ sa tengteng matinaw aw manga utaw na walaꞌ ya kasalig na pagpangintu-u nilan. Aw pigbaluk nilan uman ya kakawasan na eped na pigpasulat na Tyumanem. Yanagaw pigtulud nilan ya kanilan pagka-utawun na pa-emel-emelen silan na walaꞌ ya tyamanan.

17Kay manga inulug ku na kanak pigginawa͡an, asuntu na kya-ede-an da mayu dadan yeiy, yanagaw magpakatadeng kamu pagaw pasuwayen kamu na manga utaw na mag-imoꞌ sa malatay. Diliꞌ aku malim na malagak ya kasalig na pagpangintu-u mayu kan Kristu. 18Manang padelega mayu ya pagtulin dun ni kallat nan aw dun ni pagka-edeꞌ sa kanaten Matas na Pangulu aw Magpaluwa-ay na si Jisu-Kristu. Aw sakanan oloꞌ ya umbaꞌ basa͡an pangkay adun aw walaꞌ ya tyamanan! Amén.

Currently Selected:

2 Pédro 3: klgv

Highlight

Copy

Compare