2 Corinto 7
7
1Kay manga inulug na kanak pigginawa͡an, asuntu sa manga pigpakang na Tyumanem kanaten, yanagaw linisan tadun ya kanaten anenganeng aw pagka-utawun adti kadég na makapalipaꞌ kanaten. Aw tibullukun tadun ya pagdalug sa pagkaliman na Tyumanem na awun pagkallek kanan, pada dayaw kitadun masiling kanan.
Ya pagleya ni Pablo
2Kay manga inulug, pakita͡an ya kamayu pagginawa kanami. Walaꞌ saba ya pig-imoꞌ nami na malatay adti pangkay singalan. Aw walaꞌ nami pasuwaya ya eped na utaw. Aw walaꞌ uman ya piglimbungan nami. 3Na, nyakapaglong aku sa maynini, bekeꞌ yan na pigpasalaꞌ ta kamu. Kay kasiling na piglong da ku kamayu idtu muna, to-o kamu nami pigginawa͡an. Yanagaw pangkay unu pa ya ma-imoꞌ aw unu ya kanaten datengan, diliꞌ ma-uman ya pagginawa nami kamayu aw diliꞌ kitadun mag-ayaw-ayaway. 4Dakulaꞌ ya pagsalig ku kamayu, yanagaw walaꞌ aku kabekenbeken paglong adti manga eped sa pagpangintu-u mayu na to-o la masalig. Aw pangkay madég ya kalugan na kya-agiyan nami, manang asuntu kamayu migkabagseg ya kanaken ginawa aw to-o dakulaꞌ ya kanak pagleya. 5Idtu na pagdateng nami adti Macédoniya, walaꞌ pakalagdeng ya kanami lawas. Pangkay ayin kami kadtu, awun manga pagti-is aw manga kalugan. Madég ya migbalabag sa kanami pag-ubat-ubat. Aw madég ya kakallekan aw kakaypengan nami. 6Manang ya Tyumanem, yan ya migpakabagseg sa manga migkalumay ya ginawa. Aw pigpakabagseg nan kami magi sa pagdateng ni Tito. 7Aw bekeꞌ oloꞌ na pagdateng nan ya nyakapaleya kanami, manang dala uman ya piglong nan na pigpakabagseg mayu sakanan. Aw piglong nan na to-o mayu kaliman na magkakita͡ay kitadun. Miglong uman sakanan na migkalat ya ginawa mayu sa nyangka-imoꞌ dun ni kamayu. Aw piglong pa nan uman na nyaypeng kamu kanak. Aw asuntu seiy to-o pa aku migleya.
8Aw pangkay kun migkalat ya ginawa mayu asuntu sa sulat ku kamayu idtu muna, manang walaꞌ ku selseli na pigsulat ku yan. Yan oloꞌ ya pigselselan ku na ya kanak sulat nyakapagkalat sa ginawa mayu dagawdagaw. 9Manang adun, dakulaꞌ ya kanak pagleya, bekeꞌ na asuntu sa pagkalat na ginawa mayu, manang asuntu na yan baling ya indeganan na migselsel kamu. Ya pagkalat na ginawa mayu lekat adti Tyumanem pada madyaw ya sampetan. Aw bekeꞌ saba yeiy na kalatayan mayu manang pada sa kadyawan mayu. 10Kay ya pagpakalat na Tyumanem sa ginawa na utaw awun saba ma-untung, kay dun silan lekat pagselsel aw paluwa-en silan na Tyumanem adti kanilan manga salaꞌ. Manang ya pagkalat na ginawa na manga utaw na walaꞌ pangintu-u, diliꞌ sumampet adti pagselsel sa manga salaꞌ nilan, aw yan ya datengan nilan ya pa-emel-emelen silan na Tyumanem na walaꞌ ya tyamanan. 11Tanawa ya syampetan na manga pig-imoꞌ na Tyumanem adti kamayu asuntu sa pagkalat na ginawa mayu: To-o mayu pigbetang sa ginawa ya pagpitul sa manga mangintu-uway na mig-imoꞌ sa malatay dun ni kamayu. Aw to-o kamu nyadaman kanilan. Pigtibagsegan mayu ya kadég yeiy pada diliꞌ kamu selselen. Aw kyapulba͡an da na awun tengteng pagkallek mayu sa pa-emel-emel na Tyumanem. Kaliman mayu to-o na magkakita͡ay pa uman kitadun. Aw nyatibulluk ya ginawa mayu dun ni manga imo-unun na awun ni kamayu dala ya pag-uli-uli-ay na kadég. Aw sa kadég yeiy, dun da ka-ede-i na walaꞌ ya tengteng na pagsalaꞌ kamayu.
12Ya pagsulat ku kamayu idtu na muna, bekeꞌ na asuntu sa utaw na mig-imoꞌ sa malatay, aw bekeꞌ uman sa utaw na pig-imo-an sa malatay, manang pada mabangal adti kamayu na adti Tyumanem tengteng mayu kami pigginawa͡an. 13Yanagaw migkabagseg ya kanami ginawa. Aw bekeꞌ na yan da oloꞌ, to-o pa uman kami migleya asuntu na pigpaleya mayu si Tito aw pigpakaga͡an mayu ya kanan ginawa. 14Idtu muna, pigsayaꞌ ta kamu adti kan Tito. Aw walaꞌ aku kabullugi kay kya-ede-an da nan na alag matinaw ya piglong ku adti kanan, kasiling na piglong ku kamayu ya matinaw. 15Aw to-o pa migkadakulaꞌ ya pagginawa ni Tito kamayu sa dun na pagka-anenganengan nan na to-o mayu sakanan pigbasa͡an aw pigdalug mayu ya palna-u nan. 16Migleya aku to-o kay tengteng kamu kasaligan.
Currently Selected:
2 Corinto 7: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
