2 Corinto 8
8
Ya pagtatabangay na manga mangintu-uway
1Kay manga inulug na nyangintu-u kan Kristu, kaliman nami na ka-ede-an mayu ya pig-imoꞌ na manga mangintu-uway adti probinsiya na Macédoniya. Magi kanilan, pigpakitaꞌ na Tyumanem ya kanan grasya. 2Pangkay madég ya kalugan na kya-agiyan nilan manang to-o silan migleya tyumabang sa manga eped na mangintu-uway. Aw pangkay walaꞌ ya pagkamangan nilan, manang to-o silan manimbet. 3Kay makamatinaw aku na ya pig-atag nilan bekeꞌ na taman oloꞌ na mabatug nilan manang dakulaꞌ pa dun. Aw yan saba ya kanilan pagbayaꞌ na matag silan. 4Ya tengteng matinaw, nyanginayuꞌ silan kanami na tumbay kanilan na tumabang uman sa manga inulug tadun adti probinsiya na Judiya, kay dyengeg nilan na to-o malug ya pagpakabetang na manga mangintu-uway dun. 5Aw to-o pa dakulaꞌ ya pig-atag nilan kay sa pig-iman nami. Kay bekeꞌ oloꞌ na kuwalta ya pig-atag nilan, manang pigtumbay nilan una ya kanilan pagka-utawun adti kan Kristu na Matas na Pangulu tadun aw adti kanami uman. Kay kya-ede-an nilan na yan ya pagkaliman na Tyumanem.
6Yanagaw nyanginayuꞌ kami kan Tito na lumikuꞌ sakanan adti kamayu. Kay kaliman nami na tigkasen nan ya kanan imo-unun idtu muna na yan ya pagsagipun sa kuwalta na un mayu pagtabang sa manga mangintu-uway adti Judiya. 7Na, kamu na manga mangintu-uway dun ni Corinto, to-o kamu pigpakadyaw na Tyumanem. Masalig da ya pagpangintu-u mayu kan Kristu. Aw awun manga utaw dun ni kamayu na matadeng da mag-ubat-ubat aw nyaka-edeꞌ sa kakawasan na tingeg na Tyumanem. To-o kamu maseb dun ni imo-unun na Tyumanem. Aw pigpakitaꞌ mayu kanami na to-o mayu kami pigginawa͡an. Yanagaw kaliman nami na to-o mayu uman pagbetang sa ginawa ya pagtabang sa eped. 8Aw bekeꞌ na suguꞌ ku na matag kamu, manang kaliman ku tanda-en kun tengteng matinaw ya pagginawa mayu sa manga eped. Aw kun to-o kamu manimbet kasiling na manga eped na mangintu-uway na mig-atag, dun da kapulbayi na matinaw ya pagginawa mayu. 9Kay nya-edeꞌ da kamu sa grasya ni Jisu-Kristu na Matas na Pangulu tadun. Pangkay mayaman sakanan adti tas na langit, manang asuntu kanaten migpakatagituꞌ sakanan magi dun ni pagpaka-utaw nan. Pig-imoꞌ nan yeiy pada ma-imoꞌ kitadun mayaman dun ni pagpangintu-u tadun kanan. 10Aw ini ya palna-u ku kamayu: Madyaw na padelegen mayu ya pagsagipun sa kuwalta na un mayu tabang. Idtu na nyagi na umay, yan ya pigkaliman mayu ya pagtabang, aw kamu saba ya nyaka-una nyaka-anenganeng na imo-un yeiy. 11Yanagaw padelega mayu yeiy. Tibagsegi mayu na matigkas ya pigpalpa mayu dadan na matag kamu, aw pag-atag kamu kutub na kamayu mabatug. 12Kay kun yan ya pagkaliman mayu ya matag, dawaten saba na Tyumanem ya mabatug mayu atag, aw diliꞌ sakanan mag-iman sa diliꞌ mayu mabatug.
13Kay diliꞌ aku malim na to-o kamu magkapelek asuntu sa pagtabang mayu sa eped na manga utaw. 14Manang asuntu na madyaw ya pagpakabetang mayu adun, yanagaw kamu ya tumabang sa manga utaw na umbaꞌ tabangan. Pagaw kun dumateng ya allaw na magkapelek kamu, silan da uman ya tumabang kamayu. Sa maynan na pa-agi, masambat ya kapelekan na tagsambuksambuk kamayu. 15Pigpasulat na Tyumanem asini muna, law nan,
“Ya utaw na migtipun sa dakulaꞌ, walaꞌ ya nyasamaꞌ na pigtipun nan,
aw ya migtipun sa tagbiꞌ, umbaꞌ saba kanan.”#8:15 Mabasa adti Éxudo 16:18.
Ya imo-unun na un padelegen ni Tito aw manga eped nan
16Na, migpasalamat kami sa Tyumanem na pigbetang nan adti anenganeng ni Tito na to-o tumabang kamayu kasiling na kanami kalim pagtabang kamayu. 17Yanagaw maksay sakanan tyumandeꞌ sa palpa na padala nami sakanan adti kamayu. Kay yan ya dadan nan pigkaliman na madtu pangkay sa walaꞌ pa nami sakanan paglonga. 18Aw pa-agad nami kanan ya sambuk na inulug tadun na to-o pigsayaꞌ na manga mangintu-uway adti kadég na manga banwa asuntu sa pagpa-edeꞌ nan sa Madyaw na Ubat-ubat kan Kristu. 19Pigpamalliꞌ nilan sakanan na yan ya un magad uman kanami sa pag-ated sa tabang adti manga mangintu-uway na awun ni Judiya. Aw magi sa imo-unun yeiy, madeyen ya kanaten Matas na Pangulu, aw pa-edeꞌ adti kanilan na to-o nami kaliman na tumabang kanilan. 20To-o kami migpakatanaw dun ni kanami pagtipun aw pagpadala sa dakulaꞌ na kuwalta pada walaꞌ ya un pagsalaꞌ kanami. 21Kay ya tengteng pagkaliman nami, yan ya pag-imoꞌ sa madyaw, bekeꞌ oloꞌ na adti asdangan na Tyumanem manang dala uman adti manga utaw.
22Aw awun pa uman sambuk na inulug tadun na un nami pa-agad kanilan. Maseb sakanan aw kyapulba͡an da dun ni madég na imo-unun. Aw adun, to-o nan kaliman magad kay dakulaꞌ saba ya pagsalig nan kamayu. 23Na, kun awun musip kamayu kun singalan si Tito, paglonga silan na si Tito, yan ya eped ku dun ni imo-unun na Tyumanem adti kamayu. Aw ya duwa na un magad kanan adti kamayu, silan ya pigpamalliꞌ na manga mangintu-uway dun ni kanilan manga banwa. Kay magi kanilan patasen ya dengeg ni Kristu. 24Yanagaw pakita͡an mayu kanilan na to-o mayu silan pigginawa͡an, aw dun da ka-ede-i na kadég na mangintu-uway na matinaw ya pagsayaꞌ nami kamayu.
Currently Selected:
2 Corinto 8: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
