2 Corinto 9
9
Ya madyaw na syampetan na pagtabang
1Na, diliꞌ da ka-ilangan na sulatan pa ta kamu kun unu ya umbaꞌ mayu imo-un sa pagtabang sa manga mangintu-uway na awun ni Judiya. 2Kay kya-ede-an ku na kaliman mayu saba tumabang, aw yeiy ya du-an na to-o ta kamu pigsayaꞌ adti manga mangintu-uway adti Macédoniya. Aw piglongan ku silan na kamu na taga probinsiya na Akaya nyakatagilan da dadan sa un mayu tabang, lekat pa idtu na nyagi na umay. Aw sa pagpaka-edeꞌ na manga mangintu-uway na awun ni Macédoniya, to-o migkabagseg ya ginawa nilan na tumabang uman. 3Manang pigpa-una ku si Tito aw ya duwa ya eped nan adti kamayu pada matinawun kun tengteng na nyakatagilan da kamu. Diliꞌ kami malim na kabullugan ya pagsayaꞌ nami kamayu. 4Aw kun awun magad kanaken na manga mangintu-uway lekat adti Macédoniya aw kun kita-en nilan na walaꞌ pa kamu pakatagilan sa pigpakang mayu, na, mamulamula kami baling kay piglongan nami silan na mabatug mayu. Aw kamu uman to-o pa mamulamula asuntu na walaꞌ mayu yeiy imo-a. 5Yanagaw mig-anenganeng aku na ka-ilangan pa-una͡en ku si Tito aw manga eped nan pada maggagad kamayu magtipun sa un mayu tabang kay yeiy saba ya dadan mayu pigpakang. Yanagaw, sa diliꞌ pa aku dumateng dun ni kamayu, ya kadég yeiy nyatagilan da mayu alag, aw yan ya magmatinaw na tengteng kaliman mayu tumabang aw bekeꞌ na kyalegesan kamu.
6Anenganenga mayu ya pundinganan ini: Kun tagbiꞌ ya kanmu tanemen, tagbiꞌ uman ya kanmu aniyen. Kun dakulaꞌ ya kanmu tanemen, dakulaꞌ uman ya kanmu aniyen. 7Yanagaw ya tagsambuksambuk kamayu matag magi sa kaganan na kanan ginawa. Diliꞌ na kyalegesan aw mabegat adti anenganeng nan ya pag-atag. Kay pagkatutukan ya Tyumanem sa utaw na mag-atag na lekat adti kanan ginawa. 8Aw ya Tyumanem, mabatug nan sambaten ya kadég na kamayu kapelekan, aw to-o pa dakulaꞌ ya manga kadyawan na un nan atag kamayu, pada makatabang pa kamu uman sa eped aw madég pa ya manga imo-unun na madyaw na ma-imoꞌ mayu. 9Kasiling na pigpasulat asini muna:
“Ya utaw na matag adti manga eped na walaꞌ ya pagkamangan,
kasiling sakanan na utaw na migsabug sa biniꞌ adti matabaꞌ na lupaꞌ,
aw diliꞌ kalingawan ya kadyaw na pig-imoꞌ nan
pangkay adun aw pangkay adti manga allaw na dumadateng pa.”#9:9 Mabasa adti Salmo 112:9.
10Ya Tyumanem, yan ya nyatag sa manga biniꞌ na un tanemen pada awun makan na manga utaw. Maynan uman, mabatug nan dugangan ya aniyenen mayu pada katabangan mayu ya manga eped, aw magkadakulaꞌ uman ya kamayu imo-unun na madyaw. 11Pakadakula-en pa to-o na Tyumanem ya kanan manga kadyawan adti kamayu pada gayed kamu makatabang sa eped. Aw magi sa kadég yeiy, madég ya magpasalamat sa Tyumanem. 12Kay ya sampetan na manga imo-unun mayu yeiy diliꞌ oloꞌ na masambat ya kapelekan na manga mangintu-uway, manang madég uman ya magpasalamat sa Tyumanem asuntu sa pagtabang mayu. 13Kay magi sa kamayu pagtabang, yan ya magmatinaw na pigdalug mayu ya Madyaw na Ubat-ubat kan Kristu. Aw dun ni pig-imoꞌ mayu aw kanimbet mayu kanilan, ya sampetan nan madég ya magdeyen sa Tyumanem. 14Aw panawagtawagan kamu nilan adti Tyumanem asuntu na pigginawa͡an kamu nilan, kay kita-en nilan ya grasya na Tyumanem na awun ni kamayu. 15Yanagaw naten pasalamatan ya Tyumanem asuntu sa manga kadyawan na pig-atag nan na walaꞌ ya maka-unawa.
Currently Selected:
2 Corinto 9: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
