2 Corinto 3

Ya bagu na pa-agi sa pagpalapit adti Tyumanem

1Pagaw mag-anenganeng kamu na uman da nami pigsayaꞌ ya kanami pagka-utawun pada dawaten kami mayu. Manang diliꞌ kami kasiling na eped na ka-ilangan nilan dumala sa sulat na un magmatinaw sa tud nilan pada dawaten mayu. Aw walaꞌ uman ya sulat na dyala nami lekat adti kamayu pada dawaten kami na manga eped na manga mangintu-uway. 2Kamu saba ya palangad sulat na mabasa na kadég na manga utaw. Magi sa pigpan-imoꞌ mayu na madyaw, yan ya magmatinaw adti kanilan sa bet nami aw sa kanami manga pigpalna-u. 3Kasiling kamu na sulat ni Kristu. Aw ya sulat yeiy, bekeꞌ na pagkasulat magi sa tintaꞌ adti papil aw bekeꞌ uman na pigsulat adti lapid na batu, manang magi sa Ispiritu na Tyumanem na Gayed Awun, na yan ya nyeyaꞌ dun ni seled na tagsambuksambuk kamayu. Aw nyasulat saba yeiy dun ni kamayu anenganeng.

4Na, nyakapaglong kami sa maynan asuntu na dakulaꞌ ya pagsalig nami sa Tyumanem magi sa pig-imoꞌ ni Kristu. 5Kun kanami oloꞌ pagka-utawun ya kanami pigsaligan, diliꞌ nami mabatug ya manga imo-unun yeiy. Manang nyabatug nami ya kadakulaꞌ asuntu sa tabang na Tyumanem. 6Aw yan ya mig-imoꞌ kanami magpalna-uway sa bagu na pakang nan na dayaw mag-iganget. Ya muna pakang pigsulat adti lapid na batu, aw ya manga lyumakad ka-eletan silan adti Tyumanem na walaꞌ ya tyamanan. Manang adti bagu na pakang, pig-atag na Tyumanem ya kanan Ispiritu na un maggagad sa kanaten anenganeng pada matagtun tadun ya ginawa na walaꞌ ya katigkasan.

To-o pa madyaw ya bagu na pakang kay sa muna

7Na, ya muna pakang na pigsulat adti manga lapid na batu,#3:7 Mabasa adti Éxudo kapitulu 34. walaꞌ kabatug na manga utaw tumana ya kadég na suguꞌ dun, aw ya syampetan, kya-eletan silan adti Tyumanem. Pangkay maynan, manang kenneꞌ nan pigpakitaꞌ ya kanan kadyaw dun ni muna pakang nan. Kay sa pagtubang ni Moysis lekat adti buntud na Sinay, nyinag ya gya nan asuntu na kya-ilawan sakanan na kalalamdag na Tyumanem aw walaꞌ kabatug na manga utaw na Isra-él inunuwa ya gya nan, pangkay maya-mayaꞌ nyalagak ya kalalamdag dun. 8Aw ya bagu na pakang, to-o pa dun dakulaꞌ ya kadyaw na Tyumanem, magi sa kanan Ispiritu na gayed miggagad sa kanaten anenganeng. 9Na, kun pigpakitaꞌ ya kadyaw na Tyumanem dun ni muna pakang pangkay kya-eletan ya manga utaw adti kanan asuntu sa manga salaꞌ nilan, to-o pa dun dakulaꞌ ya kadyaw na bagu na pakang, kay dawaten saba na Tyumanem ya manga utaw kasiling na walaꞌ da ya salaꞌ. 10Ya tengteng matinaw, madyaw ya muna pakang, manang nyalagak ya kadyaw nan asuntu na dyumateng ya bagu na pakang na to-o pa madyaw. 11Aw ya kadyaw na muna pakang na awun tyamanan, diliꞌ maka-unawa sa kadyaw na bagu na pakang na walaꞌ ya tyamanan.

12Asuntu na awun pag-iman nami seiy, walaꞌ ya kakallekan nami magpa-edeꞌ sa Madyaw na Ubat-ubat kan Kristu. 13Diliꞌ kami kasiling ni Moysis na pigtampeng nan ya kanan gya pada diliꞌ kita-en na manga utaw na Isra-él ya pagkalagak na kalalamdag dun ni gya nan. 14Kay dun ni manga allaw yan, walaꞌ kabukasi ya kanilan anenganeng sa pigpakang na Tyumanem kanilan. Aw taman adun kenneꞌ na kategelan na manga utaw na Isra-él. Pigbasa nilan ya muna pakang, manang kasiling na kyatampengan pa ya kanilan anenganeng kay walaꞌ nilan kalabeti ya palpa na Tyumanem. Si Kristu oloꞌ ya makakamang sa nyakatampeng sa anenganeng nilan. 15Yanagaw, taman adun, pangkay kinunu silan pagbasa sa Uldin na pig-atag na Tyumanem magi kan Moysis, kenneꞌ na walaꞌ nilan kalabeti kay kyatampengan pa ya kanilan anenganeng. 16Manang kun mangintu-u ya utaw sa kanaten Matas na Pangulu na si Jisu-Kristu, makamang da ya nyakatampeng sa anenganeng nilan. 17Na, ya Matas na Pangulu na pigkasampetan asini, Ispiritu sakanan. Aw dun ni pig-imoꞌ na Ispiritu na Tyumanem adti manga utaw, makaluwaꞌ da silan lekat adti pag-allang kanilan na salaꞌ aw lekat adti pagdalug sa Uldin. 18Yanagaw, ya kadég tadun na nyangintu-u kan Kristu, walaꞌ da ya nyakatampeng sa kanaten anenganeng. Kyinitaꞌ da tadun ya kadyaw na pagka Tyumanem nan. Aw magi sa Ispiritu nan, maya-mayaꞌ mabagu ya anenganeng tadun mendaꞌ na dayaw uman kita-en adti kanaten ya kadyaw ni Jisu-Kristu.

Currently Selected:

2 Corinto 3: klgv

Highlight

Copy

Compare