2 Corinto 10
10
Ya tubag ni Pablo sa manga usip sa pagka-apostol nan
1Na, awun kunu dun ni kamayu na manga mangintu-uway na miglong na magpadalem aku talana ku dun ni kamayu manang adti mawat mabulut kunu aku adti kanak sulat. Manang adun, aku si Pablo nyanginayuꞌ kamayu kasiling ni Kristu na migpadalem, na pakanyegan aku mayu. 2Aw yeiy ya pigsekat ku, na kun makakawun aku dun ni kamayu, ya-i mayu paglegesa na magkabulut aku. Manang diliꞌ aku mallek magsagda sa manga utaw na migtanemtanem kanami na maglong: “Pigdalug nilan ya kanilan pagkaliman na lyumekat oloꞌ asini tas na lupaꞌ.” 3Pangkay utaw kami manang ya kanami pagtanam bekeꞌ na kasiling na pagtanam na utaw asini tas na lupaꞌ. 4Kay ya kinis na kanami piggamit bekeꞌ na kinis na pig-imoꞌ na utaw manang yan baling ya katulus na lyumekat adti Tyumanem, pada degen ya manga utaw na nyatu kan Kristu. 5Magi sa katulus na Tyumanem, mabatug nami degen ya kadég na anenganeng na manga utaw na migpatastas, aw ya pangkay unu na un magbalabag sa pagpaka-edeꞌ sa Tyumanem, pada ma-uman ya kanilan anenganeng na baluk aw madalug nilan ya palna-u ni Kristu. 6Aw kun ka-ede-an nami na pigdalug da mayu ya kanami palna-u, manang kun awun pa dun ni kamayu na kenneꞌ pa nyatu aw gayed mig-imoꞌ sa malatay, pitulun pa nami silan.
7Ya puluglima dun ni kamayu, yan oloꞌ ya pigtandawan mayu ya katadeng na utaw aw kabatug nan aw bekeꞌ na awun ni anenganeng nan! Manang pangkay singalan ya miglong na nyakasambuk da sakanan kan Kristu, madyaw pa na anenganengen nan na kami uman nyakasambuk kan Kristu. 8Pagaw kyasobla͡an baling ya pagpatastas ku sa kanami katundanan, manang diliꞌ ku yan kamulamula͡an. Kay ya katundanan yeiy lekat saba adti kanaten Matas na Pangulu, aw walaꞌ nan kanami atagan pada kalaten ya pagpangintu-u mayu, manang pakasaligen baling. 9Yanagaw diliꞌ kamu mag-anenganeng na pig-allek ta kamu magi sa sulat ku. 10Kay awun eped dun ni kamayu na miglong, “Dun ni kan Pablo sulat, mabegat to-o ya kanan tingeg. Manang kun adi sakanan, diliꞌ magkeleg ya tingeg nan aw walaꞌ ya ma-untung dun ni kanan paglong.” 11Manang ya manga utaw na miglong seiy, kalabetan nilan galu ya ini: Kun unu ya kanami piglong adti sulat, yan uman ya pig-imoꞌ nami kun dun kami ni sayid mayu.
12Diliꞌ kami kasiling na manga magpalna-uway na migsayaꞌ sa pagka-utawun nilan. Gayed silan migpa-unawa͡ay kun singalan kanilan ya to-o dakulaꞌ ya kya-ede-an. Manang dun da baling nilan pakita-an na walaꞌ ya kanilan tengteng kya-ede-an. 13Manang diliꞌ kami magpalibantug sa bekeꞌ na kanami imo-unun. Yan oloꞌ ya piglong nami ya imo-unun na pig-atag kanami na Tyumanem, dala uman ya imo-unun nami adti kamayu. 14Kun walaꞌ kami pakakawun dun ni kamayu, awun makapaglong na kyasobla͡an ya kanami pagpatastas. Manang ya tengteng matinaw, kami saba ya tagnaꞌ na nyawun dun ni Corinto aw migpa-edeꞌ adti kamayu sa Madyaw na Ubat-ubat kan Kristu. 15Aw walaꞌ nami palibantugan ya imo-unun na kyapagudan na eped na utaw, manang pig-iman nami na kun tumulin ya kamayu pagpangintu-u magkadakulaꞌ uman ya kanami imo-unun magi kamayu, 16aw yanagaw mapa-edeꞌ uman nami ya manga utaw adti mawat na banwa na walaꞌ pa paka-edeꞌ sa Madyaw na Ubat-ubat. Kay diliꞌ kami malim magpalibantug sa kyapagudan na eped na utaw adti eped na banwa. 17Kay pigpasulat na Tyumanem asini muna, law nan, “Kun awun magpalibantug, yan ya umbaꞌ nan palibantug ya pig-imoꞌ kanan na Matas na Pangulu.”#10:17 Mabasa adti Jérémiyas 9:24 aw 1 Corinto 1:31. 18Kay ya Tyumanem diliꞌ magleya sa utaw na gayed magsayaꞌ sa kanan pagka-utawun, manang magleya ya Tyumanem sa utaw na pigsayaꞌ nan.
Currently Selected:
2 Corinto 10: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
