2 Corinto 13
13
Ya katigkasan na sulat ni Pablo
1Na, yeiy ya katlu na pagkawun ku dun ni kamayu. Aw talana ku dun, kun awun utaw na maglimanda sa eped, diliꞌ mayu pagkalingawan ya pigpasulat na Tyumanem asini muna, “Kun maglimanda ya sambuk na utaw adti eped, ka-ilangan awun duwa kun tulu ya magmatinaw.”#13:1 Mabasa adti Déutéronomiyo 19:15. 2Idtu na kadwa na pagkawun ku dun ni kamayu, pigsagda ku ya manga utaw na mig-imoꞌ sa salaꞌ. Aw adun, sa diliꞌ pa aku madtu ni sayid mayu, salutun ku ya piglong da ku kanilan dala ya kadég mayu, na kun diliꞌ nilan patenengen ya pagpakasalaꞌ, pitulun ku silan aw diliꞌ ku silan kallatan. 3Kay kaliman mayu na matinawun ku na si Kristu yan ya miglong magi kanak. Pitulun ku ya manga mangintu-uway na kenneꞌ pa mig-imoꞌ sa malatay, kay awun saba katundanan ku lekat adti kan Kristu aw walaꞌ ya diliꞌ nan mabatug. Matulus to-o sakanan dun ni pagpitul nan sa manga utaw na awun ni kamayu na mig-imoꞌ sa salaꞌ. 4Idtu muna sa pagkalabu kan Kristu adti krus, iman mu aw walaꞌ da ya mabatug nan. Manang magi sa katulus na Tyumanem, nyataw sakanan lekat adti pagkamatay. Maynan uman, iman mayu aw walaꞌ ya mabatug nami na manga sugu-anen ni Kristu, kay matas ya pasinsiya nami kamayu. Manang kita-en mayu na mabagseg kami magpitul kamayu magi sa katulus na Tyumanem na asini kanami.
5Yanagaw anenganenga mayu kun tengteng kamu nyangintu-u kan Kristu. Kun nyangintu-u la kamu, nya-edeꞌ da kamu na nyeyaꞌ si Jisu-Kristu dun ni kamayu. Manang kun walaꞌ mayu yeiy ka-ede-i, yan ya magmatinaw na walaꞌ kamu pangintu-u kanan. 6Aw pig-iman ku na ka-ede-an mayu uman na tengteng kami apostolés ni Kristu. 7Na, nyanawagtawag kami sa Tyumanem na diliꞌ mayu imo-un ya malatay, pada walaꞌ ya indeganan na pakitaꞌ nami ya kanami katundanan magi sa pagpitul kamayu. Pangkay diliꞌ mayu kami pagbetang sa ginawa asal nan pig-imoꞌ mayu ya madyaw. 8Diliꞌ nami mabatug atuwan ya katinawan, manang yan oloꞌ ya pagdalugun nami. 9Pangkay walaꞌ ya mabatug nami, manang migleya kami na nyakadalid da ya kamayu pagpangintu-u aw pigpanawagtawagan nami na to-o pa magkadyaw ya bet mayu. 10Aw yeiy ya du-an na migsulat aku kamayu talana idi pa aku ni mawat. Kay kun dumateng aku dun, diliꞌ aku malim na pitulun ta kamu magi sa masakit na manga tingeg. Walaꞌ aku atagi na Tyumanem na katundanan pada pakalumayen ya kamayu pagpangintu-u, manang pakabagsegen pa baling.
11Na, kay manga inulug ku, sa diliꞌ pa ku tigkasen ya kanaken sulat ini, awun pa paglongun ku kamayu: Pagleya kamu! Pakita͡an dun ni bet mayu na tengteng pigdalug mayu ya Tyumanem. Daluga mayu uman ya pigpalna-u ku. Pagsambuka ya kamayu anenganeng pada awun kalinaw dun ni kamayu. Aw kun imo-un mayu yeiy, agadan kamu na Tyumanem na yan ya lyekatan sa paggaginawa͡ay aw kalinaw.
12Pagpangumusta͡ay kamu kay mangkaylug kamu dun ni kan Kristu. 13Aw ya kadég na mangintu-uway na idi sayid ku, nyangumusta uman silan kamayu.
14Ayin pa aku galu na awun gayed ni kamayu ya grasya ni Jisu-Kristu na kanaten Matas na Pangulu, aw ya pagginawa na Tyumanem, aw ya pagpakasambuk na kadég mayu magi sa Ispiritu Santo.
Currently Selected:
2 Corinto 13: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
