2 Corinto 5

Ya bagu na lawas na pig-iman na manga mangintu-uway

1Kay kya-ede-an da tadun na kun matay ya kanaten lawas, sayuwan saba na Tyumanem na bagu na lawas kagaya adti tas na langit na diliꞌ da magkamatay aw walaꞌ imo-a na utaw. 2Manang talana pa tadun nyeyaꞌ asini tas na lupaꞌ, gayed pa kitadun mig-agele asuntu na kyabegatan, aw kaliman da galu tadun na maksay sutun ya bagu na lawas na pigtagilan na Tyumanem. 3Kay kun pasut da nan kanaten ya bagu na lawas, diliꞌ da kitadun kalaluwa na walaꞌ ya lawas. 4Yanagaw sa asini pa kitadun ni tas na lupaꞌ, kenneꞌ pa tadun mig-agele asuntu na to-o kitadun kyabegatan. Walaꞌ aku paglong na kaliman da tadun matay ya lawas tadun, manang yan ya tengteng kaliman tadun na sutun da ya bagu na lawas na diliꞌ da magkamatay. 5Aw ya Tyumanem, yan ya migtagilan kanaten sa kadég yeiy, aw pig-atagan kitadun nan na kanan Ispiritu na palangad eket sa kadég na pigpakang nan.

6Yanagaw gayed kitadun syumalig na tumanen na Tyumanem ya manga pigpakang nan kanaten, pangkay nyeyaꞌ pa kitadun asini tas na lupaꞌ aw mawat pa kitadun adti eya-anan na Matas na Pangulu. 7Kay pangkay walaꞌ pa tadun kita-a ya manga pigpakang kanaten na Tyumanem, manang gayed kitadun migpadeleg nyangintu-u kanan na atag nan ya kadég yeiy. 8Matinaw saba ya piglong nami na gayed kami syumalig sa pigpakang nan kanaten, aw kaliman nami indegan ya lawas yeiy aw meyaꞌ adti sayid na kanaten Matas na Pangulu. 9Yanagaw pangkay asini pa kami ni tas na lupaꞌ aw kun adtu la ni tampid nan, gayed pa nami tibullukun ya kanami anenganeng adti makatutuk sa Tyumanem. 10Kay ya kadég tadun ka-ilangan mindeg adti asdangan ni Kristu pada ukuman nan. Aw ya tagsambuksambuk kanaten un dumawat umbaꞌ sa pig-imoꞌ tadun na madyaw aw malat.

Ya paggagad sa manga utaw adti kan Kristu

11Yanagaw asuntu na awun pagkallek nami sa Tyumanem, pigtibagsegan nami na gagaden ya manga utaw pada mangintu-u kanan. Kya-ede-an nan saba na matinaw ya kanami anenganeng, aw nyiman kami na kya-ede-an mayu uman. 12Bekeꞌ na tud nami na sayaꞌ mayu kami salut. Manang yan baling ya kaliman nami na ka-ede-an mayu na matinaw ya kanami tud, pada awun mapaglong mayu uman adti manga utaw na kyumele kanami. Migpalibantug silan na madyaw kunu ya imo-unun nilan, manang sangkamuluꞌ ya adti kanilan anenganeng. 13Pagaw awun utaw na maglong na migkamenengmeneng kami. Manang ya kanami pig-imoꞌ asuntu saba na pigpatas nami ya dengeg na Tyumanem. Madyaw ya kanami anenganeng, aw dakulaꞌ ya ma-untung mayu dun. 14Ya kadég na pig-imoꞌ tadun lekat saba adti kadakulaꞌ na pagginawa ni Kristu kanaten. Kay kya-ede-an nami na nyatay si Kristu pada sa kadég na utaw. Aw ya kadég tadun na nyangintu-u kanan, kasiling na nyaka-agad da kitadun dun ni pagkamatay nan. 15Aw yan ya du-an na nyatay sakanan asuntu sa kadég na utaw, pada sa pag-eyaꞌ pa tadun asini tas na lupaꞌ diliꞌ da tadun dalugun ya pagkaliman na kanaten pagka-utawun. Manang yan baling ya dalugun tadun ya pagkaliman ni Kristu kay yan ya nyatay pada kanaten aw nyataw uman.

16Idtu na muna, ya pag-anenganeng nami sa eped na manga utaw taman oloꞌ dun ni pigkitaꞌ nami adti kanilan. Pangkay si Kristu maynan uman ya pag-anenganeng nami kanan. Manang adun, walaꞌ da nami anenganenga ya pigkitaꞌ nami oloꞌ. 17Yanagaw pangkay singalan ya nyakasambuk da dun ni kan Kristu, nyabagu la sakanan. Kay lyumabay da ya dadan aw ya bagu migpalekat da. 18Aw ya kadég yeiy, Tyumanem oloꞌ ya nyaka-imoꞌ. Kay pigpalikuꞌ kitadun nan magi kan Kristu. Aw pig-atag kanami uman na Tyumanem ya pagpalikuꞌ sa manga utaw adti kanan. 19Ini ya kanami pig-ubat-ubat: Magi sa pig-imoꞌ ni Kristu adti krus, mabatug da nan paliku-un ya manga utaw na mangintu-u kanan, aw adti anenganeng na Tyumanem walaꞌ da ya kanilan salaꞌ. Aw pig-atag nan kanami ya pag-ubat-ubat pada makalikuꞌ ya manga utaw adti kanan.

20Aw pigpadala kami ni Kristu na un maggagad sa manga utaw adti Tyumanem. Yanagaw magi sa katundanan na pig-atag kanami ni Kristu, kasiling na Tyumanem ya nyanginayuꞌ na lumikuꞌ kamu adti kanan. 21Si Kristu, walaꞌ ya salaꞌ dun ni kanan. Manang asuntu sa pagbayaꞌ na Tyumanem, nyakapisan baling adti kan Kristu ya kadég na salaꞌ na manga utaw pada dawaten kitadun na Tyumanem kasiling na walaꞌ da ya salaꞌ.

Currently Selected:

2 Corinto 5: klgv

Highlight

Copy

Compare