1 Timotiyo 4
4
Ya manga magpalna-uway na galu-un
1Na, to-o nyabangal ya piglong na Ispiritu Santo na adti kamoliyan na manga allaw awun manga utaw na ayawan nilan ya kanilan pagpangintu-u aw dumalug silan sa manga ispiritu na maggaway aw sa palna-u na manga busaw. 2Ya palna-u yeiy iman mu aw matinaw, manang migtallalingu ya manga utaw na magpalna-u seiy, aw kyebbelan da ya anenganeng nilan. 3Pigpigil nilan sa manga utaw ya pagpangugnan. Aw pigpalna-uwan nilan uman na diliꞌ kuman sa eped na manga punganan na pagkanen, pangkay pig-imoꞌ na Tyumanem ya kadég yeiy na un galu dawaten na manga mangintu-uway aw pasalamatan kay kya-ede-an nilan ya matinaw na palna-u. 4Kay ya kadég na pig-imoꞌ na Tyumanem alag saba madyaw, aw kun pigpasalamatan da adti kanan, diliꞌ da galu kele͡an na manga utaw, 5kay piglinisan da na Tyumanem magi sa tingeg nan aw sa pagpanawagtawag na manga mangintu-uway.
Ya madyaw na sugu-anen ni Kristu
6Kun yeiy ya palna-u mu adti kanaten manga inulug na nyangintu-u, ma-imoꞌ kaw madyaw na sugu-anen ni Kristu Jisus. Kay kita-en nilan na tengteng mu kyalabetan ya tingeg na Tyumanem aw ya matinaw na palna-u na pigdalug da mu. 7Diliꞌ mu pagsapadan ya manga allaw dun ni manga kasampetanen na walaꞌ ya guna kay walaꞌ yan lekat adti Tyumanem. Kay ya kasampetanen yeiy pig-imo-imoꞌ oloꞌ na manga utaw. Tibagsegi baling ya pagdalug sa bet na Tyumanem. 8Awun saba ma-untung tadun dun ni pagpakabagseg sa kanaten lawas, manang to-o pa dun dakulaꞌ ya ma-untung kun tibagsegan tadun ya pagdalug sa bet na Tyumanem. Aw yan ya ma-untung tadun, ya ginawa na lyumekat adti Tyumanem, bekeꞌ oloꞌ na asini tas na lupaꞌ manang adtu uman kagaya ni tas na langit. 9Ya paglongun yeiy matinaw saba aw umbaꞌ pangintu-uwan na kadég na utaw. 10Yeiy ya du-an na migtibagseg kitadun na mapalna-u yeiy adti manga utaw, kay syumalig kitadun sa Tyumanem na Gayed Awun na yan ya Magpaluwa-ay sa kadég na manga utaw labi la ya manga nyangintu-u kanan. 11Yanagaw to-o palna-uwan ya kadég yeiy pada dalugun nilan.
12Na, pagaw palipaslipasan na eped na utaw ya palna-u mu asuntu na bagu pa ya kanmu ginawa. Diliꞌ mu pagtumbay na ma-imoꞌ ya maynan, manang imo-a baling pundinganan ya kanmu pagka-utawun adti manga mangintu-uway magi dun ni paglong mu, aw adti madyaw na bet mu, aw sa pagginawa mu sa kadég na manga utaw, aw sa pagpangintu-u mu na to-o masalig, aw dun ni kanmu anenganeng aw sa kadég na manga imo-unun mu na walaꞌ ya pagsalaꞌ.
13Sa diliꞌ pa aku dumateng dun ni kamayu, kasebi ya pagbasa sa pigpasulat na Tyumanem adti katipun mayu. Tibulluka ya kanmu ginawa adti pag-ubat-ubat sa tingeg na Tyumanem adti manga utaw, aw palna-uwi silan. 14Gamita ya katadeng na pig-atag da kanmu na Ispiritu Santo, na yan ya pigpa-edeꞌ da na propita idtu muna sa pagpandung na manga maggagaday sa kanilan manga palad adti kanmu. 15Tibulluka ya kanmu ginawa adti kadég na imo-unun na pigtaligu kanmu, pada kita-en na kadég na utaw na to-o la kaw matadeng maggagad kanilan. 16Gayed pakatanawi ya kadég na imo-unun mu aw padelega ya kanmu pagpalna-u sa tengteng matinaw. Kay kun yeiy ya imo-un mu, makaluwaꞌ ya kanmu pagka-utawun aw ya manga utaw na magpakanyeg kanmu.
Currently Selected:
1 Timotiyo 4: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
