2 Corinto 12

Ya manga pigpakitaꞌ kan Pablo

1Nyaleges aku magpalibantug pangkay walaꞌ ya guna dun. Yanagaw ubat-ubat ku adun ya manga pigpakitaꞌ kanak kasiling na tagaynep aw ya pigpa-edeꞌ kanak na kanaten Matas na Pangulu na si Jisus: 2-3Idtu na sampuluꞌ tag upat (14) ya umay na lyumabay, awun nya-imoꞌ kanaken na nya-engat aku adti Para-iso na awun ni tas na langit. Walaꞌ ku ka-ede-i kun dyala oloꞌ ya kanak kalaluwa aw kun dyala uman ya lawas ku. Tyumanem da oloꞌ ya nya-edeꞌ. 4Manang nya-edeꞌ aku na pigdala aku adti Para-iso. Aw awun manga dyengeg ku na diliꞌ mabatug ubaden adti kana utaw tingeg aw walaꞌ tumbayan na paglongun na utaw. 5Ya maynan na kya-agiyan, yan ya umbaꞌ palibantug. Manang diliꞌ ku palibantug ya kanak pagka-utawun. Kaliman ku oloꞌ pa-edeꞌ na walaꞌ ya kanaken tengteng mabatug. 6Aw pangkay kun kaliman ku magpalibantug, manang bekeꞌ aku na menengmeneng kay piglong ku ya matinaw. Manang tagenan ku ya kanak pagpalibantug, kay kaliman ku na ya manga utaw ya mag-anenganeng sa unu ya kanilan kyinitaꞌ aw pigdengeg nilan adi kanak, aw diliꞌ na aku ya mag-ubat-ubat sa kanak manga kya-agiyan.

7Madég ya pigbukasan kanak na Tyumanem na walaꞌ ya maka-unawa, yanagaw pigpa-agiyan nan uman kanak ya malug pada diliꞌ aku magpatastas asuntu sa pigpakitaꞌ nan kanak. Pigtumbay nan kan Satanas na pati-isen aku, aw ya pagti-is yeiy kasiling na suksuk adti lawas ku pada diliꞌ aku magpalibantug. 8Makatlu aku panginayuꞌ adti Tyumanem na kamangen nan yeiy lekat adi kanakeꞌ, 9manang walaꞌ nan kamanga. Miglong baling sakanan kanak, “Umbaꞌ saba ya kanak grasya kanmu. Kay pig-apet da mu ya kanak katulus pangkay walaꞌ ya mabatug mu.” Yanagaw magleya aku maglong na walaꞌ ya kanak mabatug, pada meyaꞌ asini kanaken ya katulus ni Kristu. 10Yanagaw pagleya͡an ku baling ya manga diliꞌ ku mabatug, dala ya pagsupla na manga po-on, aw ya manga pagpamulayam, aw eped pa na manga kalugan asuntu sa pagdalug ku kan Kristu. Kay kun awun diliꞌ ku mabatug, pigpakabagseg saba aku na Tyumanem.

Ya kakaypengan ni Pablo sa manga mangintu-uway adti Corinto

11Na, kasiling aku na utaw na menengmeneng kay pigleges aku mayu magpalibantug. Kamu galu ya umbaꞌ magsayaꞌ kanak. Matinaw saba na diliꞌ aku dengganen na utaw manang diliꞌ aku uman kasalampawan na manga sallong kunu apostolés na migpatastas sa kanilan pagka-utawun. 12Sa dun pa aku ni sayid mayu, madég saba ya manga pangilala aw milagru na nya-imoꞌ magi sa katulus na Tyumanem. Aw migpadeleg aku pangkay awun manga kalugan na kya-agiyan ku. Aw alag yeiy migmatinaw na apostol aku ni Kristu. 13Ya kadég na pig-imoꞌ ku na madyaw adti eped na manga banwa, pig-imoꞌ ku uman dun ni kamayu. Yan oloꞌ ya walaꞌ ku imo-a dun ni kamayu, ya paglinggal magi sa pagsekat sa kanaken manga kapelekan. Kun yan ya sayep ku adti kamayu, pasinsiyayi aku mayu!

14Na, nyakatagilan da aku sa katlu na pagkawun ku dun ni kamayu. Aw diliꞌ aku magsekat kamayu sa tabang sa kanaken manga kapelekan. Bekeꞌ na kuwalta mayu ya kaliman ku, manang kamu saba ya kaliman ku. Kay kasiling kamu na kanak manga mangayseꞌ dun ni pagpangintu-u mayu kan Kristu. Aw bekeꞌ saba na manga mangayseꞌ ya mag-atag sa kapelekan na mangkatikadeng nilan, manang mangkatikadeng baling ya mag-atag sa kapelekan na mangayseꞌ nilan. 15Yanagaw magleya aku magtabang sa pagpakasalig sa kamayu pagpangintu-u, pangkay mabus pa ya awun ni kanak dala ya pagka-utawun ku. Na, kun to-o ta kamu pigginawa͡an, anangaꞌ na migkatagbiꞌ da baling ya pagginawa mayu kanaken?

16Na, nya-edeꞌ kamu saba na walaꞌ aku pagsekat adti kamayu sa kanaken kapelekan. Manang pagaw awun dun ni kamayu na maglong na piggawayan ta kamu magi sa kanak kapandayan. 17Manang pig-unu ku kaꞌ ya paggaway kamayu? Nya-edeꞌ kamu na walaꞌ ta kamu panguwaltayi magi sa manga utaw na pigsuguꞌ ku dun ni kamayu. 18Idtu muna, sa pagpakadtu ku kan Tito adti kamayu, awun pigpa-agad ku kanan na inulug tadun dun ni kan Kristu. Na, unu kaꞌ, nyanguwalta si Tito kamayu? Walaꞌ saba! Kya-ede-an da mayu na mig-unawa ya kanami anenganeng aw sambuk da ya tud nami.

19Pagaw mig-anenganeng kamu na pig-apitan nami ya kanami pagka-utawun. Bekeꞌ saba na maynan! Piglong nami yeiy magi sa katundanan ni Kristu. Aw ya Tyumanem, yan ya migmatinaw sa kanami piglong. Kay manga inulug na kanak pigginawa͡an, yan oloꞌ ya tud na kanami pigpan-imoꞌ, na pakabagsegen ya kamayu pagpangintu-u. 20Manang nyallek aku na diliꞌ aku katutukan sa pagdateng ku dun ni kamayu pagaw walaꞌ mayu daluga ya manga palna-u ku kamayu idtu muna. Aw kun maynan, diliꞌ kamu uman katutukan sa pagsagda ku kamayu. Pagaw awun pa ni kamayu ya pag-ayil-ayil, aw ya pag-inga-inga-ay, aw ya pagkadamanay, aw ya tagsambuksambuk pag-olo-un nan ya kanan pagka-utawun. Aw pagaw awun manga utaw na kenneꞌ pa miglong sa makapagkalat sa dengeg na eped, aw matitanemtanemay sa tingeg na galuꞌ, aw magpatastas sa kanilan pagka-utawun, aw matipanubbukay sa tanam. 21Nyallek aku pagaw sa pagkawun ku dun ni kamayu, mamulamula aku adti asdangan na Tyumanem asuntu sa manga salaꞌ mayu. Aw to-o magkalat baling ya ginawa ku kun walaꞌ pa na eped mayu selseli ya manga salaꞌ nilan kasiling na pagkasala-enen, aw ya pag-atag sa kanilan lawas adti kadég na malatay na imo-unun na makamulamula͡ay.

Currently Selected:

2 Corinto 12: klgv

Highlight

Copy

Compare