1 Timotiyo 5
5
1Kun awun makasalaꞌ na manga eseg na unud da ya ginawa, diliꞌ mu silan pagkadamanan, manang palna-uwi baling silan magi sa madyaw na tingeg, kasiling na paglong mu sa kanmu ama. Aw dun ni paglong mu uman sa manga eseg na bagu pa ya ginawa, silinga na kanmu manga inulug. 2Aw ya manga ka͡ubayan na unud da ya ginawa, ya paglong mu kanilan silinga na kanmu ina. Aw ya manga ka͡ubayan na bagu pa ya ginawa, ya paglong mu uman kanilan silinga na kanmu bubay na walaꞌ ya malat na anenganeng.
Ya palna-u ni Pablo kan Timotiyo sa umbaꞌ imo-un na manga mangintu-uway
3Pakadyawa mayu ya manga ka͡ubayan na nyabalu na walaꞌ da ya kanilan pagsaligan. 4Manang kun ya balu awun manga mangayseꞌ nan aw manga umpu nan, silan ya umbaꞌ tumabang kanan, kay pig-atag kanilan na Tyumanem na silan ya magdiyaga sa kanilan mangkatikadeng. Aw dun da nilan kasoli-i ya kadyaw na pagpatulin na matikadeng nilan. Aw yeiy ya makatutuk sa Tyumanem. 5Manang ya balu na walaꞌ da ya pagsaligan nan, yan da oloꞌ ya pigsaligan nan ya Tyumanem. Allaw aw gabi gayed sakanan nyanawagtawag adti Tyumanem aw migsekat sa tabang nan. 6Manang ya balu na gayed oloꞌ dyumalug sa pagkaliman na pagka-utawun nan, pangkay utaw pa sakanan manang adti Tyumanem kasiling sakanan na nyatay da. 7Palna-uwan yeiy adti manga mangintu-uway pada walaꞌ ya pagsalaꞌ kanilan. 8Pangkay singalan ya diliꞌ magtabang sa kadégan nan, labi la ya kanan pamilya, pigbalyaw da nan ya kanan pagpangintu-u, aw to-o pa sakanan malatay kay sa utaw na walaꞌ pangintu-u.
9Ya umbaꞌ mayu lista na un tabangan, yan ya balu na ka͡eneman (60) da ya umay nan, aw walaꞌ da sakanan pangugnan, 10aw pigsayaꞌ sakanan na manga utaw asuntu sa madyaw na pigpan-imoꞌ nan, aw madyaw ya pagpatulin nan sa kanan manga mangayseꞌ, aw pigbasa͡an nan ya manga utaw na nyakalabaꞌ adti kanan, aw pigsanggilaꞌ nan ya manga mangintu-uway, aw tyumabang sa manga makalalat, aw gayed nyatibulluk ya anenganeng nan adti imo-unun na madyaw.
11Manang ya manga balu na bagu pa ya ginawa, diliꞌ mayu pagsulaten ya kanilan ngalan adti listahan sa manga balu na umbaꞌ tabangan. Kay pagaw magagad silan na pagkaliman na kanilan pagka-utawun aw makapangugnan silan salut, aw kapabaya-an baling nilan ya imo-unun dun ni kan Kristu. 12Aw dun da baling silan pakasalaꞌ kay diliꞌ da nilan pagbetang sa ginawa ya kanilan muna pakang na magtibulluk adti imo-unun na Tyumanem. 13Aw ya sambuk uman na du-an na diliꞌ silan paglista, pagaw magkataka silan aw manumbalayan, aw gayed silan baling mangilabet sa manga eped na utaw aw magsugpaten silan sa malat na tingeg. 14Yanagaw ya kanak palna-u sa manga balu na bagu pa ya ginawa, madyaw pa na mangugnan silan salut, aw mag-iseꞌ pa, aw pakadyawun nilan ya pagdala sa kanilan pamilya. Kun maynan ya imo-un nilan, walaꞌ ya mapaglong na po-on tadun na malat adti kadég tadun na nyangintu-u. 15Yeiy ya pigpalna-u ku kay awun manga balu na nyakasuway da na un dumalug sa pagkaliman ni Satanas.
16Kun awun ka͡ubayan na nyangintu-u aw awun kadégan nan na balu, ka-ilangan na yan ya tumabang. Kun maynan, diliꞌ kabegatan ya eped na manga mangintu-uway sa pagtabang kanilan, aw mabatug pa nilan ya pagtabang sa eped na manga balu na walaꞌ ya kanilan pagsaligan.
17Ya manga maggagaday na madyaw magdala sa manga mangintu-uway, basa͡an mayu silan aw atagan sa tandan na umbaꞌ sa pagud nilan, labi la ya maseb mig-ubat-ubat aw migpalna-u sa tingeg na Tyumanem. 18Kay awun pigpasulat nan asini muna: “Kun patagunaꞌ mayu sa baka ya pig-ani, ya-i mayu pagpungusa ya bakaꞌ nan.”#5:18a Mabasa adti Déutéronomiyo 25:4. Aw awun pa uman pigpasulat nan: “Ya migtalabahu umbaꞌ sakanan tandanan sa pagud nan.”#5:18b Mabasa adti Lukas 10:7c.
19Diliꞌ kaw magka-agad-agad sa diklamu adti maggagaday sa manga mangintu-uway kun diliꞌ matinawun na duwa aw tulu ya utaw. 20Manang kun awun sambuk kanilan na gayed nyakasalaꞌ, pagsagda͡an sakanan adti asdangan na kadég na mangintu-uway, pada mallek ya manga eped aw diliꞌ silan dumalug adti pagpakasalaꞌ nan.
21Na, magi dun ni ngalan na Tyumanem aw ni Kristu Jisus aw manga anghil na pigpamalliꞌ nan, paglongun ta kaw na dalugun mu ya kadég na pigpalna-u ku kanmu. Diliꞌ kaw magkibang sa utaw aw diliꞌ mu pag-apitan ya sambuk. 22Diliꞌ kaw maksay magpandung sa kanmu palad adti utaw na malim ma-imoꞌ maggagaday sa manga mangintu-uway, pagaw awun salaꞌ nan na walaꞌ mu ka-ede-i aw iman na manga utaw aw tyandeꞌ mu ya salaꞌ nan. Pakatanawi ya kanmu pagka-utawun na walaꞌ ya pagsalaꞌ kanmu. 23Na, asuntu na malikit kaw pagkedelan kay Timotiyo, bekeꞌ oloꞌ na tubig ya pag-inemen mu, manang diliꞌ kaw magduwaduwa mag-inem sa tagbiꞌ na bino kay yan ya makatabang sa magkedel na buntit mu. 24Aw dun ni pagpamalliꞌ mu sa un taliguwan sa imo-unun na Tyumanem, diliꞌ mu pagkalingawan ya ini: Awun utaw na kya-ede-an da na eped ya manga salaꞌ nan pangkay walaꞌ pa ukumi, manang awun uman utaw na ya manga salaꞌ nan kagaya pa kabukasi. 25Kasiling uman na madyaw na imo-unun. Awun manga imo-unun na utaw na madyaw na maksay pagka-ede-an, aw pangkay diliꞌ maksay ka-ede-an, manang bukasan saba kagaya.
Currently Selected:
1 Timotiyo 5: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
