2 Corinto 11

Si Pablo aw ya manga sallong kunu apostolés

1Na, ya kaliman ku galu na ti-isen pa mayu tagbiꞌ ya pigsulat ku, pangkay dun ni kanak paglong kasiling aku na utaw na migkamenengmeneng. 2Kay to-o ta kamu pigdemet pagaw makasuway kamu. Kasiling kamu saba na dalaga na walaꞌ pa ka-ilabeti na pigpakang da ku adti eseg na un nan pangugnanen na yan si Kristu. 3Nyatibulluk da ya anenganeng mayu adti kan Kristu, manang nyallek aku pagaw kagawayan kamu baling kasiling na paggaway na ulud kan Iba asini muna. 4Kay pigdawat mayu ya manga eped na magpalna-uway na sallong kunu apostolés, aw pigdawat mayu baling ya baluk na palna-u nilan kun singalan si Jisus. Ya kanilan palna-u walaꞌ pag-unawa sa pigpalna-u nami kamayu na matinaw, manang miglong baling silan na yan ya Madyaw na Ubat-ubat. Aw pigpalna-uwan kamu nilan sa sangkamuluꞌ na ispiritu na bekeꞌ na Ispiritu Santo na pigdawat da mayu idtu muna. Na, anangaꞌ mayu silan pakanyegan? 5Ya manga sallong kunu apostolés yeiy, iman nilan aw to-o dakulaꞌ ya kanilan kya-ede-an aw matas ya kanilan katundanan. Unu kaꞌ, matas pa silan kanak? 6Pangkay diliꞌ aku abay matadeng mag-ubat-ubat kasiling nilan, manang madég ya kya-ede-an ku sa kana Tyumanem. Aw gayed ku yan pigmatinaw aw diliꞌ saba mataguꞌ adti pagpalna-u ku kamayu.

7Walaꞌ aku pagsekat adti kamayu sa tandan dun ni kanak pagpa-edeꞌ kamayu sa Madyaw na Ubat-ubat na lekat adti Tyumanem. Migpadalem aku baling aw migtalabahu pada mabatug padelegen ya imo-unun na Tyumanem aw kamu ya un to-o ka-untungan. Na, unu kaꞌ, salaꞌ ya pig-imoꞌ ku yan? 8Awun pigdawat ku na tabang na lekat adti manga mangintu-uway adti eped na manga banwa, yanagaw kasiling na pigkamangan ku silan pada mapadeleg ku ya imo-unun dun ni kamayu. 9Aw talana pa ku adti sayid mayu idtu muna, sa dun na migkapelek aku, walaꞌ saba aku pagsekat sa tabang adti pangkay singalan, kay awun tabang na manga mangintu-uway na dyumateng lekat adti Macédoniya. Yanagaw taman na mabatug ku, diliꞌ aku malim maglinggal kamayu aw gayed ku yeiy imo-un. 10Aw asuntu na asini kanak ya katinawan ni Kristu, ya pagpalibantug ku yeiy diliꞌ saba katagenan pangkay ayin dun ni kadakulaꞌ na probinsiya na Akaya. 11Aw pagaw mag-anenganeng kamu na walaꞌ ta kamu ginawayi asuntu na walaꞌ ta kamu sekati sa tabang, manang bekeꞌ na maynan, kay nya-edeꞌ ya Tyumanem na ya kadég mayu alag ku pigginawa͡an.

12Aw padelegen ku ya imo-unun na Tyumanem na diliꞌ magsekatenen sa tabang adti kamayu kay yan ya kanak kyanalaman, pada walaꞌ ya indeganan na manga sallong kunu apostolés dun ni kamayu magpalibantug maglong na ya kanilan imo-unun kasiling na kanami. 13Kay ya manga utaw yeiy, migtallalingu silan na apostolés kunu ni Kristu, aw piggawayan nilan ya manga utaw na pigpalna-uwan nilan. 14Aw diliꞌ yeiy kabelengbelengan kay pangkay si Satanas migtallalingu uman, iman mu aw anghil na Tyumanem. 15Yanagaw diliꞌ da uman kabelengbelengan na ya manga sakup nan migtallalingu na sallong dyumalug sa pagkaliman na Tyumanem. Manang dumateng ya allaw na pa-emel-emelen silan umbaꞌ sa kanilan manga pigpan-imoꞌ.

Ya manga pagti-is ni Pablo

16Salutun ku ya kanaken piglong: Diliꞌ kamu mag-anenganeng na migkamenengmeneng aku. Manang pangkay kun yan ya adti anenganeng mayu, sekaten ku na pakanyegan pa mayu ya tin tagbiꞌ na palibantug ku, kasiling na pagpakanyeg mayu sa pagpalibantug na manga sallong kunu apostolés. 17Ya palangad pagpalibantug ku, walaꞌ yeiy lekat adti Matas na Pangulu tadun na si Jisus manang kasiling baling na utaw na migkamenengmeneng. 18Manang asuntu na madég ya awun ni kamayu na migpalibantug sa kanilan nya-imoꞌ asini tas na lupaꞌ, un aku uman sa kanak magpalibantug. 19Adti kamayu anenganeng dakulaꞌ ya katadeng mayu, manang migleya kamu baling migpakanyeg sa manga utaw na migkamenengmeneng aw baluk ya anenganeng. 20Aw ya syampetan nan pig-allang kamu baling na eped na manga utaw. Pigti-is mayu uman ya kanilan paggaway aw ya pagpanguwalta nilan kamayu. Migpatastas silan dun ni asdangan mayu, aw pigmulamula nilan ya pangkay singalan na matu kanilan. Pangkay maynan ya pig-imoꞌ nilan, manang pigpabaya-an mayu baling silan. 21Walaꞌ ya kanami kayseg mag-imoꞌ sa maynan. Mamulamula saba kami maglong na diliꞌ nami mabatug imo-un ya maynan.

Na, kun awun utaw dun ni kamayu na magpalibantug sa manga pigpan-imoꞌ nilan, aku uman mabatug ku ya magpalibantug, pangkay ya piglong ku yeiy kasiling na utaw na migkamenengmeneng. 22Migpalibantug silan na Hibriyuwanen silan. Aku uman Hibriyuwanen. Migpalibantug silan na utaw silan na Isra-él. Aku uman utaw na Isra-él. Aw miglong silan na si Abraham ya kanilan tyugbulan. Yan uman ya kanak tyugbulan. 23Miglong silan na sugu-anen silan ni Kristu. Manang to-o pa aku madyaw na sugu-anen ni Kristu kay kanilan. Nya-edeꞌ aku na dun ni kanak paglong kasiling aku na utaw na migkamenengmeneng. To-o pa aku nyapagud kay kanilan. Makapila ku apeta ya pigpakalabusu asuntu sa pagdalug ku kan Kristu, aw to-o aku byadasan na lalabet. Aw madég ya kya-agiyan ku na kalatayan aw agpet da aku galu matay. 24Makalima aku labeta na manga eped ku na Judiyu. Aw kada labet nilan, katluwan tag siyam (39) ka labet. 25Makatlu aku uman labeta na ulisi na manga eped na utaw. Aw piglemen ku na pigbintu na batu. Aw sa kadég na barko na pigsakayan ku, tulu ya nyalened, aw piglemen ku ya miglutawlutaw adti tas na dagat seled na sanggabi aw sangallaw. 26Aw madég ya kallekanan adti manga banwa na kanak pigkadtuwan, aw mangkasleg ya tubig na manga gangaꞌ na pigpantalipag ku. Nyallek aku na banganan na manga mangkatakaw. Aw miglama aku uman sa manga kadégan ku na Judiyu, aw sa manga utaw na Héntil. Nyallek aku dun ni syudad aw adti kaligbinan aw adti tas uman na dagat. Aw miglama aku uman sa manga sallong kunu mangintu-uway. 27To-o aku migkalug asuntu sa manga talabahu ku. Awun manga gabi na nyapulaw aku aw to-o aku nyagetem aw pigtalaynem aw to-o uman kyaniki-an. 28Aw madég pa uman ya kakaypengan ku. Kada allaw to-o aku nyaypeng sa manga mangintu-uway na migkatipun pangkay ayin na banwa. 29Kun awun sambuk na migkalumay da ya pagpangintu-u nan, magkalat ya ginawa ku. Aw kun awun sambuk na magpasuway sa eped nan adti pagpakasalaꞌ, to-o saba aku madaman sa utaw na migpasuway.

30Yanagaw kun maleges aku magpalibantug, yan oloꞌ ya palibantug ku na walaꞌ ku kabatug ya manga imo-unun kun bekeꞌ na tabang na Tyumanem kanak. 31Ya Tyumanem na yan ya Ama na Matas na Pangulu tadun na si Jisus, umbaꞌ sakanan deyen na walaꞌ ya tyamanan. Aw yan ya nya-edeꞌ na alag matinaw ya kanaken piglong. 32Idtu muna sa talana pa ku dun ni syudad na Damasko, pigpabantayan na gubirnador ya manga suwangan na syudad pada padakep aku kay yan ya suguꞌ na kanilan hariꞌ na si Arétas. 33Manang pigpaseled aku na manga ubaybay ku adti seled na anes,#11:33 Ya anes yan ya to-o dakulaꞌ na be-en na diliꞌ mabatug dala͡en kun awun seled. aw pigtonton aku nilan dun ni bintanaꞌ na inalad na syudad. Yanagaw nyakaluwaꞌ aku.

Currently Selected:

2 Corinto 11: klgv

Highlight

Copy

Compare