2 Corinto 6
6
1Yanagaw asuntu na tyumabang kami sa manga imo-unun na Tyumanem, nyanginayuꞌ kami kamayu na diliꞌ mayu pagpalipaslipasan ya kanan grasya na nyadawat mayu magi kan Kristu, pada diliꞌ masapad adti kamayu ya kanan grasya. 2Kay pigpasulat na Tyumanem asini muna, law nan:
“Dun ni allaw na pigpamalliꞌ ku, pyakanyegan ta kaw,
aw pigpaluwaꞌ ta kaw asuntu sa kallat ku kanmu.”#6:2 Mabasa adti Isayas 49:8.
Yanagaw pagpakanyeg kamu! Adun ya umbaꞌ na allaw na pigpamalliꞌ nan. Aw yeiy da ya allaw na paluwa-en kamu na Tyumanem.
Ya manga kalugan na kya-agiyan ni Pablo aw manga eped nan
3Na, walaꞌ ya pig-imoꞌ nami na makapabalabag sa pagpangintu-u na manga utaw, pada walaꞌ ya pagsalaꞌ dun ni kanami imo-unun. 4Manang dun ni kadég na kanami pigpan-imoꞌ, pigpakitaꞌ nami ya bet na umbaꞌ sa sugu-anen na Tyumanem. Pangkay unu ya manga kalugan aw pamulayam na kanami kya-agiyan, pigti-is nami ya kadég. 5Piglemen nami ya piglabet aw pigpakalabusu. Aw dun ni kanami pag-ubat-ubat, gayed migpanggubut ya manga utaw. To-o kami uman migkalug dun ni kanami talabahu, aw nyapulaw kami na gabi, aw to-o kami nyagetem. 6Manang pigpakitaꞌ nami adti manga utaw na walaꞌ ya pagsalaꞌ sa kanami bet, aw dun kabangal na kya-ede-an nami ya kakawasan na tingeg na Tyumanem. Pagkita-en dun ni kanami na pigti-is nami ya bet na manga utaw aw pigkallatan nami silan. Pigdalug nami ya pagkaliman na Ispiritu Santo, aw ya kanami pagginawa sa manga utaw tengteng saba na matinaw. 7Aw ya kanami pigpalna-u, yan saba ya katinawan na lekat adti Tyumanem, aw nyabatug uman magi sa katulus nan. Aw ya pagdalug nami sa pagkaliman na Tyumanem, yan ya un magdeg sa malatay, kasiling na sundalu na nyawid sa kampilan dun ni kalintu nan aw kalasag dun ni kawala nan. 8Pangkay madyaw ya dengeg nami aw pigsayaꞌ kami na manga eped, manang awun uman migmulamula kanami aw walaꞌ kami nilan basabasayi. Ya eped miglong kanami sa malat, manang awun uman manga eped na miglong kanami sa madyaw. Awun manga utaw na migtanemtanem kanami na piggawayan nami kunu ya manga eped magi sa palna-u, manang alag saba matinaw ya kanami piglong. 9Awun manga eped kanilan na migpalipaslipas kanami manang nya-edeꞌ ya Tyumanem sa kanami anenganeng. Aw pangkay gayed nami syolok ya kalatayan aw byabang da nami ya kutkut, manang kenneꞌ na utaw pa kami! Aw pangkay pigtumbay na Tyumanem ya kadég na pamulayam yeiy, manang walaꞌ kami kamatay. 10Aw pangkay to-o migkalat ya kanami ginawa, manang kenneꞌ nami migleya. Aw pangkay walaꞌ ya pagkamangan nami, manang magi sa kanami pag-ubat-ubat sa tingeg na Tyumanem, liwan na nyaka-atag kami adti kadég sa ka-unan. Aw pangkay walaꞌ ya kanami pametang asini tas na lupaꞌ, manang nyatagtun nami ya kadég na pigpakang na Tyumanem.
11Kay manga inulug ku na awun ni Corinto, pakanyegi mayu ya kanami piglong adti kamayu. Asuntu na to-o kamu nami pigginawa͡an, walaꞌ kami kabekenbeken paglong kamayu. 12Ya pagginawa nami kamayu walaꞌ ya tyamanan, manang ya kamayu pagginawa kanami migkanikiꞌ da. 13Piglongan ta kamu seiy kay pigsiling ku kamu na kanak manga mangayseꞌ. Ginawayi kami mayu kasiling na pagginawa nami kamayu.
Ya palna-u na diliꞌ magpasambuk sa utaw na walaꞌ pangintu-u
14Diliꞌ kamu gayed magpasambuk aw magpadaladala sa manga utaw na walaꞌ pangintu-u. Diliꞌ saba madyaw na magsambuk ya manga dyumalug sa pagkaliman na Tyumanem aw ya manga walaꞌ dalug kanan. Kay diliꞌ mabatug mag-isambuk ya kalalamdag aw ya mangitngit. 15Tengteng saba na diliꞌ mabatug magkasambuk ya anenganeng ni Kristu aw ya anenganeng ni Satanas. Yanagaw, diliꞌ mag-unawa ya anenganeng na mangintu-uway kan Kristu aw ya walaꞌ pangintu-u kanan. 16Kasiling kitadun saba na Témplo na pig-eya-an na Tyumanem na Gayed Awun. Aw adti Témplo yeiy, diliꞌ mabatug na dun uman ya manga palangad tyumanem. Kay diliꞌ mabatug pagsambukun silan. Aw miglong ya Tyumanem asini muna:
“Meyaꞌ aku dun eped nilan aw gayed ku silan agad-agadan.
Aku ya un nilan imo-un kanilan Tyumanem,
aw imo-un ku uman silan kanak manga utaw.”#6:16 Mabasa adti Libitiko 26:12 aw Ézékiyél 37:27.
Aw miglong pa ya Tyumanem kanilan,
17 “Yanagaw diliꞌ kamu magpasambuk sa manga utaw na walaꞌ ya pagpangintu-u kanakeꞌ,
aw diliꞌ kamu uman magpadaladala kanilan.
Diliꞌ mayu pag-awidan ya malatay na makapalipaꞌ kamayu.
Kun dalugun mayu ya kanak manga suguꞌ, dawaten ta kamu.#6:17 Mabasa adti Isayas 52:11 aw Ézékiyél 20:34,41.
18 Aw aku ma-imoꞌ ama mayu,
aw kamu uman ma-imoꞌ kanaken manga mangayseꞌ na eseg aw manga mangayseꞌ na bubay.”#6:18 Mabasa adti 2 Samwél 7:14.
Yeiy ya piglong na Tyumanem na migdumala sa kadég.
Currently Selected:
2 Corinto 6: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
